ގާނޫނަށް ގެންނަން ޖެހޭ ބަދަލެއް ގެނެސްގެން ވެސް ގުރައިދޫގެ ރައްޔިތުންނަށް ގޯތި ދޭނަން - ރައީސް
13 ޖުލައި 2023 | ބުރާސްފަތި 11:47ކުރިއަށް އޮތް ރިޔާސީ އިންތިޚާބުގައި ކުރިހޯދުމަށް މަސައްކަތް ކުރާނީ އެންމެން އެކުގައި ކަމަށްވެސް ރައީސް ވަނީ ވިދާޅުވެފައި
ރައީސް ސާލިހު ކ. ގުރައިދޫއަށް ވަޑައިގަތުން
ގާނޫނަށް ގެންނަންޖެހޭ ބަދަލެއް ގެނެސްގެން ވެސް، ގުރައިދޫގެ ރައްޔިތުންނަށް ގޯތި ދެއްވާނެ ކަމަށް ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.
ކ އަތޮޅުގެ ރަށްރަށަށް ކުރައްވަމުން ގެންދަވާ ދަތުރުފުޅުގައި ބުރާސްފަތި ދުވަހު ގުރައިދޫގައި ބޭއްވި ކެމްޕެއިން ޖަލްސާގައި ވާހަކަފުޅުދައްކަވަމުން ރައީސް ވަނީ، އެ ރަށަށް ކޮށްދެއްވާނެ ކަންކަމާ ގުޅޭގޮތުން ވާހަކަަފުޅުދައްކަވާފައެވެ.
ގުރައިދޫއިން ސަރުކާރު ބަލައިގެންފައިވާ ކަަމަށާއި, ސަބަބަކީ ގުރައިދޫގެ ރައްޔިތުންނަކީ ތަރައްގީއަށް ލޯބިކުރާ ބަޔަކު ތިބި ރަށަކަށް ވުން ކަމަށް ރައީސް ވިދާޅުވިއެވެ. ރައީސް ވަނީ އެ ރަށަށްވެސް ބިމުގެ ދަތިކަން ވަރަށް ބޮޑަށް ދިމާވެފައިވާކަމަށް ވިދާޅުވެފައެވެ. އެކަން ހައްލުކުރުމަށްޓަކައި އެ ރަށުން ގޯތި ނުދެވެންވީ ސަބަބެއް ނެތްކަމަށް ރައީސް ވަނީ ވިދާޅުވެފައެވެ. ކައުންސިލަށް އެކަން ނުކުރެވޭނަމަ އެކަން ކުރާނެ އެހެން ގޮތެއް ހޯއްދަވާނެ ކަމަށްވެސް ރައީސް ވަނީ ވިދާޅުވެފައެވެ. މީގެ އިތުރުން ދެން އަންނަ މެނިފެސްޓޯއެއްގައި އެ ރަށުގައި ރޯހައުސްއާއި ފްލެޓްތައް ގާއިމްކުރުން ހިމަނުއްވާނެ ކަމަށް ވިދާޅުވިއެވެ
2018ގައި ބޭއްވި ރިޔާސީ އިންތިޚާބުގައި ގުރައިދޫއިން އެމަނިކުފާނަށް މެޖޯރިޓީ ލިބިވަޑައިނުގެންނެވި ނަމަވެސް، މިހާރު އެ ރަށް ވަރަށް ބޮޑަށް ބަދަލުވެފައިވާކަމަށް ރަައީސް ވިދާޅުވިއެވެ. ރައީސް ވިދާޅުވީ މިހާރު މުޅި ދާއިރާގެ ކުލަ އެއްކޮށް ބަދަލުވެފައި ވާކަމަށާއި، ރައްޔިތުން ތިބީ އެމްޑީޕީއާއެކު ކަމަށެވެ. މަޖިލީހުގެ ބައި އިލެކްޝަނުން އެކަން ފެނިގެން ދިޔަ ކަމަށް އެމަނިކުފާނު ވިދާޅުވިއެވެ. ރައީސް ވިދާޅުވީ ރާއްޖެއަށް އުފާވެރި އަމާން ރާއްޖެއެއް ގެނެސްދެއްވުމަށް ކުރައްވާ މަސައްކަތްޕުޅުގައި ގުރައިދޫ ދާއިރާ އޮތީ އެމްޑީޕީއާއެކު ކަމަށެވެ. ކުރިއަށް އޮތް ރިޔާސީ އިންތިޚާބުގައި ކުރި ހޯދުމަށް މަސައްކަތް ކުރާނީ އެންމެން އެކުގައި ކަމަށް ވެސް ރައީސް ވަނީ ވިދާޅުވެފައެވެ. އަދި އަމާޒަކީ ކޯލިޝަނާއެކު 100،000 ވޯޓު ހަމަކުރުން ކަމަށްވެސް ރައީސް ވިދާޅުވިއެވެ.
