މިއަދު އުމްރާވެރިން ފުރާތީ ތޮއްޖެހުން ކުޑަކުރުމަށް ވަގުތުއޮއްވައި އެއަރޕޯޓަށް ދިޔުމަށް އިލްތިމާސްކޮށްފި
14 ޖުލައި 2023 | ހުކުރު 02:59އުމްރާވެރިން ފުރުމަށް ހަމަޖެހިފައިވަނީ މިއަދު މެންދުރު 12:00 އިން ފެށިގެން ހަވީރު 4:00 އާ ހަމައަށް
އުމްރާގެ އަޅުކަން އަދާ ކުރުމަށް ދިޔަ ފަރާތްތަކެއް މައްކާގައި
އުމްރާގެ އަޅުކަމުގައި ގިނަ އަދަދެއްގެ ބަޔަކު މިއަދު ފުރުމަށް ހަމަޖެހިފައިވާތީ ތޮއްޖެހުން ކުޑަކުރުމަށް ވަގުތު އޮއްވައި އެއަރޕޯޓަށް ދިއުމަށް ފުލުހުން އިލްތިމާސްކޮށްފިއެވެ.
ބުރާސްފަތި ދުވަހު ފުލުހުން ކުރި ޓްވީޓެއްގައި ބުނީ ގިނަ އަދަދެއްގެ އުމްރާވެރިން ފުރުމަށް ހަމަޖެހިފައިވަނީ މިއަދު މެންދުރު 12:00 އިން ފެށިގެން ހަވީރު 4:00 އާ ހަމައަށް ކަމަށެވެ. އަދި މިއަހަރު ޙައްޖުގެ އަޅުކަން އަދާ ކުރުމަށް ދިޔަ ފަރާތްތަކުގެ ތެރެއިން ގިނަ ބަޔަކު މިއަދު ރާއްޖެ އައުމަށް ވެސް ހަމަޖެހިފައިވާތީ ވެލާނާ އިންޓަނޭޝަނަލް އެއަރޕޯޓުގެ ޓްރެފިކް ތޮއްޖެހުން ބޮޑުވާނެ ކަމަށް ލަފާ ކުރެވޭ ކަމަށެވެ.
ފުލުހުން ބުނީ އެއަރޕޯޓުގެ ޓްރެފިކް ތޮއްޖެހުން ބޮޑުވާނެ ކަމަށް ބެލެވޭތީ ދަތުރުގެ ކަންކަން އޮމާންކަމާއެކު ދާނެކަން ކަށަވަރު ކުރުމަށް ޚިދުމަތް ހޯދާ ފަރާތްތަކުން ވަގުތު އޮއްވައި ފުރުމުގެ އިންތިޒާމުތައް ހަމަޖައްސަން ޖެހޭ ކަމަށެވެ.
މީގެ އިތުރުން އެއަރޕޯޓުގައި އޮމާންކަމާއެކު ޓްރެފިކް ފްލޯ ކުރިއަށްދާނެކަން ކަށަވަރުކުރުމަށްޓަކައި އިތުރު ފުލުހުން ހަރަކާތްތެރިވަމުންދާނެ ކަމަށް ވެސް އެ އިދާރާއިން ބުނެއެވެ. އަދި އެއަރޕޯޓަށްދާ ފަރާތްތަކުން ފުލުހުންގެ އިރުޝާދުތަކާ އެއްގޮތަށް އަމަލުކުރުމަށް ވެސް ވަނީ އިލްތިމާސްކޮށްފައެވެ.
ރާއްޖެއިން ޙައްޖު އަދި އުމްރާގެ މަތިވެރި އަޅުކަންތައް އަދާކުރުމަށް ފުރާ ފަރާތްތަކުގެ ދަތުރުގެ ކަންކަން އެންމެ ފުރިހަމައަށް ކުރިއަށްގެންދިއުމަށް އެ ދުވަސްވަރުތަކުގައި އަބަދުވެސް އިތުރު ފުލުހުން އެއަރޕޯޓުގައި ހަރަކާތްތެރިވެއެވެ.
