ބޭސްފަރުވާއަށް އަދީބު ސިންގަޕޫރަށް ފުރާ ވަޑައިގެންފި
އެމްޓީޑީން ބުނީ އަދީބު ފަރުވާއަށް ސިންގަޕޫރަށް ވަޑައިގެންނެވީ އެކި ޑޮކްޓަރުން އެކަމަށް ލަފާ ދެއްވާފައިވާތީކަމަށް
އަދީބު އެޑްމިޓުކޮށްފައި
ކުރީގެ ނާއިބުރައީސް އަހުމަދު އަދީބު ބޭސްފަރުވާއަށް ސިންގަޕޫރަށް ފުރާވަޑައިގެންފިއެވެ.
އަންގާރަ ދުވަހުގެ ރޭ އަދީބު ސިންގަޕޯރަށް ފުރާވަޑައިގެންނެވިކަން ހާމަކޮށްފައިވަނީ އަދީބުގެ ޕާޓީ އެމްޓީޑީންނެވެ. އެމްޓީޑީން ބުނީ އަދީބު ފަރުވާއަށް ސިންގަޕޫރަށް ވަޑައިގެންނެވީ އެކި ޑޮކްޓަރުން އެކަމަށް ލަފާ ދެއްވާފައިވާތީއެވެ. އަދީބު ފަރުވާ ހޯއްދަވަނީ ފުރާނައަށް ނުރައްކާވާފަދަ ނާރުގެ ބައްޔަކަށް ކަމަށް ވެސް އެ ޕާޓީން ބުނެއެވެ. އަދީބު ސިންގަޕޫރަށް ދަތުރު ކުރައްވަނީ މޯލްޑިވްސް ކަރެކްޝަނަލް ސާވިސް އަދި ފުލުހުންގެ ސެކިއުރިޓީންގެ ބެލުމުގެ ދަށުން ކަމަށްވެސް އެޕާޓީން ބުނެއެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި 2015 އިން 2018 އަށް އަދީބަށް ނުހައްގުން އަނިޔާދީ ބޭސްފަރުވާ އަށް ހުރަސް އަޅާފައިވާ ކަމަށާ އަދީބުގެ ސިއްހީ ހާލަތު ގޯސްވެ އެކި ބަލިތައް ޖެހިވަޑައިގަތީ އެ ދުވަސްވަރު ކަމަށް ވެސް އެ ޕާޓީން ބުނެފައިވެއެވެ. އެމްޓީޑީން ވަނީ ކުރީ ސަރުކާރުން އަދީބާމެެދު އެފަދަ ގޮތަކަށް އަމަލު ކުރި ނަމަވެސް ރައީސް އިބްރާހިމް މުހައްމަދު ޞާލިހުގެ ސަރުކާރުން އަދީބު އަށް އެކަށީގެންވާ ބޭސްފަރުވާ ލިބުމަށް އިންސާފުވެރި މަގެއް ފަހިކޮށްދީފައިވާ ކަމަށް ގަބޫލުކުރާ ކަމަށް ބުނެފައެވެ. ކޮންމެ މީހަކަށް ވެސް އެމީހެއްގެ ސިޔާސީ ފިކުރަކަށް ބެލުމެއް ނެތި ފެންވަރު ރަނގަޅު ސިއްހީ ފަރުވާ ލިބުމަކީ އަސާސީ ހައްގެއްކަމަށް އެޕާޓީން ބުނެއެވެ.
އަދީބަށް ހުއްދަ ދީފައިވަނީ 10 ދުވަހަށް ރާއްޖެއިން ބޭރަށް ވަޑައިގެންނެވުމަށެވެ. ކަރެކްޝަންސްއިން ކުރި ޓްވީޓެއްގައި ބުނީ ރާއްޖޭގައި ހެދެން ނެތް ޓެސްޓްތަކެއް ހެދުމަށް ރާއްޖޭން ބޭރަށް ފުރުމުގެ ހުއްދަ މެޑިކަލް ބޯޑުގެ ލަފައާއެކު އެ އިދާރާއިން އަދީބަށް ދީފައިވާކަމަށެވެ. ކަރެކްޝަންސްއިން ބުނީ އަދީބު ރާއްޖެއިން ބޭރުގައި ހުންނަވާ މުއްދަތުގައި އެ އިދާރާއިންނާއި، ދިވެހި ފުލުހުންގެ ޚިދުމަތާ ގުޅިގެން މޮނީޓަރު ކުރަމުން ގެންދާނެ ކަމަށެވެ.
ދާދި ފަހުން އަދީބުގެ ހާލުކޮޅު ސީރިއަސްވެ، އައިޖީއެމްއެޗްގައި ވަނީ ފަރުވާ ދީފައެވެ.
އެމްއެމްޕީއާރްސީގެ ކޮރަޕްޝަން މައްސަލާގައި އަދީބަށް 20 އަހަރުގެ ޖަލު ހުކުމެއް އިއްވައި، ދެ މިލިއަން ރުފިޔާއިން ޖޫރިމަނާ ކުރީ 2020 ވަނަ އަހަރުއެވެ. އެކަމަކު ދައުލަތާ އެކު ހެދި އިއުތިރާފު އެއްބަސްވުމާ އެކު އެ ހުކުމަށް ފަހު އަދީބު، ޖަލު ބަންދުން، ގޭބަންދަށް ބަދަލުކުރީ ސިއްހީ ހާލަތު ހުރި ގޮތުން ކަމަށް ބުނެއެވެ.
