ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަކީ އަތޮޅުތެރޭގެ ތަރައްގީއަށް ޚާއްސަ އިސްކަމެއް ދެއްވާ ވެރިއެއް ކަަމަށް، މާފުށީ ކައުންސިލް މެންބަރު މަރިޔަމް ޝިފާނާ ވިދާޅުވެއްޖެއެވެ.

ބުރާސްފަތި ދުވަހުގެ ރޭ ކ. މާފުށީގައި ބޭއްވި "އުފާވެރި އަމާން" ކެމްޕެއިން ޖަލްސާގައި ޝިފާނާ ވިދާޅުވީ، ވޭތުވެދިޔަ 5 އަހަރު އެމްޑީޕީ ވެރިކަމެއް ކުރިނަމަވެސް ކޮވިޑް-19އާ ގުޅިގެން ވެރިކަން ކުރަން ލިބުނީ ކުޑަ ދުވަސްކޮޅެއް ކަމަށެވެ. ޝިފާނާ ވިދާޅުވީ ކޮވިޑް-19ގެ ބަލިމަޑުކަމާ ގުޅިގެން ތަރައްގީގެ މަޝްރޫއުތައް ހިންގުމަށް ބޮޑެތި ގޮންޖެހުންތަކެއް ކުރިމަތިވިނަމަވެސް، ރައްޔިތުން ބޭނުންވާ ތަރައްގީ މުޅި ރާއްޖެއަށް ރައީސް ސާލިހު ގެނެސްދެއްވާފައިވާ ކަމަށެވެ.

ޝިފާނާ ވިދާޅުވީ މިވެރިކަމުގައި މާފުށީގެ ރައްޔިތުން ބޭނުންވާ ތަރައްގީ ލިބިފައިވާ ކަމަށާއި، މިހާރުވެސް ބައެއް މަޝްރޫއުތައް ކުރިއަށްދާ ކަމަށެވެ. އެގޮތުން ސިއްހީ މަރުކަޒު ހޮސްޕިޓަލަކަށް ބަދަލުކުރުމުގެ މަސައްކަތާއި، ކުނި މެނޭޖްކުރުމުގެ މަސައްކަތާއި، މާފުށީގެ 12 ކްލާސްރޫމުގެ މަސައްކަތްތައް ކުރިއަށްދާ ކަމަށެވެ. އަދި ފެށޭ ދިރާސީ އައު އަހަރުގައި އެ ކްލާސްރޫމްތަކުގައި ކިޔަވައިދޭން ފެށޭނެކަމަށް އޭނާ ވިދާޅުވިއެވެ. އަދި ވިދާޅުވީ ބަނދަރުގެ މަސައްކަތްތައް ވެސް ބާރު ސްޕީޑްގައި ކުރިއަށްދާ ކަމަށެވެ.

ޝިފާނާ ވިދާޅުވީ، ރައީސް ސާލިހަކީ ވަކި ރަށެއް ތަފާތު ކުރެއްވުމެއް ނެތި ތަރައްގީ ގެނެސްދެއްވާ ވެރިއެއް ކަމަށާއި، އެކަން މުޅި ރާއްޖެއިން ފެންނަމުންދާ ކަމަށެވެ.