މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ ވިޒިޓް މޯލްޑިވްސް) އިން ފަރަންސޭސިވިލާތުގައި ދިވެހިރާއްޖޭގެ ތަފާތު ޕްރޮޑަކްޓްތަކާއި ހިދުމަތްތައް ޕްރޮމޯޓް ކުރުމަށް ވޯގް ފްރާންސާއެކު ޑިޖިޓަލް އަދި ޕްރިންޓް މާކެޓިންގް ކެމްޕޭނެއް ކުރިއަށް ގެންގޮސްފިއެވެ. 30 މެއި 2023 ގައި ފެށުނު މި ކެމްޕެއިން ކުރިއަށްދިޔައީ އެއް މަސް ދުވަހުގެ މުއްދަތަށެވެ. މި ކެމްޕެއިންގެ މަގުސަދަކީ ފަރަންސޭސިވިލާތުގެ ފަތުރުވެރިންނަށް އަމާޒުކޮށް ދިވެހިރާއްޖޭގެ ބްރޭންޑް ޕްރެޒެންސް ހަރުދަނާކޮށް، މި މާކެޓުން ރާއްޖެއަށް އަންނަ ފަ ތުރުވެރިންގެ އަދަދު އިތުރުކުރުމެވެ.

ވޯގް ފްރާންސް އަކީ ފަރަންސޭސިވިލާތުގެ މާކެޓުގައި 90 އަހަރަށް ވުރެ ގިނަ ދުވަހުގެ ތަޖުރިބާ ލިބިފައިވާ ޕްރިމިއާ މަންތްލީ ފެޝަން ނިއުސް އެންޑް ޓްރެންޑްސް މެގަޒިން އެވެ. ދުނިޔޭގެ ހުރިހާ ކަންކޮޅެއްގައި މަޝްހޫރު ނަމެއް ކަމަށްވާ ވޯގް އަކީ ފަރަންސޭސިވިލާތުގެ ބާޒާރުގައި ރާއްޖެއާ މެދު ދެކޭ ގޮތާ އެއްގޮތަށް އަޕްސްކޭލް އަދި "ގްލެމަރަސް" ނަމެކެވެ.

ފަރަންސޭސިވިލާތުގައި ވޯގް ބްރޭންޑްގެ ވަރުގަދަކަމުން އެމްއެމްޕީއާރުސީއަށް މި ކެމްޕޭނުން ނީޝް އެފްލުއެންޓް ފްރެންޗް މާކެޓުގެ އިތުރުން އެހެނިހެން ފަރަންސޭސިވިލާތުގެ ދަތުރުވެރިންނަށް ވެސް ވާސިލްވުމަށް ފަސޭހަ މަގެއް ލިބިގެންދާ ކެމްޕޭނެކެވެ. ވޯގްގެ ޓާގެޓް އޯޑިއެންސްގެ %46 އަކީ މަތީ ފަންތީގެ ފަތުރުވެރިންނެވެ. އަދި ޑިޖިޓަލް އޯޑިއެންސްއަކީ މަހަކު 8.9 މިލިއަން ޔުނިކް ވިޒިޓާސްއެވެ.

ވޯގްއަކީ އެކި ފަންތީގެ ކިޔުންތެރިންނަށް އެންމެ ރަނގަޅު އައު އުފެއްދުންތަކާއި ހިދުމަތްތަކާއި އޮފާތަކާ ބެހޭ ގޮތުން ޚަބަރުތައް ފޯރުކޮށްދޭ އެންމެ މަޝްހޫރު އެއް މަޖައްލާއެވެ. އެގޮތުން، ވޯގްއާއެކު އެމްއެމްޕީއާރުސީއިން ކުރިއަށް ގެންދިޔަ މި ކެމްޕޭނަކީ ފަރަންސޭސިވިލާތުގެ މާކެޓުގައި އެންމެ މަތީ ދަރަޖައިގެ މަންޒިލެއްގެ ގޮތުގައި ދިވެހިރާއްޖޭގެ ބްރޭންޑް ހަރުދަނާ ކުރުމަށް އެހީތެރިވެދިން ކެމްޕޭނެކެވެ.

