އަތޮޅުތަކުގައި އެންމެ ގިނަ މީހުން ދިރިއުޅެމުން އަންނަނީ އައްޑޫސިޓީގައި ، އެންމެ މަދުން މީހުން ދިރިއުޅެނީ ވ އަތޮޅުގައި
އެންމެ ގިނަ މީހުން ދިރިއުޅެނީ އައްޑޫ ސިޓީ، ހދ އަތޮޅު، ކ އަތޮޅު، ރ އަތޮޅު އަދި ލ އަތޮޅުގައި
އައްޑޫ ސިޓީ
އަތޮޅުތަކުގައި އެންމެ ގިނައިން މީހުން ދިރިއުޅެމުން އަންނަނީ އައްޑޫ ސިޓީގައި ކަމަށް ބޯހިމެނުމުގެ ތަފާސްހިސާބުތަކުން ދައްކައިފިއެވެ.
2022 ވަނަ އަހަރު މުޅި ރާއްޖޭގައި ކުރިޔަށްގެންދިޔަ ބޯހިމެނުމުގެ ރިޕޯޓް އާންމުކޮށްފައިވާއިރު ރިޕޯޓްގައިވާ ގޮތުން އައްޑޫ ސިޓީގައި 25،062 މީހުން އަންނަނީ ދިރިއުޅެމުންނެވެ. އެއީ މުޅި ރާއްޖޭގެ އާބާދީގެ 5 އިންސައްތަ މީހުންނެވެ. ދެން އެންމެ ގިނަ މީހުން ދިރިއުޅެމުން އަންނަނީ ހދ އަތޮޅުގައެވެ. އެއީ ރާއްޖޭގެ އާބާދީގެ 4 އިންސައްތަ ކަމުގައިވާ 22،440 މީހުންނެވެ.
ތިން ވަނައަށް އެންމެ ގިނަ މީހުން ދިރިއުޅެމުން އަންނަނީ ކ އަތޮޅުގައެވެ. އެއީ 17،749 މީހުންނެވެ. ހަތަރު ވަނަ އަށް އެންމެ ގިނަ މީހުން ދިރިއުޅެމުން އަންނަނީ ރ އަތޮޅުގައެވެ. އެއީ 17،581 މީހުންނެވެ. ފަސް ވަނަ އަށް އެންމެ ގިނަ މީހުން ދިރިއުޅެމުން އަންނަނީ ލ އަތޮޅުގައެވެ. އެއީ 14،699 މީހުންނެވެ.
އެންމެ މަދުން މީހުން ދިރިއުޅެނީ ވ އަތޮޅުގައެވެ. އެއީ 1995 މީހުންނެވެ. އެއަށްފަހު ފ އަތޮޅުގައެވެ. އެއީ 4،869 މީހުންނެވެ. ދެން މ އަތޮޅުގައެވެ. އެއީ 5490 މީހުންނެވެ. ހަތަރު ވަނަ އަށް އެންމެ މަދުން މީހުން ދިރިއުޅެމުން އަންނަނީ ދ އަތޮޅުގައެވެ. އެއީ 6637 މީހުންނެވެ. ދެންމެ އެންމެ މަދުން މީހުން ދިރިއުޅެނީ އއ އަތޮޅުގައެވެ. އެއީ 8017 މީހުންނެވެ.
ބޯހިމެނުމުގެ ނަތީޖާ ދައްކާ ގޮތުން އަތޮޅުތަކުގައި 236،911 މީހުން ދިރިއުޅެއެވެ. އެއީ އާބާދީގެ 46 އިންސައްތަ މީހުންނެވެ.
