އީސީގެ މެންބަރުންގެ ނަޒާހަތްތެރިކަމާމެދު ސުވާލު އުފައްދާ އެއްވެސް ޕާޓީއަކުން ޝަކުވާ އެއް ހުށަހަޅާފައެއް ނެތް - އީސީ
12 ޖުލައި 2023 | ބުދަ 10:02ކޮމިޝަންގެ މެންބަރުންގެ މެދުގައި ހިޔާލު ތަފާތުވުންތަކެއް އުފެދެން މެދުވެރިވީ ދަ ޑިމޮކްރެޓްސް ޕާޓީ އުފެއްދުމަށް ހުއްދަ ދިނުމުގެ މަރުހަލާގައި ދިމާވި ކަންތައްތަކަކާއި ގުޅިގެން
އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމެއްގެ ތެރެއިން
އިލެކްޝަންސް ކޮމިޝަނުގެ މެންބަރުންގެ ނަޒާހަތްތެރިކަމާމެދު ސުވާލު އުފައްދާ އެއްވެސް ޕާޓީއަކުން ޝަކުވާ އެއް ހުށަހަޅާފައެއް ނެތްކަމަށް އެ ކޮމިޝަނުން ބުނެފިއެވެ.
ކޮމިޝަންގެ ރައީސް ފުޢާދު ތައުފީގް އެފަދައިން ވިދާޅުވެފައި މި ވަނީ އިލެކްޝަންސް ކޮމިޝަން (އީސީ)ގެ މެންބަރުންގެ މެދުގައި ޚިޔާލުތަފާތުވުންތަކެއް ހުރިކަމަށާއި، ކޮމިޝަންގެ ރައީސްގެ އިތުބާރު ނެތްކަމަށް ބުނެ އެ ކޮމިޝަންގެ ބައެއް މެންބަރުން މީޑިއާ އަށް ދާދި ފަހުން މައުލޫމާތު ދެއްވާފައި ވަނިކޮށެވެ. ބުދަ ދުވަހު ފުއާދު ވިދާޅުވީ ކޮމިޝަނުގެ މަސައްކަތްތައް ކުރިއަށް ދާ ކަމަށާއި ކޮމިޝަންގެ ބައްދަލުވުންތައް ވެސް ބާއްވަމުންދާ ކަމަށެވެ.
އީސީގެ ތިން މެންބަރެއްގެ އިތުބާރު ނެތް ކަމަށް އިދިކޮޅު ފަރާތްތަކުން ބުނަމުންދާ ކަމަށް ބުނި ނަމަވެސް އެ ކޮމިޝަނަށް ރަސްމީ ގޮތުން ވެސް އަދި އެ ނޫން ގޮތުން ވެސް އެފަދަ މައްސަލަ އެއް ހުށަހަޅާފައިނުވާ ކަމަށް ފުއާދު ވިދާޅުވިއެވެ. މީގެ އިތުރުން އެ ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ކޮމިޝަނުގެ މެންބަރުންގެ ފުރިހަމަ އިތުބާރު ކޮމިޝަންގެ ރައީސް ފުއާދު ތައުފީގަށް އޮތް ކަމަށް އެ ކޮމިޝަނުގެ ނާއިބު ރައީސް އިސްމާއީލް ހަބީބް ވެސް ވަނީ ވިދާޅުވެފައެވެ. އޭނާ ވިދާޅުވީ އެ ކޮމިޝަނުގެ ރައީސްކަމަށް ފުއާދު ހޮވިވަޑައިގެންފައި ވަނީ އެ ބޭފުޅުންގެ ވޯޓުން ކަމަށާއި އެ އިތުބާރު ދެމި އޮތް ކަމަށެވެ.
ހަބީބު އިތުރަށް ވިދާޅުވީ އެ ކޮމިޝަންގެ އެއް މެންބަރަކު މިވަގުތު ވެސް ހުންނެވީ ކޮމިޝަނުގެ ފަރާތުން ރާއްޖެއިން ބޭރުގައި ކަމަށާއި ކޮމިޝަނުގެ ދެން ތިއްބެވި ދެ މެންބަރުން، ކޮމިޝަނުގެ މަސައްކަތްތަކުގައި ޝާމިލުވާ ކަމަށެވެ. އެގޮތުން މި ހަފްތާގައި ވެސް ޖަލްސާ އެއް ބާއްވާފައިވާ ކަމަށް އޭނާ ވިދާޅުވިއެވެ.
ކޮމިޝަންގެ މެންބަރުންގެ މެދުގައި ހިޔާލު ތަފާތުވުންތަކެއް އުފެދެން މެދުވެރިވީ ދަ ޑިމޮކްރެޓްސް ޕާޓީ އުފެއްދުމަށް ހުއްދަ ދިނުމުގެ މަރުހަލާގައި ދިމާވި ކަންތައްތަކަކާއި ގުޅިގެންނެވެ. އޭރު އެ ހުއްދަ ދޭން އަވަސް ކުރާ ކަމަށް ކޮމިޝަންގެ އެއް މެންބަަރަކު ވަނީ ބައެއް މީޑިއާތަކަށް ވިދާޅުވެފައެވެ. ނަމަވެސް އީސީގެ ރައީސް ވިދާޅުވީ ކޮމިޝަންގެ ހުރިހާ މަސައްކަތްތައް ވެސް ހިނގަނީ އުސޫލާއި އެއްގޮތަށް ކަމަށެވެ.
