ސަސް ބަލިކޮށް، އީގަލްސް އަލުން ދެވަނައަށް

އެމްޑަބްލިއުއެސްސީ ދިވެހި ޕްރިމިއާ ލީގުގައި ސުޕަ ޔުނައިޓެޑް ސްޕޯޓްސް (ސަސް) ބަލިކޮށް، ކްލަބް އީގަލްސްއިން އަލުން އެއްވަނައަށް ޖެހިލައިފިއެވެ.

ހުކުުރު ދުވަހު ހަވީރު ކްލަބް ގްރީން ސްޓްރީޓްސް ކައިރިން 3-0ގެ ނަތީޖާއަކުން މޮޅުވެ، ބުރު ސްޕޯޓްސް ކްލަބު ވަނީ ވަގުތީގޮތުން ދެވަނައަށް ޖެހިލާފައެވެ. ނަމަވެސް، މިއަދު ހަވީރު ސަސް ކައިރިން 7-3ން މޮޅުވެ، އީގަލްސް ވަނީ އެ ޓީމުގެ ޖާގަ އަލުން ހޯދާފައެވެ.

މެޗުގެ ފުރަތަމަ ހާފަކީ ގިނަ ލަނޑުތަކެއް ފެނުނު ހާފެކެވެ. އެގޮތުން، މެޗު ފެށިގެން ހަވަނަ މިނެޓުގައި ނިޝާމް މުހައްމަދު (ޕޮގްބާ) ވަނީ ލަނޑެއް ޖަހައި، އީގަލްސްއަށް ކުރިހޯދަދީފައެވެ. އޭގެ ފަހުން މެޗުގެ 19 ވަނަ މިނެޓުގައި އީގަލްސްގެ ބިދޭސީ ކުޅުންތެރިޔާ، އިވާން ވަނީ ލަނޑެއް ޖަހައި، އެ ޓީމަށް ލީޑު ފުޅާކޮށްދީފައެވެ. އަދި އޭގެ ހަތަރު މިނެޓު ފަހުން ޓީމުގެ ކެޕްޓަން އަހުމަދު ރިޒުވާން (ރިޒޭ) ވަނީ އީގަލްސްއަށް ތިންވަނަ ލަނޑު ޖަހައިދީފައެވެ.

އީގަލްސްގެ ހަތަރުވަނަ ލަނޑު 30 ވަނަ މިނެޓުގައި އިބްރާހިމް މަހުދީ (ފޭދޫ އިއްބެ) ޖަހައިދިންއިރު، 38 ވަނަ މިނެޓުގައި ޒުވާން ކުޅުންތެރިޔާ، ޒައިން ޒަފަރު ވަނީ ލަނޑެއް ޖަހައި, ފަސް ލަނޑުގެ ފަރަގެއް ހޯދައިދީފައެވެ. ފުރަތަމަ ހާފު ނިމުމުގެ ކުރިން ސަސްއަށް ފަރަގު ކުޑަކޮށްދިނީ އަހުމަދު ހުޝާމްއާއި އަލީ ނަސޫހު (ޕިލާ) އެވެ. ފުރަތަމަ ހާފު ނިމުނީ 5-2ން އީގަލްސް ކުރިހޯދައިގެންނެވެ.

މެޗުގެ 60 ވަނަ މިނެޓުގައި އިވާން ވަނީ އިތުރު ލަނޑެއް ޖަހާފައެވެ. އަދި 80 ވަނަ މިނެޓުގައި ރިޒޭވެސް ވަނީ އޭނާގެ ދެވަނަ ލަނޑު ޖަހާފައެވެ. މެޗުގެ ފަހު މިނެޓުގައި ސަސްގެ ތިންވަނަ ލަނޑު ޖަހައިދިނީ އިބްރާހީމް އަތީގެވެ.

ދެވަނާގައި އީގަލްސްއަށް ލިބިފައިވަނީ ހަތަރު މެޗުން، 10 ޕޮއިންޓެވެ. ކުޅުނު ހުރިހާ މެޗަކުން މޮޅުވެ މާޒިޔާ އެއްވަނާގައި އޮތީ 12 ޕޮއިންޓާއެކުއެވެ. ސާފް ޗެމްޕިއަންޝިޕަށްފަހު ކުޅުނު ފުރަތަމަ މެޗުގައި މާޒިޔާ ވަނީ 6-0ން ޓީސީ ބަލިކޮށްފައެވެ.