ގިނަ ޓޮޕް ސޯސް މާކެޓްތަކުން މިހާރުވެސް ވަނީ ޕްރީ ޕެންޑެމިކް އެރައިވަލްސް ފަހަނައަޅައި ގޮސްފައި - އެމްއެމްޕީއާރުސީ

ގިނަ ޓޮޕް ސޯސް މާކެޓްތަކުން މިހާރުވެސް ޕްރީ ޕެންޑެމިކް އެރައިވަލްސް ފަހަނައަޅައި ގޮސްފައިވާ ކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ބުނެފިއެވެ.

އެމްއެމްޕީއާރުސީން ވަނީ 2023 ވަނަ އަހަރުގެ އެއް މިލިއަން ވަނަ ފަތުރުވެރިޔާއަށް ޖުލައި 16 ވަނަ ދުވަހު މަރުހަބާކިޔާފައެވެ. ވޭތުވެދިޔަ އަހަރު މި އަދަދު ހާސިލުކުރެވިފައި ވަނީ އޮގަސްޓުމަހުގެ 12 ވަނަ ދުވަހުއެވެ. މި އަހަރުގެ އެއް މިލިއަން ފަތުރުވެރިޔާއަށް މަރުހަބާ ކިޔުމަށް ފަހު، ރާއްޖެ މިހާރު އޮތީ 2023 ވަނަ އަހަރަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ކަނޑައަޅުއްވާފައިވާ 1.8 މިލިއަން ފަތުރުވެރިންގެ ޤައުމީ ޓާގެޓު ހާސިލްކުރުމުގެ އުންމީދުގައެވެ. ކެމްޕޭން ދަތުރުފުޅުގެ ތެރެއިން މ. މުލަކުގައި ރައީސް ވަނީ ރާއްޖެއަށް މިއަހަރު 1.9 މިލިއަން ފަތުރުވެރިން ގެނައުމަށް އަމާޒު ކަނޑައަޅާފައިވާ ކަަން ހާމަ ކުރައްވާފައެވެ.

މި އަހަރުގެ ފުރަތަމަ ދެ ކުއާޓަރުގައި މުހިންމު އެކި މާކެޓްތަކުގައި ރާއްޖެ ޕްރޮމޯޓުކުރުމަށާއި، ޑެސްޓިނޭޝަން ޕްރެޒެންސް ދެމެހެއްޓުމުގައި 360 ޑިގްރީ މާކެޓިންގ އެޕްރޯޗަކާއެކު އެމްއެމްޕީއާރުސީއިން ކުރިއަށްގެންދިޔަ ގިނަ މާކެޓިންގ މަސައްކަތް މި ކާމިޔާބީގައި ވަރަށް މުހިންމު ދައުރެއް އަދާކޮށްފައިވެއެވެ. ކޮވިޑްގެ ކުރިން ރާއްޖެއަށް އެންމެ ގިނައިން ފަތުރުވެރިން އަންނަމުން ދިޔަ އެއް މާކެޓް ކަމަށްވާ ޗައިނާ އާއި ރާއްޖެއާ ދެމެދު ސީދާ ދަތުރުތައް ވަނީ ފަށައިފައެވެ. ތިން އަހަރުގެ މެދުކެނޑުމަކަށް ފަހު ޗައިނާއިން ރާއްޖެއަށް ސީދާ ދަތުރުތައް ފަށާފައިވަނީ 18 ޖެނުއަރީ 2023 ގައެވެ. މިއާއެކު، މި އަހަރުގެ ތެރޭގައި އެންމެ ގިނަ ފަތުރުވެރިން ރާއްޖެއަށް ޒިޔާރަތްކުރި ހަތަރު ސޯސް މާކެޓުގެ ތެރޭގައި ޗައިނާ ހިމެނިފަައިވާއިރު، ރާއްޖެއަށް އަންނަ ފަތުރުވެރިންގެ އަދަދަށް ފާހަގަކޮށްލެވޭ ހެޔޮ އަސަރުތަކެއް ކުރަމުންދެއެވެ. ކޯވިޑް-19ގެ ކުރިން ޗައިނާ މާކެޓަކީ ރާއްޖޭގެ އެރައިވަލް ޗާޓްތަކުގެ އެއްވަނައެވެ. 2021 ވަނަ އަހަރު ޗައިނާ މާކެޓް މުޅިން ބަންދުވެފައި ވާއިރު، މިދިޔަ އަހަރުގެ މި މުއްދަތާ އަޅާބަލާއިރު ބޮޑު ކުރިއެރުމެއް މި މާކެޓުން ހާސިލުކުރެވިފައިވެއެވެ.

