ހުކުރު ދުވަހު މުޅި ދުނިޔެއަށް ދިމާވި އައިޓީ ޚިދުމަތައް ބުރޫ އެރުމުގެ މައްސަލަ ކޮންމެވެސް ވަރަކަށް ހައްލުވެ, ހުއްޓުން އަރާފައިވާ ބައެއް ޚިދުމަތްތައް ހޮނިހިރު ދުވަހު އަލުން ފެށިފައި ވީ ނަމަވެސް، މައްސަލައިގައި އެންމެ ބޮޑަށް ޝާމިލްވާ ކަމަށް ބެލޭ ސައިބަރ ސެކިއުރިޓީ ޚިދުމަތް ދޭ ކްރައުޑްސްޓްރައިކްގެ ސީއީއޯ ޖޯޖް ކާރޓްޒް ބުނެފައިވަނީ މައްސަލަ މުޅިން ހައްލުވާން ހަފްތާތަކެއް ނަގާނެ ކަމަށެވެ.
ދުނިޔެއަށް މިހާތަނަށް ކުރިމަތިވި މިފަދަ އެންމެ ބޮޑު ޙާދިސާ ހިނގީ ކްރައުޑްސްޓްރައިކް އިން ހެދި ސޮފްޓްވެއަރ އަޕްޑޭޓް އެއްގެ ސަބަބުން ކަމަށް އެ ކުންފުނިން ވަނީ ބުނެފައެވެ.
ސައިބަރ ސެކިއުރިޓީގެ ރޮނގުން ދުނިޔޭގެ އެންމެ މަގްބޫލު އެއް ކުންފުނީގެ ގޮތުގައ ބެލޭ ކްރައުޑްސްޓްރައިކް ގެ ސީއީއޯ ޖޯޖް ކާރޓްޒް އެކްސް ގައި ހުކުރު ދުވަހު ކުރި ޕޯސްޓެއްގައި ބުނެފައިވަނީ، އައިޓީ ޚިދުމަތް ހުއްޓުން އެރީ މައިކްރޮސޮފްޓް ވިންޑޯޒް އޮޕަރޭޓިންގ ސިސްޓަމް ގައި ބޭނުން ކުރާ އެކުންފުނީގެ ސައިބަރ ސެކިއުރިޓީ ސޮފްޓްވެއަރ އެއްގެ އަޕްޑޭޓެއް ގައި ހެދިފައި އިން ގޯހެއްގެ ސަބަބުން ކަމަށެވެ.
ކާރޓްޒް ވަނީ އައިޓީ ޚިދުމަތް ކެނޑުނު މައްސަލައިގައި ކަސްޓަމަރުންގެ ފަރާތުން ނިހާޔަތައް މާފަށް އެދޭ ކަމަށް ބުނެ އެކްސްގައި އެހެން ޕޯސްޓެއް ވެސް ޖަހާފައެވެ.
ކާރޓްޒް ބުނެފައިވަނީ މައްސަލަ ދިމާވީ ސެކިއުރިޓީ ފޫއަޅުވައިލައިގެން ދިން ސައިބަރ ހަމަލާއެއްގެ ސަބަބުން ނޫން ކަމުގެ ޔަގީން ކަން ދޭ ކަމަށެވެ. އެކުންފުނިން ސައިބަރ ސެކިއުރިޓީ ދޭ ފަރާތްތަކަށް ފުރިހަމަ ރައްކައުތެރިކަން އޮތް ކަމަށް ވެސް އޭނާ ބުނެފައިވެއެވެ.
ކްރައިޑްސްޓްރައިކް އާ ހަވާލާދީ މީޑިއާ ރިޕޯޓްތައް ބުނާ ގޮތުގައި މައްސަލަ ދިމާވީ ކްރައުޑްސްޓްރައިކުން އުފައްދާ ފެލްކަން ސެންސަރ ސޮފްޓްވެއަރ ބޭނުން ކުރާ ފަރާތްތަކަށެވެ. މެކް އަދި ލިނަކްސް އޮޕަރޭޓިންގ ސިސްޓަމް ބޭނުން ކުރާ ފަރާތްތަކަށް މައްސަލަ ކުރިމަތި ނުވާ ކަމަށްވެސް ރިޕޯޓްތައް ބުނެއެވެ. ކްރައުޑްސްޓްރައިކް އިން ބުނެފައިވަނީ ފެލްކަން އަކީ ކްލައުޑް ގައި ރައްކާކުރާ ފައިލްތަކުގެ ސަލާމަތައް ޚާއްސަ ސޮފްޓްވެއަރ އެއް ކަމަށެވެ.
ކްރައުޑްސްޓްރައިކްގެ ސައިބަރ ސެކިއުރިޓީ ސޮފްޓްވެއަރ އަކީ ދުނިޔޭގެ ބޮޑެތި ވިޔަފާރި ކުންފުނިތަކާއި، ބޭންކުތަކާއި، އެއަރލައިންތަކާއި އަދި ސިއްހީ ޚިދުމަތްދޭ ތަންތަނުގައި ސައިބަރ އެޓޭކް ތަކާއި، ހެކް ކުރުމުގެ ނުރައްކަލުން ރައްކައުތެރިކަން ހޯދަން ބޭނުން ކުރާ ސޮފްޓްވެއަރ އެވެ. އެހެން ކަމުން އެފަދަ ނުރައްކަލެއް އުޅޭތޯ ދެނެގަތުމަށް ސޮފްޓްވެއަރ އަށް ކޮމްޕިއުޓަރ އޮޕަރޭޓިން ސިސްޓަމްގެ އެންމެ ފުނަށް ވާސިލްވާން ޖެހޭ ކަމަށްވެއެވެ.
