އޯގަސްޓު މަސް ނިމެންވާއިރަށް ސީރިއާގައި ތާށިވެފައި ތިބި އާއިލާތައް ރާއްޖެ ގެންނަނީ

ސީރިޔާގައި ޙާލުގައި ޖެހިފައި ތިބި އާއިލާތައް އޯގަސްޓު މަސް ނިމެންވާއިރަށް ރާއްޖެ ގެނެވޭނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު ވިދާޅުވެއްޖެއެވެ.

އާދީއްތަ ދުވަހު ކޮމަންޑޫއަށް ވަޑައިގެން ދެއްކެވި ވާހަކަފުޅުގައި ރައީސް ވިދާޅުވީ، ސީރިއާގައި އެކަނިވެރިވެފައިވާ ދިވެހި މައިންނާއި ދަރިން އެބަތިބި ކަމަށާއި، އެ މީހުން ގެނައުމުގެ މަސައްކަތް ސަރުކާރުން ކުރަމުންދާ ކަމަށެވެ.

ރައީސް ވިދާޅުވީ، އެ މަސައްކަތް ކުރިއަށް އޮތް އޯގަސްޓު މަސް ނިމެންވާއިރަށް ކުރައްވާނެ ކަމަށާއި، އެ އާއިލާތަށް ރާއްޖެއަށް ގެނެސްދެއްވާނެ ކަމަށެވެ.

ރައީސް ވިދާޅުވީ، 100 އެތައް މީހުންނެއް ހަނގުރާމައަށް ގޮސްފައިވާއިރު، އޭގެ ތެރެއިން 70 ދިވެއްސަކު ސީރިއާ ހަނގުރާމައިގައި މަރުވެފައިވާ ކަމަށެވެ.

ސީރިޔާއަށް ހަނގުރާމައަށް ދިޔަ ދިވެހިންގެ ތެރެއިން މިހާރު ސީރިޔާގައި ތިބި ދިވެހިން ބޭރުގެ އެހެން ދަޢުލަތަކާއި ގުޅިގެން ރާއްޖެ ގެނެސް ރިހިބިލިޓޭޓް ކުރުމުގެ މަސައްކަތް ކުރިޔަށް ގެންދެވޭނެ ކަމަށް ސަރުކާރުން ބުނެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ ސީރިޔާގެ ހަނގުރާމަ އަށް ފަހު، އެކި ކޭމްޕްތަކުގައި ޙަލުގައި ޖެހިފައި ތިބި ދިވެހިން އަނބުރާ ރާއްޖެ ގެނައުމުގެ މަސައްކަތް ކުރައްވާ ކަމަށެވެ. އަދި އެމީހުން ރިހިބިލިޓޭޓް ކުރުމަށް އެކަމާބެހޭ ތަނެއް ރާއްޖޭގައި ހަދާ ބޭރު ޤައުމުތަކުގެ އެހީ އާއެކު އެކަން ކުރައްވާނެ ކަަމަށް ރައީސް ޞާލިހު ވިދާޅުވިއެވެ.