އެމްއެމްޕީއާރުސީއިން މި އަހަރު ހިންގި މުހިންމު މާކެޓިންގ އިވެންޓްތަކުގެ ތެރޭގައި 30 މެއި 2023ން 02 ޖޫން 2023ށް ކުރިއަށް ގެންދިޔަ 'ވިޒިޓް މޯލްޑިވްސް ސްޓޯރީޓެލާރސް ކޮންފަރެންސް 2023' ފާހަގަކޮށްލެވެއެވެ. މި އިވެންޓް ލޯ ސީޒަން އާ ދިމާކޮށް ބާއްވާފައިވަނީ އެރައިވަލްސް ބޫސްޓް ކުރުމުގެ މަގުސަދުގައެވެ. އަދި މި އިވެންޓާ ގުޅިގެން ކުރިއަށް އޮތް މަސްތަކުގައި ރާއްޖެއަށް އަންނަ ފަތުރުވެރިންގެ އަދަދު އިތުރުވާނެކަމަށް ލަފާކުރެވެއެވެ. އާންމުކޮށް ހިންގާ ހަރަކާތްތަކާ މުޅިން ތަފާތު މި އިވެންޓުގައި ރާއްޖޭގެ 8 ސަރަޙައްދެއް ވަނީ ވަރަށް ތަފްސީލުކޮށް މުޅި ދުނިޔެއަށް ޕްރޮމޯޓުކޮށްފައެވެ. ދުނިޔޭގެ އެކި ކަންކޮޅުތަކުގައި ރާއްޖޭގެ ބްރޭންޑް ޕްރެޒެންސެ ވަރުގަދަކުރުމަށް، މި އިވެންޓް މެދުވެރިކޮށް ހިންގި ހަރަކާތްތަކުގައި ވަނީ ހަމައެކަނި ވިޒިޓް މޯލްޑިވްސްގެ ސޯޝަލް މީޑިޔާ ޕްލެޓްފޯމްތަކުން 89,517,434ގެ ރީޗްއެއް ހާސިލުކުރެވިފައެވެ. މި އިވެންޓުގައި ރާއްޖޭގެ 8 ސަރަޙައްދެއްގައި ފަތުރުވެރިންނަށް ހުރި ފުރުސަތުތަކާއި ލިބެން ހުރި ޚާއްޞަ ތަޖުރިބާތައް ޕްރޮމޯޓްކުރުމަށް ހިންގި ހަރަކާތްތަކުގެ ސަބަބުން ރާއްޖެއަށް އަންނަ ފަތުރުވެރިންގެ އަދަދު އިތުރުވުމުގައި މުހިންމު ދައުރެއް އަދާކުރާނެކަމަށް ބެލެވެއެވެ.

އެމްއެމްޕީއާރުސީއިން މިއަހަރުގެ މާކެޓިންގ ހަރަކާތްތައް ސްޓްރެޓެޖައިޒްކޮށްފައިވަނީ ރާއްޖެއަށް އަންނަ ފަތުރުވެރިން އިތުރުކުރުކޮށް، ރައީސުލްޖުމްހޫރިއްޔާ މިއަހަރަށް ކަނޑައަޅުއްވާފައިވާ 1.8 މިލިއަން ފަތުރުވެރިންގެ އަމާޒަށް ވާސިލުވުމަށެވެ. މިގޮތުން، އެރައިވަލް ފިގަރސް އިތުރުކުރުމަށް އެއަރލައިންސް، ޓީއޯސް، އަދި ޓީއޭސް ފަދަ ގްލޯބަލް ސްޓޭކްހޯލްޑަރުންނާ ގުޅިގެން ތަފާތު ބާވަތްތަކުގެ މާކެޓިންގް ހަރަކާތްތައް ބާއްވާ، ޑެސްޓިނޭޝަނެއްގެ ގޮތުގައި ރާއްޖެ ޕްރޮމޯޓްކުރުމަށް އެމްއެމްޕީއާރުސީއިން މެދުކެނޑުމެއް ނެތި މަސައްކަތްކުރަމުންދެއެވެ. އަޅުގަނޑުމެންގެ ގިނަ ޓޮޕް ސޯސް މާކެޓްތަކުން މިހާރުވެސް ވަނީ ޕްރީ ޕެންޑެމިކް އެރައިވަލްސް ފަހަނައަޅައި ގޮސްފައެވެ. މި އަހަރުގެ މިހާތަނަށް ބަލާއިރު، އެންމެ ގިނަ ފަތުރުވެރިން ރާއްޖެއަށް ޒިޔާރަަތްކޮށްފައިވާ 5 މާކެޓަކީ ރަޝިޔާ، އިންޑިއާ ،އިނގިރޭސިވިލާތް، ޗައިނާ އަދި ޖަރުމަނުވިލާތެވެ.