މިފަހަރު މައްސަލަ ދިމާވީ ކޮމްޕިއުޓަރ އޮޕަރޭޓިން ސިސްޓަމްގެ ގޮތުގައި މައިކްރޮސޮފްޓް ވިންޑޯޒް ބޭނުން ކުރާ ކޮމްޕިއުޓަރ ސިސްޓަމްތަކަށް ކަމަށްވާއިރު، ކްރައުޑްސްޓްރައިކުން އިޝޫކުރި ފެލްކަން އަޕްޑޭޓް ވިންޑޯޒް އާ ނުބައިކޮށް އިންޓަރެކްޓް ކުރާތީ ވިންޑޯޒް ބޭނުން ނުކުރެވޭ ގޮތް ވުމުން ދިމާވި މައްސަލައެއް ކަމަށް ކްރައުޑްސްޓްރައިކުން ބުނެފައިވެއެވެ.
މައްސަލަ ދިމާވުމާއެކު ކްރައުޑްސްޓްރައިކްގެ އިންޖިނޭރުން ވަގުތުން މަސައްކަތް ފަށާފައިވާ ކަމަށާއި، ދިމާވި މައްސަލަ ދެނެގަނެވި މައްސަލައިގެ ހައްލު ހޯދިފައިވާ ކަމަށް ކާރޓްޒް ހާމަކޮށްފައިވެއެވެ.
ހުކުރު ދުވަހު މި ދިމާވި މައްސަލަ އާ ގުޅިގެން ދުނިޔޭގެ އެތައް އެއަރލައިން ތަކެއްގެ ދަތުރުތަކަށާއި، އެއަރޕޯޓް ތަކުގެ އޮޕަރޭޝަންތަކަށް ބުރޫއެރިއެވެ. އޭގެ އިތުރުން ސިއްޙީ ޚިދުމަތްތަކަށާއި، މުވާސަލާތީ ޚިދުމަތްތަކަށާއި، ބޭންކުގެ ޚިދުމަތްތަކުގެ އިތުރުން ޓީވީ ޗެނެލް ތަކުގެ މަސައްކަތްތަކަށްވެސް ބުރޫ އެރިކަން ވަނީ ފާހަގަ ކުރެވިފައެވެ.
މި ދިމާވި މައްސަލައާއެކު ދުނިޔޭގެ އެތައް މިލިއަން ކޮމްޕިއުޓަރ ސިސްޓަމްތައް ރީބޫޓް ނުކުރެވޭތީ އަދިވެސް ހުރީ ބޭނުން ނުކުރެވޭ ހާލަތުގައެވެ.
އެއާއެކު މިކަން ހިނގަން ދިމާވި ސަބަބަތުތައް ފުރިހަމަ އަށް ދެނެގަތުމަށް ކޮމްޕިއުޓަރ އެކްސްޕާޓުން ގެންދަނީ އަދިވެސް މަސައްކަތް ކުރަމުންނެވެ.
އެމެރިކާގެ ޓެކްސަސްގައި ގާއިމް ވެފައިވާ ކްރައުޑްސްޓްރައިކުން މި ދިމާވި މައްސަލައިގެ ޒިންމާ ނަގާ އެއީ އެކުންފުނީގެ އެންޓިވައިރަސް ސޮފްޓްވެއަރ ގެ އަޕްޑޭޓަކުން މައިކްރޮސޮފްޓް ވިންޑޯޒް އަށް ދިމާވި މައްސަލައެއް ކަމަށް ބުނި ނަމަވެސް، ތަޖުރިބާކާރުންގެ ދެކޭ ގޮތުގައި އެއީ މުޅި މައްސަލައިގެ ހަމަ އެކަނި ސަބަބު ކަމަށް ނުވެދާނެއެވެ.
ސައިބަރ ސެކިއުރިޓީ ތަޖުރިބާކާރެއް ކަމަށްވާ ޓްރޮއީ ހަންޓް އެކްސް ގައި ކޮށްފައިވާ ޕޯސްޓެއްގައި ބުނެފައިވަނީ، މިއީ ދުނިޔޭގެ ތާރީޚްގައި އައިޓީގެ ޚިދުމަތް އެންމެ ބޮޑަށް ކެނޑިގެން ދިޔަ ފަހަރު ކަމަށާއި، އެހެން ނަމަވެސް މިފަދަ ކަމެއް ހިނގާފާނެ ކަމަށް ސައިބަރސެކިއުރިޓީ މެނޭޖަރުން ދެކޭތާ އެތައް އަހަރެއް ވެއްޖެ ކަމަށެވެ.
މި ހާދިސާ އާ ގުޅިގެން އެމެރިކާގެ ހިއްސާގެ ބާޒާރުގައި ކްރައުޑްސްޓްރައިކްގެ ހިއްސާގެ އަގު މީގެ ކުރިން ދުވަހަކު ނުދާވަރަށް ދަށަށް ގޮސްފައިވާ ކަމަށް މީޑީއާ ރިޕޯޓްތައް ބުނެއެވެ.
