މެންޗެސްޓާ ޔުނައިޓެޑްގެ އައު ކީޕަރު އަންދްރޭ އޮނާނާ އެކުލަބުގައި ބޭނުންކުރާނީ އޭނާ އެންމެ ގަޔާވާ 24 ނަންބަރު ކަމުގައި ހަމަޖައްސައިފިއެވެ. ސަބަބަކީ ކޮބާހެއްޔެވެ؟

އޮނާނާ އިންޓަމިލާނުގައި ވެސް ބޭނުންކުރީ 24 ނަންބަރެވެ. ނެދަލޭންޑްސްގެ އަޔެކްސްގައި ވެސް ބޭނުންކުރީ 24 ނަންބަރެވެ. މެންޗެސްޓާ ޔުނައިޓެޑަށް 47 މިލިއަން ޕައުންޑަށް ބަދަލުވުމާއެކު އެކުލަބުން ވެސް ނިންމާފައިވަނީ އޭނާއަށް 24 ނންބަރު ޖާޒީ ދިނުމަށެވެ.

އާއްމުކޮށް ކީޕަރުން އެންމެ ބޭނުންވާ ނަންބަރަކީ އެއްވަނަ ނަންބަރެވެ. އޮނާނާ ވެސް ވަނީ ބައެއް ފަހަރު ގައުމީ ޓީމާއި ކުލަބުގައި އެއް ނަންބަރު ބޭނުންކޮށްފައެވެ. އެކަމަކު އޭނާ ގަބޫލުކުރަނީ އެއްވަނަ ނަންބަރުގައި އޭނާއަށް ނަސީބު އެހީނުވާކަމަށެވެ. ސައުވީސް ނަންބަރުގައި ކުޅެން އޭނާ ބޭނުންވާ ސަބަބަކީ އޭނާ އުފަންވީ އޭޕްރީލް މަހުގައި ކަމަށްވުމެވެ. އޭޕްރީލް މަހަކީ އަހަރުގެ ހަތަރުވަނަ މަހެވެ. 24ގައި ހިމެނޭ ހަތަރެއްގެ އޭނަ އިޚްތިޔާރުކުރީ މިހެންވެއެވެ. ދޭއް އިޚްތިޔާރުކުރީ އޭނާ އުފަންވީ އޭޕްރީލް މަހުގެ ދެވަނަ ދުވަހު ކަމަށް ވުމުންނެވެ.

އުމުރުން 27 އަހަރުގެ އޮނާނާއަކީ އެންމެ ފަހުގެ ޗެމްޕިއަންސް ލީގުގެ ފައިނަލް ކުޅުނު ކީޕަރެވެ. އޭނާ ވަނީ އިޓާލިއަން ކަޕް އިންޓަމިލާނަށް ކާމިޔާބުކޮށްދީފައެވެ.