15 ޖުލައި 2023ގެ ނިޔަލަށް ރަޝިޔާއިން ރާއްޖެއަށް 117,198 ފަތުރުވެރިން ވަނީ ޒިޔާރަތްކޮށްފައެވެ. އަދި މި އަހަރު ދެވަނައަށް އެންމެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާ އިންޑިއާއިން 117,131 ފަތުރުވެރިންވަނީ ރާއްޖެއަށް ދަތުރުކޮށްފައެވެ. ކޯވިޑް-19 އަށް ފަހު، ރާއްޖެއަށް އެންމެ ގިނަ ފަތުރުވެރިން އަންނަ މާކެޓްގެ ގޮތުގައި އޮތީ އިންޑިޔާއެވެ. 2021 ވަނަ އަހަރު އިންޑިޔާއިން ރާއްޖެއަށް ދަތުރުކުރި ފަތުރުވެރިންގެ އަދަދަކީ ޕެންޑަމިކްގެ ކުރިން އެ ގައުމުން ރާއްޖެއަށް ދަތުރުކުރި ފަތުރުވެރިންގެ އަދަދަށް ވުރެ އިތުރު އަދެދެއްކަން ފާހަގަކޮށްލެވެއެވެ. މި އަހަރު އެންމެ ގިނަ ފަތުރުވެރިން ރާއްޖެއަށް ޒިޔާރަަތްކޮށްފައިވާ ފަސް މާކެޓްގެ ތެރޭގައި ހިމެނޭ އިނގިރޭސިވިލާތުން 84،763 ފަތުރުވެރިން، ޗައިނާއިން 77،202 ފަތުރުވެރިން އަދި ޖަރުމަނުވިލާތުން 69،074 ފަތުރުވެރިން ރާއްޖެއަށް މިހާތަނަށް ޒިޔާރަތްކޮށްފައިވެއެވެ. އިނގިރޭސިވިލާތާއި ޖަރުމަނުވިލާތުގެ މާކެޓް ވެސް 2022 ވަނަ އަހަރުގެ ނިޔަލަށް ވަނީ ޕެންޑަމިކްގެ ކުރީގެ އަދަދަށް ވުރެ ކުރިއަށްޖެހިފައެވެ. އަދި މި އަހަރަކީ ރާއްޖެއަށް އެންމެ ވަރުގަދަ އެއް މާކެޓް ކަމަށްވާ ޗައިނާ، ކޯވިޑް-19 ގެ ފަހުން ޓޮޕް 5 އެރައިވަލްސް ލިސްޓަށްއެރި ފުރަތަމަ އަހަރެވެ.

2022 ވަނަ އަހަރު އެމްއެމްޕީއާރުސީއިން ވަނީ މާކެޓިންގ 178 ހަރަކާތް ދުނިޔޭގެ އެކި ކަންކޮޅުތަކުގައި ހިންގާފައެވެ. މީގެ ތެރޭގައި 90 އަށް ވުރެ ގިނަ މާކެޓިންގ ކެމްޕޭން، 44 ފެއަރގައި ބައިވެރިވުން، 6 ރޯޑްޝޯ ހޯސްޓްކުރުމުގެ އިތުރުން 10 ވަރޗުއަލް އިވެންޓާއި، 18 ފެމިލިއަލައިޒޭޝަން ޓްރިޕް އަދި ދުނިޔޭގެ އެކި ކަންކޮޅުތަކުގައި އިތުރު 10 އިވެންޓެއް ބޭއްވުން ހިމެނެއެވެ. މުހިންމު އެކި މާކެޓްތަކުގެ މުހިންމު ސެގްމަންޓްތައް ފާހަގަކޮށް، އެންމެ ފަހުގެ ދަތުރުފަތުރުގެ ޓްރެންޑްތަކަށް ބަލައިގެން ތަފާތު ހަރަކާތްތައް، އެމްއެމްޕީއާރުސީއިން މި އަހަރުވެސް ހިންގަމުން ދެއެވެ. މި އަހަރުގެ މިހާތަނަށް 113 ތަފާތު މާކެޓިންގ ހަރަކާތް ކުރިއަށް ގެންގޮސްފައިވާއިރު، 2023 ވަނަ އަހަރުގެ ފުރަތަމަ ހަ މަސްދުވަހުގެ ޖުމްލަ ރީޗް އަކީ 4،168،605،812 އެވެ.