ފަބީނިއޯ ވެސް ވިއްކާލަން ލިވަޕޫލް ތައްޔާރު
17 ޖުލައި 2023 | ހޯމަ 09:22ސައުދީ ލީގުން ވަނީ ފަބީނިއޯ އަށް ހުށަހެޅުން ލިބިފައި
ލިވަޕޫލަށް ކުޅެމުން އަންނަ ފަބީނިއޯ
ލިވަޕޫލަށް ކުޅެމުން އަންނަ ބްރެޒިލްގެ މިޑްފީލްޑަރު ފަބީނިއޯ ވިއްކާލުމަށް އެކުލަބުން ތައްޔާރުވެއްޖެ އެވެ.
އުމުރުން 29 އަހަރުގެ ކުޅުންތެރިޔާ ގަތުމަށް މަސައްކަތް ކުރަނީ ސައޫދީ އަރަބިއްއާގެ އަލް އަހުލީއިންނެވެ. އެކުލަބުން ވަނީ ފަބީނިއޯ އަށް 40 މިލިއަން ޑޮލަރުގެ ހުށަހަޅާފަ އެވެ.
ލިވަޕޫލުން ފަބީނިއޯ ވިއްކާލުމަށް ޕްލޭންކޮށް އެކުލަބުގެ ޕްރީ ސީޒަނަށް އޭނާ ނުގެންދެ އެވެ. އެއީ އަލް އަހުލީ އަށް ބަދަލުވުމަށް ފަބީނިއޯ ވެސް ބޭނުންވާތީވެ ދެ ކުލަބުގެ މަޝްވަރާ އާއި ކުޅުންތެރިޔާގެ އަމިއްލަ ކަންކަމަށް ވަގުތު ދިނުމަށެވެ. އަހުލީ އަށް ބަދަލުވުމަށް ފަބީނިއޯ އަމިއްލަ ޝަރުތުތަކަށް އެއްބަސްވެފައިވާއިރު މިހާރު ކުރިއަށްދަނީ ދެ ކުލަބުން ހަމަޖައްސަންޖެހޭ ލިޔެކިޔުންތައް ފުރިހަމަކުރުމެވެ.
ލިވަޕޫލުގެ ކޯޗު ޔާގެން ކްލޮޕް އަންނަނީ އަންނަ ސީޒަނަށް އޭނާގެ މިޑްފީލްޑް ލައިނަށް ބޮޑު ބަދަލެއް ގެންނަމުންނެވެ. ޖޭމްސް މިލްނާ އާއި އެލެކްސް އޮކްސްލައިޑް ޗެމްބަލައިން އާއި ނަބީ ކެއިޓާ ދޫކޮށްލުމަށްފަހު ޓީމަށް ގެނައީ އެލެކްސިސް މެކްއަލިސްޓާ އާއި އެސް ޒޮބޮސްލާއީ އެވެ. މީގެ އިތުރުން ކެޕްޓަން ޖޯޑަން ހެންޑަސަން އާއި ތިއާގޯ ސިލްވާ އަށް ވެސް ރަނގަޅު އަގެއް ލިބޭނަމަ ވިއްކާލަން އޭނާ ހުރީ ތައްޔާރަށެވެ. ސަބަބަކީ މި ކުޅުންތެރިންގެ އުމުރު މަތިވުމެވެ.
