5 ބިލިއަނަށްވުރެ ގިނަ ރުފިޔާގެ، ފެނާއި ނަރުދަމާގެ މަސައްކަތް ކުރިއަށްދޭ: ރައީސް ސާލިހު

އަތޮޅުތެރޭގެ ރަށްރަށުގައި 5 ބިލިއަނަށްވުރެ ގިނަ ރުފިޔާގެ، ފެނާއި ނަރުދަމާގެ މަސައްކަތް ކުރިއަށްދާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

މ އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅުގެ މަޑުއްވަރީއަށް ވަޑައިގެން ރައީސް ވިދާޅުވީ، މީގެ ކުރީ ސަރުކާރުތަކުން ބައެއް ރަށްތަކަށް އަޅާނުލައި ދޫކޮށްލާފައިވާކަމަށެވެ. އެގޮތަށް ދޫކޮށްލާފައި އޮތް އެއް އަތޮޅަކީ މ އަތޮޅުކަން އެމަނިކުފާނު ފާހަގަކުރެއްވިއެވެ. ނަމަވެސް މިސަރުކާރުގައި އެއްވެސް ރަށެއް ބާކީނުކޮށް ރައްޔިތުން އެދޭ ތަރައްގީ ގެނެސްދެމުންދާކަމަށް ރައީސް ވިދާޅުވިއެވެ.

Advertisement

ރައީސް ވިދާޅުވީ 141 ރަށެއްގައި 5 ބިލިއަނަށްވުރެ ގިނަ ރުފިޔާގެ، ފެނާއި ނަރުދަމާގެ މަސައްކަތް ކުރިއަށްދާ ކަމަށާއި، މިއީ އެއްވެސް ސަރުކާރަކުން ނުހިންގާވަރުގެ މަޝްރޫއު ކަމަށެވެ. އަދި އޭރުގެ ސަރުކާރުގެ ޕްލޭނާ އެއްގޮތަށް މިކަން ކުރަން ތިބިނަމަ މިމަޝްރޫއުތައް ފެށިގެންދާނީ 20 ނުވަތަ 15 އަހަރު ފަހުން ކަމަށް އެމަނިކުފާނު ވިދާޅުވިއެވެ.

މަޑުއްވަރީއަށް އިޝާރާތް ކުރައްވައި ރައީސް ވިދާޅުވީ، އެރަށުގެ ފެނާއި ނަރުދަމާގެ މަޝްރޫއު ނިމި އަންނަ މަސްތެރޭގައި ޚިދުމަތް ލިބޭނެ ކަމަށެވެ. ކުރިއަށް އޮތް ދައުރުގައި އެރަށުގެ ގިރާ ސަރަހައްދު ހިމާޔަތްކޮށްދިނުމާއި، ކުނީގެ މައްސަލަ ހައްލުކޮށްދިނުމުގެ އިތުރުން މަސްވެރިންނަށް ޚާއްސަކޮށްގެން 30 މޭލު ދުރުގައި އިތުރު ކަނދުފައްޗެއް އަަަޅާނެ ކަމަށް ރައީސް ސާލިހު ވިދާޅުވިއެވެ.

ރައީސް ވިދާޅުވީ އުމްރާނީ މަސައްކަތްތަކާއެކު، މީހުން ބިނާކުރުމުގެ މަސައްކަތްވެސް ކުރަމުންދާ ކަމަށެވެ. އެގޮތުން މިހާތަނަށް ހިލޭ ޑިގްރީ 17858 ދަރިވަރުން ކިޔަވަމުންދާ ކަމަށާއި، 6540 ދަރިވަރުން ކިޔަވައި ނިމިފައިވާ ކަމަށެވެ. ސްޓޫޑެންޓް ލޯނުގައި 3000 ގިނަ ދަރިވަރުން ރާއްޖެއިން ބޭރުގައި ކިޔަވަމުންދާ ކަމަށާއި، 1265 ދަރިވަރަކު ސްކޯލަރޝިޕްގެ ދަށުން ކިޔަވަމުންދާ ކަމަށް ރައީސް ސާލިހު ވިދާޅުވިއެވެ. އަދި ވިދާޅުވީ 5600 ދަރިވަރުން ޓެކްނިކަލް ދާއިރާއަށް ނެރެވިފައިވާ ކަމަށެވެ.

ރައީސް ވިދާޅުވީ ރައްޔިތުން ބޭނުންވާ އުފާވެރި ރާއްޖެއެއް ހޯއްދަވައިދެއްވާނެ ކަމަށާއި، ރައްޔިތުން އެދޭ ތަރައްގީ ގެނެސްދެއްވާނެ ކަމަށެވެ.