ލޯފަން މީހުންނަށް އެކަނި ވޯޓުލެވޭ ގޮތް ހެދުމަކީ ތަފާތުކުރުމެއް ނެތި ޙައްޤުތައް ކަށަވަރު ކުރުމަށް އެޅުނު މުޙިއްމު ފިޔަވަޅެއް - އެޗްއާރުސީއެމް

ނުކުޅެދުންތެރިން ހުންނަ މީހުންނަށް އަމިއްލައަށް ވޯޓުލެވޭ ގޮތަށް ހެދުމަކީ ތަފާތުކުރުމެއް ނެތި އަސާސީ ޙައްޤުތައް ކަށަވަރު ކުރުމަށް އެޅުނު މުޙިއްމު ފިޔަވަޅެއް ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ބުނެފިއެވެ.

ރާއްޖެޓީވީގެ ފަސްކާފު ޕްރޮގްރާމުގައި ވާހަކަ ދައްކަވަމުން، އެޗްއާރުސީއެމްގެ އެޑްވޮކަސީ ޑިޕާޓްމަންޓުގެ އެސިސްޓެންޓް ޑިރެކްޓަރ ޚަދީޖާ ލިމްޔާ ވިދާޅުވީ ޤާނޫނު ނަމްބަރ 11/2008 (އިންތިޚާބުތަކާ ގުޅޭ ޢާންމު ޤާނޫނަށް) ގެނެވުނު އިސްލާޙުގައި ވޯޓު ކަރުދާހުގައި އަމިއްލައަށް ފާހަގަ ޖެހުމަށް ޖިސްމާނީ ގޮތުން ނުކުޅެދިގެންވާ މީހުންގެ ތެރެއިން ފެނުމުގެ ނުކުޅެދުންތެރިކަން ހުންނަ މީހުން، އެހެން މީހުންގެ އެހީތެރިކަމަކާ ނުލައި ވޯޓު ކަރުދާހުގައި އަމިއްލައަށް ފާހަގަ ޖެހުމަށް އެދޭނަމަ، މިޤާނޫނުގެ 45-1 ވަނަ މާއްދާގައި ބަޔާންކުރާ ޓެމްޕްލޭޓް ބޭނުންކޮށްގެން ވޯޓުކަރުދާހުގައި ފާހަގަ ޖެހުމުގެ އިޚްތިޔާރު ލިބިގެންވާ ކަމަށެވެ.

މި އިސްލާހުގެ ސަބަބުން ފެނުމުގެ ނުކުޅެދުންތެރިކަން ހުންނަ މީހުންނަށް އެމީހުންގެ ވޯޓުގެ ސިއްރުކަން ކަށަވަރުކޮށް މިނިވަންކަމާއެކު ވޯޓުލުމުގެ ޙައްޤު ބޭނުންކުރެވޭނެ ކަމަށެވެ. އެހެންކަމުން މިއީ މުޖުތަމަޢުގައި ތަފާތުކުރުމެއް ނެތި އަސާސީ ޙައްޤުތައް ކަށަވަރު ކުރުމަށް އެޅުނު މުޙިއްމު ފިޔަވަޅެއްކަމަށް އޭނާ ވިދާޅުވިއެވެ.

ފެނުމުން މަހުރޫމްވެފައިވާ މީހުންނަށް އަމިއްލައަށް ވޯޓުލެވޭގޮތަށް އިންތިޚާބުތަކާއި ބެހޭ އާންމު ގާނޫނަށް ގެނެސްފައިވާ އިސްލާހާ ގުޅިގެން ކުރަންޖެހޭ މަސައްކަތްތަކުގެ ތެރެއިން ޤަވާއިދަށް ގެންނަން ޖެހޭ އިސްލާހުތައް ގެނެސް ނިމިފައިވާ ކަމަށް އިލެކްޝަންސް ކޮމިޝަނުން ބުނެއެވެ.

އެ ކޮމިޝަނުން ބުނީ ލޯފަން މީހުންނަށް ވޯޓުލުމުގައި ހަމަޖައްސަން ޖެހޭ އިންތިޒާމްތައް ހަމަޖައްސަމުންދާ ކަމަށެވެ. އެގޮތުން ގަވާއިދަށް ގެންނަން ޖެހޭ ބަދަލު ގެނެސްފައިވާ ކަމަށާއި ޤާނޫނުގައި ބުނާ އިންތިޒާމްތައް ހަމަޖައްސަން ކުރަން ޖެހޭ އިތުރު މަސައްކަތްތައް ވެސް ކުރިއަށް ދާ ކަމަށެވެ.

ޚާއްޞަ ޓެމްޕްލޭޓެއް ބޭނުން ކޮށްގެން، ފެނުމުން މަޙްރޫމްވެފައިވާ މީހުން އަމިއްލަ އަށް ވޯޓުލުމަށްޓަކައި، އިންތިހާބުތަކާ ބެހޭ އާންމު ގާނޫނަށް ގެނެވުނު އިސްލާޙަކީ، ހަމަހަމަ ކަމާއެކު ވޯޓުދިނުމުގެ ޙައްޤު އަދާކުރުމަށް އެޅުނު ވަރަށް މުހިންމު ފިޔަވަޅެއްކަމަށް އެ ކޮމިޝަނުން ބުނެއެވެ. އަދި މިއީ އިންތިހާބީ ނިޒާމަށް ލިބުނު ވަރަށްބޮޑު ކުރިއެރުމެއްކަމަށް އެ ކޮމިޝަނުން ފާހަގަކުރެއެވެ.

މީގެކުރިން ފެނުމުން މަހުރޫމްވެފައިވާ މީހުން ވޯޓުލަނީ އެހެން މީހެއްގެ އެހީތެރިކަމާއެކުއެވެ.

އެހެންނަމަވެސް އަލަށް ގެނައި އިސްލާހުގައި ވާގޮތުން ފެނުމުން މަހުރޫމްވެފައިވާ މީހުން ވޯޓުލުމަށްޓަކައި ޓެމްޕްލޭޓު ބޭނުންކޮށްގެން ވޯޓު ކަރުދާހުގައި ފާހަގަޖެހިދާނެއެވެ. އެގޮތުން ވޯޓު ކަރުދާހުގެ ތެރެއަށް ލައިގެން ނުވަތަ ވޯޓު ކަރުދާހުގެ މަތީގައި ވަގުތީގޮތުން ހަރުކޮށްގެން، ވޯޓުލުމަށް އެހީތެރިވެދޭގޮތަށް ތައްޔާރުކޮށްފައިވާ، އެތެރެ ފެންނަ ޕްލާސްޓިކް ޑިވައިސްއެއް ބޭނުންކުރެވިދާނެ ކަމަށް އިސްލާހުގައި ވެއެވެ.