މި ކެމްޕޭނުގައި ޕްރިންޓް އަދި ޑިޖިޓަލް ކޮމްޕޮނެންޓެއް ހިމެނުނެވެ. މި ޕްރިންޓް ކޮމްޕޮނެންޓްގެ ދަށުން، ދިވެހިރާއްޖެ އަކީ އެންމެ މަގުބޫލް ލަގްޒަރީ މަންޒިލެއްގެގޮތުގައި ދައްކައިދޭ ފޮޓޮއެއް، އޭޕްރީލް މަހުގެ މަޖައްލާގެ ބޭރު ކަވަރުގައި ޝާއިޢު ކުރިއެވެ. އަދި ޑިޖިޓަލް ކޮމްޕޮނެންޓްގައި ދިވެހިރާއްޖޭގެ ފޮޓޯތައް، ވޯގް ފްރާންސްގެ އިންސްޓަގްރާމް އަދި ފޭސްބުކްގައި ޝާއިޢުކުރިއެވެ.

މަދުވެގެން 300،000 މީހުނަށް މި ކޮންޓެންޓް ފޯރިއެވެ. މި ކެމްޕޭންގައި އިސްކަންދީފައި ވަނީ ދިވެހިރާއްޖޭގެ ލަގްޒަރީ އަދި އާއިލީ ޕްރޮޑަކްޓްތަކާއި ތަޖުރިބާތައް އިޝްތިހާރުކުރުމަށެވެ. އޭގެ ތެރޭގައި ރާއްޖޭގެ ސިގްނެޗާ އޯވާވޯޓާ ބަންގަލޯތަކާއި ލިވަބޯޑެއްގައި ރާއްޖޭގެ ކަނޑުތަކުގައި ޕްރައިވެޓް ކްރޫޒްތަކަށް ދިޔުން ފަދަ އުފެއްދުންތައް ހިމެނުނެވެ. މީގެ އިތުރުން، ލަގްޒަރީ 'އޯލް އެމެނިޓީސް އިންކްލޫޑަޑް' ބަބުލް ޓެންޓެއްގައި ރެއެއް ހޭދަކުރުމާއި، ފްލޯޓިން ޓްރޭއެއްގައި ޕްރައިވެޓް ޕޫލްތަކުގައި ހެނދުނުގެ ނާސްތާ ކެއުމާއި، ރާއްޖެއިން ލިބެންހުރި ސްޕާ އަދި ވެލްނެސްގެ އެކިއެކި ހިދުމަތްތައް ވެސް މި ކެމްޕޭނުގައި ވަނީ ފާހަގަކޮށްފައެވެ.

03 ޖުލައި 2023 ގެ ނިޔަލަށް ފްރާންސުން ދިވެހިރާއްޖެއަށް 30،770 ފަތުރުވެރިން އައިސްފައިވެއެވެ. މި އަހަރު ފަރަންސޭސިވިލާތަކީ ދިވެހިރާއްޖެއަށް 8 ވަނަ ޓޮޕް ސޯސް މާކެޓެވެ. ފްރާންސުން ދިވެހިރާއްޖެއަށް އަންނަ ފަތުރުވެރިންގެ އަދަދު ދަމަހައްޓާ އިތުރުކުރުމަށް އެމެމްއެމްޕީއާރްސީއިން ދަނީ ދިވެހިރާއްޖޭގެ ޕްރޮޑަކްޓްތަކާއި ތަޖުރިބާތަކާއި ސެގްމެންޓްތައް އިޝްތިހާރުކުރުމަށް ގިނަ ހަރަކާތްތަކެއް ހިންގަމުންނެވެ.