ދެ ކޮމަންޑޫ ގުޅާލުމުގެ މަސައްކަތް އޮގަސްޓް މަހު ފަށައި، 6 މަސް، ނޫނީ 8 މަސްދުވަހުގެ ތެރޭގައި ނިންމާލެވޭނެކަމަށް ލަފާކުރެވޭ: އާޒިމް
ށ. ކޮމަންޑޫއާއި މަތިކޮމަންޑޫ ގުޅާލުމުގެ މަޝްރޫއު އެމްޓީސީސީއާ ހަވާލުކޮށްފައިވަނީ 2022 ވަނަ އަހަރު
އެމްޓީސީސީގެ ސީއީއޯ އާދަމް އާޒިމް
ދެ ކޮމަންޑޫ ގުޅާލުމުގެ މަސައްކަތް އޮގަސްޓް މަހު ފަށައި، ހަ މަސް ނޫނީ އަށް މަސްދުވަހުގެ ތެރޭގައި ނިންމާލެވޭނެކަމަށް ލަފާކުރެއްވޭ ކަމަށް، އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް ވިދާޅުވީ ދެ ކޮމަންޑޫ ގުޅާލުމުގެ މަޝްރޫއުގެ ދަށުން، ޖުލައި މަސް ނިމޭއިރު މަތިކޮމަންޑޫ އެއްކޮށް ހިއްކައި ނިމޭނެ ކަމަށެވެ. އަދި އޮގަސްޓު މަހު ދެ ކޮމަންޑޫ ގުޅާލުމުގެ މަސައްކަތް ފެށިގެންދާނެ ކަމަށެވެ. ގޮންޖެހުންތައް ހުރިނަމަވެސް، އެމްޓީސީސީން އަމާޒު ހިފާފައިވަނީ ޓައިމްލައިނާ އެއްގޮތަށް މަސައްކަތް ނިންމާލުމަށް ކަމަށް އާޒިމް ވިދާޅުވިއެވެ.
އާޒިމް އިތުރަށް ވިދާޅުވީ އެމްޓީސީސީން ށ. ކޮމަންޑޫގައި ހަތަރު މަޝްރޫއެއް ކުރިއަށް ގެންދާ ކަމަށެވެ. ށ. ކޮމަންޑޫއާއި މަތިކޮމަންޑޫ ގުޅާލުމުގެ މަޝްރޫއު އެމްޓީސީސީއާ ހަވާލުކޮށްފައިވަނީ ނިމިގެންދިޔަ 2022 ވަނަ އަހަރުގެ ޖެނުއަރީ މަހުގެ 12 ވަނަ ދުވަހުއެވެ. އެމަޝްރޫއުގެ ދަށުން ކޮމަންޑޫގެ ބިން ހިއްކުމާއި ކޮމަންޑޫއާއި މަތިކޮމަންޑޫ ގުޅާލުމުގެ އިތުރުން, ކޮމަންޑޫގެ އެއްގަމުތޮށި އަދި ބަނދަރުގެ ތޮށިގަނޑު މަރާމާތުކުރުން ހިމެނެއެވެ.
މި މަޝްރޫއުގެ ދަށުން މަތިކޮމަންޑޫން 16.7 ހެކްޓަރުގެ ބިން ހިއްކުމަށްފަހު ދެ ކޮމަންޑޫ ގުޅާލުމަށް ހަމަޖެހިފައިވަނީ ބްރިޖަކުންނެވެ. މިއީ ދައުލަތުގެ ބަޖެޓުން 249 މިލިއަނަށްވުރެ ގިިނަ ރުފިޔާ ޚަރަދުކޮށްގެން ކުރިއަށްގެންދާ މަޝްރޫއެކެވެ. މަސައްކަތް ނިންމުމަށް ހަމަޖެހިފައިވަނީ 730 ދުވަހުގެ ތެރޭގައެވެ.
ކޮމަންޑޫގެ ރައްޔިތުންނަށް ދިމާވެފައިވާ ބޯހިޔާވަހިކަމަށް އޮތް ހައްލަކީ މަތި ކޮމަންޑޫއާއި ކޮމަންޑޫ ގުޅުވާލުންކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވަނީ ވިދާޅުވެފައެވެ. މީގެ ކުރީގެ ސަރުކާރުތަކުގައި ވެސް ދެ ކޮމަންޑޫ ގުޅާލުމުގެ ވާހަކަތައް ވަނީ ދައްކާފައެވެ.
