ކަސްޓަމަރެއްގެ ބޭންކު ކާޑުގެ މަޢުލޫމާތު ބޭނުންކޮށްގެން ނާޖާއިޒު ފައިދާއެއް ނެގޭފަދަ މަޢުލޫމާތެއް ކުންފުނީގައި ރައްކާކޮށްފައި ނުހުންނާނެ - އެމްޓީސީސީ
އެ ކުންފުނިން ދޭ އިލްތިމާސްއަކީ ހަޤީގަތް އޮޅޭ ފަދަ ގޮތްގޮތަށް ފަތުރާ މިފަދަ މަޢުލޫމާތުތަކާ މެދު ސަމާލުވުން
އާރްޓީއެލް ފެރީތައް
ކަސްޓަމަރެއްގެ ބޭންކު ކާޑުގެ މަޢުލޫމާތު ބޭނުންކޮށްގެން ނާޖާއިޒު ފައިދާއެއް ނެގޭފަދަ މަޢުލޫމާތެއް އެ ކުންފުނީގެ ސިސްޓަމްތަކުގައި ރައްކާކުރެވިފައި ނުހުންނާނެކަމުގެ ޔަޤީންކަން ދޭ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ން ބުނެފިއެވެ.
އެމްޓީސީސީން ނެރުނު ބަޔާނެއްގައި ބުނީ އެ ކުންފުނިން މަސައްކަތްކުރަމުން ދަނީ ދިވެހި ރައްޔިތުންގެ ޢާންމު ދިރިއުޅުމަށް ހެޔޮބަދަލެއް ގެނެސްދިނުމަށްޓަކައި ދިވެހި ސަރުކާރުން އެކަށައަޅާފައިވާ އިސްތިރާޖީ ރޭވުންތައް ތަންފީޒުކުރުމަށް ކަމަށެވެ. އެގޮތުން މުޅި ރާއްޖެ ދަތުރުފަތުރުގެ ނިޒާމަކުން ގުޅުވާލުމަށް އުތުރާއި ދެކުނުގައި ފަށާފައިވާ ފެރީ އަދި ބަހުގެ ޚިދުމަތުން ރާއްޖެ ޓްރާންސްޕޯޓް ލިންކަށް ލިބެމުންދާ ބޮޑު ތަރުހީބަށް ދިވެހި ރައްޔިތުންނަށް އެ ކުންފުނިން ޝުކުރު އަދާކޮށްފައިވެއެވެ.
އާރްޓީއެލް ޚިދުމަތް ފެށުނީއްސުރެ މި ޚިދުމަތް އިތުރަށް ހަރުދަނާކޮށް ރަނގަޅުކުރުމަށްޓަކައި އެކިއެކި ފަރާތްތަކުން ލިބެމުންދާ ޚިޔާލުތަކާއި މަޢުލޫމާތުތަކަށް އެ ކުންފުނިން އަބަދުވެސް ރިޢާޔަތްކުރާނެކަމަށް އެ ބަޔާނުގައިވެއެވެ. އެ ބަޔާނުގައި ބުނެފައިވަނީ އާރްޓީއެލް އެޕްގައި ސެކިޔުރިޓީ ވަލްނަރަބިލިޓީއެއް އުޅޭކަމުގެ ރިޕޯޓް ޖުލައި މަހުގެ ކުރީކޮޅު އެ ކުންފުންޏަށް ލިބުނު ކަމަށެވެ. އަދި އެ ކުންފުނިން މި މައްސަލަ އިތުރަށް ބެލުމަށްފަހު ބޭނުންވާ ރައްކާތެރިކަމުގެ ފިޔަވަޅުތައް އަޅައި މިކަން ވާނީ ވަގުތުން ހައްލުކޮށްފަ ކަމަށެވެ.
މީގެ އިތުރުން ސިސްޓަމް ސެކިޔުރިޓީ އިތުރަށް ވަރުގަދަ ކުރުމުގެ މަސައްކަތްތައް ވެސް އެ ކުންފުނިން ކުރަމުންދާ ކަމަށާއި އެއްވެސް ކަސްޓަމަރެއްގެ ބޭންކު ކާޑުގެ މަޢުލޫމާތު ބޭނުންކޮށްގެން ނާޖާއިޒު ފައިދާއެއް ނެގޭފަދަ މަޢުލޫމާތެއް އެ ކުންފުނީގެ ސިސްޓަމްތަކުގައި ރައްކާކުރެވިފައި ނުހުންނާނެކަމުގެ ޔަޤީންކަން އެ ކުންފުނިން ވަނީ ދީފައެވެ.
އެމްޓީސީސީން ބުނީ އެ ކުންފުނިން އަޅާފައިވާ ރައްކާތެރިކަމުގެ ފިޔަވަޅުތަކުގެ ތެރެއިން ކަސްޓަމަރުންގެ ބޭންކިންގ މަޢުލޫމާތު ސެކުޔަރ ޕޭމަންޓްއެއް ހަދަން ބޭނުންވާ މިންވަރަށް އަދި މިންގަނޑަށް މެނުވީ ރައްކާ ކޮށްފައެއް ނުބަހައްޓައެވެ. މިގޮތުން އާރްޓީއެލް ސިސްޓަމްގައި ބޭންކު ކާޑު ބޭނުންކުރެވޭނީ ޕާޓްނަރިންގ ބޭންކުގެ ސެކިޔުރިޓީ ސްޓޭންޑަޑުތަކާއި އެއްގޮތަށް ކަމުގައިވަނީ ބުނެފައެވެ. އަދި އާރްޓީއެލް ސިސްޓަމްގައި ކާޑު ޓްރާންސެކްޝަން ހެދުމަށް ބޭނުންކުރާ ޑިޖިޓަލް އާލަތްތަކަކީ ވެސް ބައިނަލްއަޤްވާމީ ޕޭމަންޓް ކާޑު އިންޑަސްޓްރީގެ ސްޓޭންޑަޑްއަށް ސަރޓިފައިކޮށްފައިވާ ވަސީލަތްތަކެއްކަމުގައި ވެސް އެ ކުންފުނިން ވަނީ ބުނެފައެވެ.
އެމްޓީސީސީން އިތުރަށް ބުނީ ފައިސާ ބަލައިގަތުމަށް ވެސް އެ ކުންފުނިން ބޭނުންކުރަމުން ދަނީ ބޭންކް އޮފް މޯލްޑިވްސްގެ ޕޭމަންޓް ގޭޓްވޭކަމުން ކަސްޓަމަރުންގެ ހުރިހާ ބޭންކިން މަޢުލޫމާތެއް ހިއްސާކުރާނީ ބީއެމްއެލްގެ ސެކުޔަރ ޕްލެޓްފޯމެއްގައި ކަމަށެވެ. އެހެންކަމުން އާރްޓީއެލް އެޕް ބޭނުންކޮށްގެން ފައިސާ ދެއްކުމުގައި ކަސްޓަމަރުން ބޭނުންކުރާ އެއްވެސް ބޭންކިންގ މަޢުލޫމާތެއް އެ ކުންފުނީގެ ސިސްޓަމްގައި ރައްކާކުރެވިފައި ނުހުންނާނެ ކަމުގެ ފުރިހަމަ ޔަޤީންކަން ކަސްޓަމަރުންނަށް ވަނީ ދީފައެވެ. އަދި އެ ބަޔާނުގައި ބުނެފައިވަނީ ހަޤީގަތް އޮޅޭ ފަދަ ގޮތްގޮތަށް ފަތުރާ މިފަދަ މަޢުލޫމާތުތަކާ މެދު ސަމާލުވުމަށެވެ.
