އަންހެނުންގެ ވޯލްޑްކަޕުގެ ގަދަ ތަރިން: ވިންޑީ ރެނާޑް

ފްރާންސްގެ ލިއޯން އަށް ކުޅެމުން އަންނަ ވިންޑީ ރެނާޑަކީ އެ ގައުމުގެ ގައުމީ ޓީމުގެ އެންމެ މުހިންމު ކުޅުންތެރިޔާ އެވެ. ޓީމުގެ ކެޕްޓަނެވެ. އޭނާ ވަނީ ގައުމީ ޓީމާއި ކުލަބު ލެވެލްގައި މިހާތަނަށް 17 އަހަރު ތެރޭގައި 32 ތަށި ހާސިލްކޮށްފަ އެވެ.

މިފަހަރުގެ ވޯލްޑްކަޕަށް އޭނާ ކުރިމަތިލަނީ ނަފްސާނީ ބައްޔަށް ފަރުވާ ކުރުމަށް ވޯލްޑްކަޕް ނުކުޅެވިދާނެކަން އިއުލާނުކުރުމަށްފަހު އެވެ. ނަމަވެސް އެއިރު ޓީމުގައި ހުރި ކޯޗު ކޮރިނޭ ޑިއަކްރޭ މަގާމުން ވަކިކުރުމުން ފްރާންސްގެ ކުޅުންތެރިން އުފާފާޅުކުރި އެވެ. ރެނާޑަކީ ވެސް އޭގެ ތެރެއިން ކުޅުންތެރިއެކެވެ.

އުމުރުން 32 އަހަރުގެ ޑިފެންޑަރު ރެނާޑް ވަނީ ފްރާންސްގެ ލީގުގެ ޗެމްޕިއަންކަން 15 ފަހަރު ހޯދައިފަ އެވެ. އަށް ފަހަރު ޗެމްޕިއަންސް ލީގު ލިއޯނާއެކު ކާމިޔާބުކުރި އެވެ. ގައުމީ ޓީމަށް 145 މެޗު ކުޅެދީފައިވަ އެވެ. އޭނާގެ އަމާޒަކީ 2019 ވަނަ އަހަރު އަމިއްލަ ގައުމުގައި ކުރިމަތިވި ވޯލްޑްކަޕްގެ ނާކާމިޔާބީ މުޅިން ހަނދާނުން ފޮހެލުމަށް މިފަހަރު ތަށި ހޯދުމެވެ.

އިސްތަށިގަނޑުގެ ސްޓައިލާއި ކުޅުމުގެ ވަރުގަދަ ކަމަށް ބަލާފައި ބައެއް މީހުން އޭނާ އަށް ލިވަޕޫލްގެ ވާޖިލް ވެންޑައިކްގެ ނަމުން ވެސް ގޮވަ އެވެ.