ރައީސްގެ ވައުދުފުޅު ކޮޅުފުއްޓަށް: އިތުރު ހައުސިންގ ޔުނިޓްތަކާއި، މަގު ހެދުމާއި މުހިންމު އިތުރު ކަންކަން
2013ން 2018ށް ރާއްޖެ ތަރައްގީކުރުމުގައި ކޮޅުފުއްޓާ ދޭތެރޭގައި އެއްވެސް އުއްމީދެއް ނެތް
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް
ކުރިއަށް އޮތް ރިޔާސީ އިންތިހާބު ކާމިޔާބު ކުރައްވާ ދެވަނަ ދައުރަކަށް ހޮވިވަޑައިގެންފިިނަމަ، ކޮޅުފުއްޓަށް މުހިންމު އިތުރު ކަންތައްތަކެއް ކޮށްދެއްވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ހޮނިހިރު ދުވަހު ހެދުނު މ. އަތޮޅުގެ ރަށްތަކަށް ފެއްޓެވި ކެމްޕެއިން ދަތުރުފުޅުގެ ތެރެއިން ފުރަތަމަ ކޮޅުފުއްޓަށް ވަޑައިގެން އެރަށުގައި ބޭއްވި ކަންމަތީ ބައްދަލުވުމުގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ކޮޅުފުށީގެ އާބާދީ ކުޑަވިޔަސް ތަރައްގީ ގެންނަން ޖެހޭ ކަމަށެވެ. 2013ން 2018ށް ރާއްޖެ ތަރައްގީކުރުމުގައި ކޮޅުފުއްޓާ ދޭތެރޭގައި އެއްވެސް އުއްމީދެއް ނެތް ކަމަށެވެ. "ތިމަންނަ މެންގެ އަމާޒަކީ ވަކިވަރަކަށް އާބާދީ ދިރިއުޅޭ ރަށްރަށަށް ތަރައްގީ ގެނަައުންކަމަށް" އެބޭފުޅުން ވިދާޅުވަމުންދިޔަ ކަމަށާއި، ނަމަވެސް، އެމަނިކުފާނުގެ އަމާޒަކީ އެ ރައްޔިތަކަށް ހައްގުވާ އަސާސީ ހިދުމަތްތައް ފޯރުކޮށްދެއްވުން ކަމަށެވެ.
ރައީސް ވިދާޅުވީ 2 މަޝްރޫއެއްގެ މަސައްކަތް ނިމުން ފާހަގަކޮށްފައިވާ އިރު، ސްކޫލަށް ބޭނުންވެފައި ހުރި 8 ކްލާސްރޫމާއި، މަލްޓިޕަރޕަސް ހޯލުގެ މަސައްކަތް ނިމި އެތަން ބޭނުންކުރަން ފަށާފައިވާ ކަމަށެވެ. ފެނުގެ ނިޒާމް ނިމި ގިރާ ސަރަހައްދުގެ ފުރަތަމަ ފޭސްގެ މަސައްކަތް ނިިމިފައިވާ ކަމަށެވެ. އަދި އެތަނުގައި ކުރަން ޖެހޭ ބައެއް އިތުރު މަސައްކަތްތައް އެބަހުރި ކަމަށާއި، ކުރިއަށް އޮތް ދައުރުގައި ކޮޅުފުށީ ރައްޔިތުން އެދިވަޑައިގަންނަވާ ގޮތަށް އިތުރު ތޮށިޖަހާ މުޅި ރަށް ހިމާޔަތްކޮށްދެއްވާނެކަމަށެވެ.
ރައީސް ވިދާޅުވީ ބޯހިޔާވަހިކަމަށްޓަކައި 100 ހައުސިންގ ޔުނިޓުގެ މަސައްކަތް ފެށިފައިވާ ކަމަށާއި، ކުރިއަށް އޮތް ދައުރުގައި އޭގެ ތެރެއަށް އިތުރު 50 ހައުސިން ޔުނިޓް އިތުރުކޮށް ރައްޔިތުން ބޭނުންވާވަރަށް ބޯހިޔާވަހިކަން ފޯރުކޮށްދެއްވާނެ ކަމަށެވެ. ފެނާ ނަރުދަމާ ނިޒާމް ގާއިމްކޮށް ނިމިފަައިވާ ކަމަށާއި، ކުރިއަށް އޮތް ދައުރުގައި މަގުތައް ހަދާ ރަށްތަކުގެ ތެރޭގައި އެ މަސައްކަތް ހިމަނުއްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ރަށާ ކައިރިން ވަޒީފާ ލިބޭނެ ގޮތް ހޯދަން ޖެހޭ ކަމަށެވެ. ރަށާކައިރިން ރިސޯޓް ހެދުމަށްޓަކައި ކުރީ ސަރުކާރުން ވަކި ފަރާތަކަށް އެއް ރަށުގެ ގޮތުގައި 3 ރަށް ދީފައިވާ ކަމަށާއި، އެތަންތަނުގައި މިހާތަނަށް ވެސް އެއްވެސް މަސައްކަތް ނުކުރެވޭ ކަމަށެވެ. ކުރީ ސަރުކާރުުން ރަށްތައް ދެމުން ދިޔަ ގޮތް ރައްޔިތުންނަށް އެނގިވަޑައިގަންނަވާނެ ކަމަށާއި މިއީ އެއް ރަށުގެ ގޮތުގައި 3 ރަށް ދީފައިވާ ދާއިރާއެއް ކަމަށް ރައީސް ވިދާޅުވިއެވެ. ރައީސް ވިދާޅުވީ ކޮޅުފުށީ ރައްޔިތުން އެދޭގޮތަށް ރަށާ ކައިރިން ރިސޯޓް ތަރައްގީކުރައްވާނެ ކަމަށެވެ.
