ފޮރިން މިނިސްޓަރ ޝާހިދު، ރަސްމީ ދަތުރުފުޅެއްގައި އިންޑިއާއަށް
10 ޖުލައި 2023 | ހޯމަ 12:30ރަސްމީ ހަރަކާތްތައް ކުރިއަށްދާނީ މި ހިނގާ ޖުލައި މަހުގެ 11 އަދި 12 ދުވަހު
މިނިސްޓަރު ޝާހިދުއާއި އިންޑިއާގެ އެކްސްޓަރނަލް އެފެއަރޒް މިނިސްޓަރު
ފޮރިން މިނިސްޓަރު އަބްދުﷲ ޝާހިދު ރަސްމީ ދަތުރުފުޅެއްގައި އަވައްޓެރި އިންޑިއާއަށް ފުރާވަޑައިގެންފިއެވެ.
އެކަމާ ގުޅޭގޮތުން ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ ފޮރިން މިނިސްޓަރު އިންޑިއާއަށް ކުރައްވާ މި ދަތުރުފުޅަކީ އިންޑިއާގެ އެކްސްޓަރނަލް އެފެއަރޒް މިނިސްޓަރު، ޑރ. އެސް ޖައިޝަންކަރުގެ ޚާއްސަ ދައުވަތަކަށް ކުރައްވާ ދަތުރުފުޅެއް ކަމަށެވެ. އަދި މި ދަތުރުފުޅަކީ އިންޑިއާގެ ނިއުދިއްލީއަށް ކުރައްވާ ރަސްމީ ދަތުރުފުޅެއް ކަމަށްވެސް ވަނީ ބުނެފައެވެ.
މިނިސްޓަރުގެ މި ދަތުރުފުޅުގައި ކުރިއަށްދާ ރަސްމީ ހަރަކާތްތައް ކުރިއަށްދާނީ މި ހިނގާ ޖުލައި މަހުގެ 11 އަދި 12 ދުވަހު ކަމަށްވެސް ފޮރިން މިނިސްޓްރީން ވަނީ ބުނެފައެވެ.
މީގެ އިތުރުން މި ދަތުރުފުޅުގައި، ދެ ގައުމުގެ ދެމެދުގައި އެކި ދާއިރާތަކުން ގުޅުން ބަދަހިކުރުމާއި، ރާއްޖޭގައި ކުރިއަށްދާ ތަރައްގީގެ މަޝްރޫއުތަކާއި، ބައިނަލްއަގުވާމީގޮތުން ގުޅުން ބަދަހިކުރުމާމެދު މަޝްވަރާކުރާނެއެވެ. އަދި ދެ ގައުމުގެ ޚާރިޖީ ވަޒީރުންގެ މެދުގައި ރަސްމީ މަޝްވަރާތައް ބޭއްވުމަށް ވަނީ ތާވަލްކޮށްފައެވެ. ފޮރިން މިނިސްޓްރީން ބުނީ، މި ދަތުރުފުޅުގައި، ރާއްޖެއަށް އިޖްތިމާއީ ދާއިރާއިންނާއި އިގްތިސާދީ ދާއިރާއިން އެހީތެރިކަން ފޯރުކޮށްދިނުމާ ގުޅޭ މުހިންމު އެއްބަސްވުންތަކެއްގައި ސޮއިކުރެއްވުމަށްވެސް ހަމަޖެހިފައިވާ ކަމަށެވެ.
