އައްޑޫ ސިޓީގައި ކްރޫޒްލައިނާތަކަށް ހާއްސަ ޓާމިނަލަކާއި ޔޮޓް މެރީނާއެއް ހަދައިދޭނެ ބަޔަކު ހޯދަން އައްޑޫ ސިޓީ ކައުންސިލުން އިއުލާންކޮށްފިއެވެ.

އައްޑޫ ސިޓީ ކައުންސިލުން ބުރާސްފަތި ދުވަހު ކުރި އިއުލާނެއްގައި ވަނީ އެ މަސައްކަތް ކުރަން ބޭނުންވާ ފަރާތްތަކަށް "އެކްސްޕްރެޝަން އޮފް އިންޓްރެސްޓް" (އީއައިއޯ) ހުށަހެޅުމުގެ ފުރުސަތު ހުޅުވާލާފައެވެ. މި ފުރުސަތު މި މަހުގެ 25 ވަނަ ދުވަހުގެ މެންދުރު 1:00 އާ ހަމައަށް ވަނީ ހުޅުވާލާފައެވެ.

އެ ކައުންސިލުން ބުނެފައިވާ ގޮތުގައި މި ކްރޫޒް ޓާމިނަލާއި ޔޮޓް މެރީނާ ހަދާނީ ފޭދޫގައެވެ. މި ޓާމިނަލާއި މެރީނާ ހަދަން ދިވެހި ކުންފުނިތަކަށާއި ބޭރުގެ ކުންފުނިތަކަށް ވެސް ޝައުގުވެރިކަން ހުށަހެޅޭނެއެވެ. އެގޮތުން އީއައިއޯ ހުށަހަޅާއިރު ތަރައްގީގެ ޕްލޭނެއް ވެސް ހުށަހަޅަން ޖެހޭނެ ކަމަށް ވަނީ ބުނެފައެވެ. މީގެ ތެރޭގައި ކްރޫޒް ޓާމިނަލާއި ޔޮޓު މެރީނާ ބައިނަލްއަގުވާމީ ފެންވަރަށް ތަރައްގީ ކުރުމާއި ކޮމާޝަލް އޭރިއާ އާއި އެޑްމިނިސްޓްރޭޝަން ޚިދުމަތް ދެވޭނެހެން މަދުވެގެން 100 ކޮޓަރީގެ ޓޫރިސްޓް ހޮޓެލް ފަދަ ފެސިލިޓީތައް ހެދުން ވެސް ހިމެނެއެވެ.

މި މަސައްކަތަށް ކުރިމަތިލާ ފަރާތަކީ ކުންފުންޏަކީ 10 އަހަރުގެ ތަޖުރިބާ ހުރި ފަރާތަކަށް ވާން ޖެހޭނެއެވެ. އަދި އެ ފަރާތުން ފާއިތުވި ތިން އަހަރުގެ މާލީ ބަޔާން ވެސް ހުށަހަޅަންޖެހެއެވެ.

މީގެ އިތުރުން މި ކްރޫޒް ޓާމިނަލާއި ޔޮޓު މެރިނާއިން ކްރޫޒްލައިނާތަކުންނާއި ޔޮޓުތަކުން އަންނަ ފަތުރުވެރިންނަށް ބޭނުންވާ އެހެނިހެން ޚިދުމަތްތައް ވެސް ފޯރުކޮށްދެވެން ވާނެ ކަމަށް ވަނީ ބުނެފައެވެ.

އައްޑޫސިޓީ އަދި ދެކުނުގެ ފަތުރުވެރިކަން ކުރިއެރުވުމަށް އެ ސިޓީގައި މިހާރު ގިނަ މަޝްރޫއުތަކެއް ވަނީ ފަށައިފައެވެ. އެގޮތުން، އެ ސިޓީގައި މިހާރު ކުރިއަށްދާ އުމްރާނީ ތަރައްގީގެ ކޮންމެ މަޝްރޫއެއްގެ ސަބަބުން ވެސް ފަތުުވެރިކަމާއި އިގްތިސާދު ކުރިއެރުވުމަށް ދޮރުހުޅުވިގެންދާނެ ކަމަށް ކައުންސިލުން ވަނީ މީގެ ކުރިން ފާހަގަކޮށްފައެވެ. އެގޮތުން، ގަން އިންޓަނޭޝަނަލް އެއަރޕޯޓު ތަރައްގީ ކުރުމުގެ މަސައްކަތަކީ ދެކުނުގެ ފަތުރުވެރިކަން ކުރިއެރުވުމަށް ހިންގާ އެންމެ ބޮޑު މަޝްރޫއެވެ.

މީގެ އިތުރުން ހަންކެނޑެ މަޝްރޫއާއި އައްޑޫގެ ބިންހިއްކުމުގެ މަޝްރޫއުގެ ސަބަބުން ވެސް އެ ސަރަހައްދުގައި ޓޫރިސްޓް އެނދުގެ އަދަދު އިތުރުވެގެންދާނެއެވެ.