ވޯޓު ފޮށި ބެހެއްޓުމަށް އެދިފައިނެތް ރިސޯޓުތަކަށް ދެވަނަ ފުރުސަތެއް

ވޯޓު ފޮށި ބެހެއްޓުމަށް އެދިފައިނެތް ރިސޯޓުތަކަށް ވޯޓުފޮށި ބެހެއްޓުމުގެ ފުރުސަތު ވަކި ހަމައެއްގެ މަތިން ދިނުމަށް އިލެކްޝަންސް ކޮމިޝަނުން ނިންމައިފިއެވެ.

އެކޮމިޝަންގެ ނާއިބުރައީސް އިސްމާއީލް ހަބީބް ވިދާޅުވީ ރިސޯޓުތަކުގައި މަސައްކަތް ކުރާ ދިވެހިންނަށް، އިތުރު ފުރުޞަތެއް ދިނުމުގެ ގޮތުން، ކޮމިޝަނުން ކަނޑައަޅާފައިވާ ސީލިންގއާ އެއްގޮތަށް، ވޯޓުލުމުގެ ޙައްޤު ލިބިގެންވާ 30 ފަރާތަކުން ރީ-ރަޖިސްޓްރޭޝަން ފޯމު 2023 ޖުލައި 17 އިން ފެށިގެން، ޖުލައި 31 ގެ ނިޔަލަށް ކޮމިޝަނަށް ހުށަހަޅައިފިނަމަ، މިހާތަނަށް ވޯޓުފޮށްޓެއް ބެހެއްޓުމަށް ބޭނުންވެގެން އެދިފައިނެތް 23 ރިސޯޓުގައި ވޯޓުފޮށި ބެހެއްޓުމުގެ ފުރުޞަތު ދޭން ކޮމިޝަނުން ނިންމާފައިވާ ކަމަށެވެ.

އިންތިޚާބުގައި ރިސޯޓުތަކުގައި ވޯޓު ފޮށި ބަހައްޓާނީ މަދުވެގެން 30 މީހުން ވޯޓުލާން ރަޖިސްޓްރީކޮށްފައިވާ ރިސޯޓުތަކުގައެވެ. ވޯޓު ފޮށި ބަހައްޓާ މަރުކަޒުތައް ކަނޑައެޅުމުގެ މަސައްކަތްތައް ކުރަމުންދާއިރު، އާއްމުކޮށް ވޯޓު ފޮށިތައް ބަހައްޓާ މަރުކަޒުތަކުގެ ހާލަތު ވަރަށް ރަނގަޅަށް ބަލާނެކަމަށާއި، އެއީ އެންމެ އެކަށީގެންވާ ތަންތަންތޯ ބަލައި ޔަގީންކުރާނެ ކަމަށްވެސް ކޮމިޝަނުން ބުނެއެވެ.

މިއަހަރުގެ ރިޔާސީ އިންތިޚާބުގައި އެމީހަކު ރަށްވެހިވެފައިވާ ރަށްނޫން އެހެން ތަނެއްގައި ވޯޓުލުމަށް ރީ-ރަޖިސްޓްރޭޝަނަށް ހުޅުވާލުމަށް ނިންމާފައިވަނީ ޖުލައި 16ން އޮގަސްޓްމަހުގެ 5 ވަނަ ދުވަހުގެ ނިޔަލަށެވެ. އެގޮތުން އޮންލައިންކޮށް ޖުލައި 16ން ޖުލައި 29ގެ ނިޔަލަށް ރީ-ރަޖިސްޓްރީ ކުރެވޭއިރު، ޖުލައި 30ން އޮގަސްޓު 5ށް ރީ-ރަޖިސްޓްރީ ކުރަން ޖެހޭނީ ފޯމު ހުށަހަޅައިގެންނެވެ. އަދި އެންމެ ފަހުން ބޭއްވި ލޯކަލް ކައުންސިލް އިންތިޚާބުގައި މާލެ ސިޓީގައި ވޯޓުލުމަށް ރީ-ރަޖިސްޓަރ ކުރި ފަރާތްތަކުން މިއަހަރުގެ އިންތިޚާބުގައި އަލުން މާލޭގައި ވޯޓުލާން ރަޖިސްޓްރީކުރަން ނުޖެހޭ ގޮތަށްވެސް ކޮމިޝަނުން ވަނީ ނިންމާފައެވެ.

ރިޔާސީ އިންތިޚާބު ބޭއްވުމަށް ނިންމާފައިވަނީ ސެޕްޓެމްބަރު މަހުގެ ނުވަވަނަ ދުވަހުއެވެ. އަދި ދެވަނަ ބުރެއް ބާއްވަން ޖެހިއްޖެނަމަ ސެޕްޓެމްބަރު މަހުގެ 30ގައި ބޭއްވުމަށް ވަނީ ނިންމާފައެވެ.