އުމުރުން 56 އަހަރުގައި ދުނިޔޭގެ އެންމެ އުމުރުން ދުވަސްވީ ޕްރޮފެޝަނަލް ފުޓުބޯޅަ ކުޅުންތެރިޔާ ކަޒޫޔޯޝީ މިއުރާ, ޕޯޗުގަލްގެ ދެ ވަނަ ދަރަޖައިގެ އޮލިވެއިރެންސް ގައި މަޑުކުރުމުގެ މުއްދަތު އިތުރުކޮށްފިއެވެ.

ޖަޕާނުގެ ކުރީގެ ފޯވާޑް, ޔޮކޮހާމާ އިން އޮލިވެއިރެންސް އާ ލޯނު އެއްބަސްވުމެއްގެ ދަށުން ގުޅުނީ މިދިޔަ ޖެނުއަރީ މަހުއެވެ. މި ދެ ކުލަބުގެވެސް ވެރިޔަކީ އެއްފަރާތެކެވެ.

މިއުރާ މިއަހަރު ކުޅެފައިވަނީ ޖުމްލަ 23 މިނެޓެވެ. އެއީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ތިން މެޗެއްގައެވެ. ސީޒަނުގެ ފަހު މެޗުގައި ލެއިޒޯސް އަތުން 4-3 ން މޮޅުވި މެޗުގެ މޮޅު ކުޅުންތެރިޔަކަށް ހޮވުނީ މިއުރާ އެވެ. މިކަމާ ގުޅިގެން އިދިކޮޅު ޓީމުގެ ކޯޗު ވަނީ ވަރަށް ބޮޑަށް ފާޑުކިޔާފައެވެ.

1986 ވަނަ އަހަރު ބްރެޒިލްގެ ސަންތޮސްގައި ކެރިއަރު ފެށި މިއުރާ، 2005 ވަނަ އަހަރުން ފެށިގެން ކުޅުނީ ޔޮކޮހާމާ އެފްސީ އަށެވެ. މީގެއިތުރުން އޭނާ ވަނީ އިޓަލީ، ކްރޮއޭޝިއާ އަދި އޮސްޓްރޭލިއާގައި ކުލަބު ފުޓުބޯޅަ ކުޅެފައެވެ.

މީގެ 23 އަހަރު ކުރިން ނިމުނު ބައިނަލްއަގުވާމީ ކެރިއަރުގައި ޖަޕާނުގެ ފުޓްބޯޅަ ލެޖެންޑް ވަނީ 89 މެޗުން 55 ލަނޑު ޖަހައިދީފައެވެ. އޭނާ ވަނީ 2017 ވަނަ އަހަރު ދުނިޔޭގެ ރެކޯޑެއްވެސް ހަދާފައެވެ. އެއީ ކޮމްޕެޓިޓިވް ލީގު މެޗެއްގައި ލަނޑު ޖެހި އެންމެ މުސްކުޅި ކުޅުންތެރިޔާގެ އެވޯޑެވެ. އޭރު އޭނާގެ އުމުރަކީ 50 އަހަރާއި 14 ދުވަހެވެ.

މިއުރާގެ ވިސްނުން ހުރީ އުމުރުން 60 އަހަރާ ހަމައަށް ފުޓުބޯޅަ ކުޅުމަށް ކަމަށް މީގެކުރިން ވަނީ ބުނެފައެވެ.