ށ. ފީވައް، ފޭދޫ އަދި ފޯކައިދޫގައި ފަތާ ސަރަހައްދެއް ގާއިމްކުރަން އެމްޓީސީސީއާ ހަވާލުކޮށްފި
މިއީ 16.61 މިލިއަން ރުފިޔާގެ މަޝްރޫއެއް
ފަތާ ސަރަހައްދެއް ގާއިމްކުރުމުގެ މަސައްކަތް ހަވާލުކުރުން
ށ. ފީވައް، ށ. ފޭދޫ އަދި ށ. ފޯކައިދޫގައި ފަތާ ސަރަހައްދެއް ގާއިމްކުރުމުގެ މަޝްރޫއު ސަރުކާރުން އެމްޓީސީސީއާއި ހަވާލުކޮށްފިއެވެ.
މި މަޝްރޫޢު ހަވާލުކުރުމަށް ހޯމަ ދުވަހު ބޭއްވި ރަސްމިއްޔާތުގައ،ި އެމްޓީސީސީގެ ފަރާތުން ސޮއިކުރެއްވީ ޗީފް އޮޕަރޭޓިންގ އޮފިސަރު ޝާހިދު ހުސައިން މޫސާއެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރުގެ ފަރާތުން ސޮއިކުރެއްވީ ޑިރެކްޓަރު ޖެނެރަލް ފާތިމަތު ޝާނާ ފާރޫގެވެ.
މި މަޝްރޫއާއެކު ށ. އަތޮޅު ފީވައ،ް ފޭދޫ އަދި ފޯކައިދޫގައި އަމާން ހިތްގައިމު ފަތާ ސަރަހައްދެއް މުސްތަޤުބަލުގައި ޤާއިމްވެގެންދާނެ ކަމަށް އެމްޓީސީސީން ބުނެއެވެ.
މިގޮތުން މި މަޝްރޫއުގެ ދަށުން 2،500 އަކަމީޓަރުގެ ފަތާ ސަރަހައްދެއް ށ. ފީވަކުގައި ޤާއިމްކުރުމަށް 97 މީޓަރުގެ ބޭރު ތޮއްޓެއް ލުމާއި އަދި 50 މީޓަރުގެ ގްރޮއިންސް ޖެހުމުގެ މަސައްކަތް ކުރުން ހިމެނެއެވެ. އަދި 1,620 އަކަމީޓަރުގެ ފަތާ ސަރަހައްދ ށ. ފޭދޫގައި ޤާއިމްކުރުމަށް 62 މީޓަރުގެ ބޭރު ތޮއްޓެއް ލުމާއި އަދި 50 މީޓަރުގެ ގްރޮއިންސްޖެހުމުގެ މަސައްކަތް ކުރުންވެސް ހިމެނެއެވެ. އަދި، 2,100 އަކަމީޓަރުގެ ފަތާ ސަރަހައްދެއް ށ. ފޯކައިދޫގައި ޤާއިމްކުރުމަށް 101.56 މީޓަރުގެ ބޭރު ތޮއްޓެއް ލުމާއި އަދި 40 މީޓަރުގެ ގްރޮއިންސްޖެހުމުގެ މަސައްކަތް ކުރުންވެސް ހިމެނެއެވެ.
މި މަޝްރޫޢަކީ 16.61 މިލިއަން ރުފިޔާއަށް 210 ދުވަސް ތެރޭ ނިންމުމަށް އެމްޓީސީސީއާ ހަވާލުކޮށްފައިވާ މަޝްރޫޢުއެކެވެ.
