އިދިކޮޅަށް "ކޮމަން ކެނޑިޑޭޓް"އެއް ނެރެވިދާނެހެން ހީނުވޭ، "ކޮމަން ކެނޑިޑޭޓަށް" ހަދަންވީ ރައީސް ޞާލިހު - ނާއިބްރައީސް ފައިސަލް

އިދިކޮޅު ފަރާތްތަކުން ގުޅިގެން އެއް ކެނޑިޑޭޓެއް ނެރޭނެ ކަމަށް ބުނި ނަމަވެސް އެއީ ކުރެވިދާނެކަމެއް ކަމުގައި ހީފުޅުނުވާ ކަމަށް ނާއިބު ރައީސް ފައިސަލް ނަސީމް ވިދާޅުވެއްޖެއެވެ.

ނާއިބްރައީސް ފައިސަލް މިފަދައިން ވިދާޅުވީ ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަފުޅު ދައްކަވަމުންނެވެ.

Advertisement

ނާއިބްރައީސް ވިދާޅުވީ 2018ގައި އޭރުގެ ރައީސް އަބްދުﷲ ޔާމީންގެ ވެރިކަން ބަދަލުކުރުމަށް ކުރި މަސައްކަތާއި މިއަދުގެ ހާލަތާއި އަޅާ ނުކިޔޭނެ ކަމަށެވެ. އޭރު އެއް ކެނޑިޑޭޓެއް ނެރުނު އިރު އޭރު މަސައްކަތް ކުރީ އެ ސަރުކާރުގައި އޮތް ބިރުވެރިކަމުން އަރައިގަނެ، ސަލާމަތަށް ދާން ކަމަށެވެ. އެމަނިކުފާނު އިތުރަށް ވިދާޅުވީ މިއަދު ޖަލުގެ ބިރުވެރިކަން ފަދަ ބިރުވެރިކަމެއް ނެތް ކަމަށެވެ. އެހެންވީމަ މިއަދު ކުރިން އޮތް ފަދަ ހާލަތެއް ނެތް ކަމަށް ނާއިބްރައީސް ފައިސަލް ވިދާޅުވިއެވެ. ނާއިބްރައީސް ފައިސަލް ވިދާޅުވީ ރަނގަޅު ގޮތަކީ ފުންކޮށް ވިސްނުމަށް ފަހު އިތުރު ދައުރަކަށް ރައީސް ޞާލިހަށް ފުރުސަތު ދެއްވުން ކަމަށެވެ. އެންމެންނަށް އެއްބަސްވެވޭނެ ފަދަ ކޮމަން ކެނޑިޑޭޓަކީ އެމަނިކުފާނު ކަމަށް ނާއިބްރައީސް ފައިސަލް ވިދާޅުވިއެވެ.

ނާއިބްރައީސް ފައިސަލް ވިދާޅުވީ ރައީސުލްޖުމްހޫރިއްޔާގެ ވެރިކަމުގެ އަޖުމަ ބަލާލެވިފައިވާ ކަމަށާއި، އެމަނިކުފާނަށް އިތުރު ދައުރެއް ދޭން ޖެހޭ ކަަމަށެވެ. ރައީސަކީ ހިތްޕުޅު ހެޔޮ ސާދާ ބޭފުޅެއް ކަމަށް ނާއިބްރައީސް ފައިސަލް ވިދާޅުވިއެވެ. އަދި ރައީސް އަބަދުވެސް މަސައްކަތްޕުޅު ކުރައްވަނީ ރައްޔިތުންނަށް ހެޔޮ ގޮތްވުން އެދިގެން ކަމަށާއި ރައީސާއެކުގައި ގާތުން މަސައްކަތް ކުރައްވާ އިރު ވަރަށް ކައިރިން އެކަން ފެނިވަޑައިގަންނަވާ ކަމަށް ނާއިބްރައީސް ފައިސަލް ފާހަގަކުރެއްވިއެވެ.

މިދިޔަ ވެރިކަމުގައި ރާއްޖެ އޮތް ހާލަތާމެދުގައި ނާއިބްރައީސް ފައިސަލް ވަނީ ވާހަކަފުޅުދައްކަވާފައެވެ. ނާއިބްރައީސް ފައިސަލް ވިދާޅުވީ އޭރު ރާއްޖޭގެ ވިޔަފާރިތައް އޮތީ ފުނޑިފައި ކަމަށާއި ޤައުމުގައި ހަމަޖެހުމެއް ނެތް ކަމަށެވެ. އަދި އޭރު ސިޔާސީ އެތައް ބަޔަކާއި އެ މީހުންގެ އާއިލާ މީހުން ވެސް ތިބެން ޖެހުނީ ޖަލުގައި ކަމަށް އެމަނިކުފާނު ވިދާޅުވިއެވެ. އެގޮތުން ޤާސިމް އިބްރާހީމް ފަދަ ޚިދުމަތްތެރި ބޭފުޅުން ޖަލަށްލައި، ޤާސިމްގެ ދަރިކަލުން ފަދަ އަޚުލާގު ރަނގަޅު ކުއްޖަކު ވެސް ޖެހުނީ ޖަލަށް ދާން ކަމަށް ނާއިބްރައީސް ވިދާޅުވިއެވެ. އަދި ނާއިބްރައީސް ފައިސަލްގެ ވާހަކަފުޅުގައި ކުރީގެ ރައީސް މައުމޫން އަބްދުލް ޤައްޔޫމާއި އަދާލަތު ޕާޓީގެ ރައީސް އިމްރާން އަބްދުﷲގެ އިތުރުން އެހެން ބޭފުޅުން ވެސް ޖަލަށް ލީކަން ފާހަގަކުރެއްވިއެވެ. ނާއިބްރައީސް ފައިސަލް ވިދާޅުވީ އެމަނިކުފާނު ވެސް ޖަލަށް ނުގޮސް ސަލާމަތްވެވަޑައިގެންނެވީ ހަމަ ކިރިޔާ ކަމަށާއި، ޖަލަށް ނުގޮސް ސަލާމަތްވެވެވަޑައިގަތީ ހަނި ގޮތަކަށް ކަމަށެވެ.

އެހެންނަމަވެސް މިހާރު އެ މަންޒަރު ބަދަލުވެފައިވާ ކަމަށް ނާއިބްރައީސް ފައިސަލްވަނީ ވިދާޅުވެފައެވެ. މި 5 އަހަރުގެ ތަޖުރިބާ އަށް ފަހު ރައީސް އަށް އިތުރު ދައުރެއް ދޭން ޖެހޭ ކަމަށެވެ.

ނާއިބްރައީސް ފައިސަލް ވިދާޅުވީ ރައީސާއެކު ނައިބެއްގެ ގޮތުގައި މި 5 އަހަރު މަސައްކަތް ކުރެއްވީ ހަވާލުކުރެވިފައިވާ ޒިންމާ ވީ އެންމެ ފުރިހަމަ އެއްކޮށް އަދާކުރެއްވޭތޯ ކަމަށެވެ. ނާއިބްރައީސް ފައިސަލް ވަނީ ކުރިއަށް އޮތް ރިޔާސީ އިންތިޚާބުގައި ރައީސަށް ދެވަނަ ދައުރެއް ދިނުން މުހިންމު ކަމަށެވެ.