ބާސެލޯނާގެ އައު ކެޕްޓަނަކަށް ޑިފެންޑަރު ސާޖިއޯ ރޮބާޓޯ ހަމަޖައްސައިފި އެވެ.

ބާސެލޯނާގެ ލަމާސީއާއިން ތަމްރީނުވެ، ސީނިއާ ޓީމާ 2010 ވަނަ އަހަރު ގުޅުނު ކުޅުންތެރިޔާ އަށް ކެޕްޓަންކަން ދިނީ ފާއިތުވެދިޔަ ދެ ސީޒަނުގައި ކެޕްޓަންކަން ކުރި ސާޖިއޯ ބުސްޓެކްޓް ޓީމު ދޫކޮށްލުމުންނެވެ.

އުމުރުން 31 އަހަރުގެ ރޮބާޓޯ ގިނަ ބަޔަކު ފާހަގަކުރަނީ ޗެމްޕިއަންސް ލީގުގައި ޕީއެސްޖީ އަތުން 4-0ގެ ފަހަތުގައި އޮއްވައި ދެ ވަނަ ލެގުގައި 6-5އިން ބާސެލޯނާ މޮޅުކޮށްދިން ލަނޑު ފަހު ވަގުތުގައި ޖަހައިދިން ކުޅުންތެރިޔާގެ ގޮތުގަ އެވެ. ނަމަވެސް އޭނާގެ އަގު އެކަށީގެންވާ ގޮތަކަށް ވަޒަން ނުކުރާކަމަށް ބުނެ ރޮބާޓޯ ވަނީ މީގެ ކުރިން ހިތްހަމަނުޖެހުން ފާޅުކޮށްފަ އެވެ.

ބާސެލޯގެ ވައިސް ކެޕްޓަނުންގެ ގޮތުގައި ތިން ކުޅުންތެރިން ތިބެ އެވެ. މި ގޮތުން ފުރަތަމަ ވައިސް ކެޕްޓަނަކަށް ހުންނާނީ ގޯލްކީޕަރު މާކް އަންދްރޭ ޓާސްޓެގަން އެވެ. އަނެއް ދެ ވައިސް ކެޕްޓަނުން އަދި ހަމަނުޖައްސަ އެވެ. މިމަގާމަށް ވާދަކުރަނީ ފްރޭންކީ ޑިޔޮންގާއި ޕެޑްރީ އަދި އޮސްމާނޭ ޑެމްބެލޭ އެވެ. ޓީމުގައި ހޭދަކުރި މުއްދަތާއި ސީނިއަރިޓީ އަށް ބަލާއިފައި މީގެ ފަހަތުން ދެން އަންނަ ނަންތަކަކީ ރޮބަޓް ލެވޮންޑޯސްކީ އާއި ރޮނަލްޑް އަރައުހޯ އެވެ.