ބާސެލޯނާއިން ހޯދުމަށް މަސައްކަތްކުރި، ފެނަރްބާޗޭގެ އުމުރުން 18 އަހަރުގެ މިޑްފީލްޑަރު އަރްޑާ ގުލާ ރެއާލް މެޑްރިޑަށް ސޮއިކޮށްފިއެވެ.

ގުލާގެ ރިލީޒް ކްލޯޒް ގެ ގޮތުގައި 17.5 މިލިއަން ޔޫރޯ ކަނޑައަޅާފައި ވީނަމަވެސް، ރެއާލް މެޑްރިޑުންވަނީ އެ ޓްރާންސްފާ ފީ ދައްކައި، ކުޅުންތެރިޔާ ގެނައުމުގެ މަސައްކަތް ކާމިޔާބުކޮށްފައެވެ. ހަ އަހަރު ދުވަހުގެ އެއްބަސްވުމެއްގައި ސޮއިކޮށްފައިވާއިރު، ހުކުރު ދުވަހު އޭނާ ވަނީ ރެއާލް މެޑްރިޑުގެ ކުޅުންތެރިއެއްގެ ގޮތުގައި ދައްކާލާފައެވެ.

ގުލާ ވަނީ މިދިޔަ ސީޒަނުގައި ފެނަބާޗޭއަށް 35 މެޗު ކުޅެދީ، ހަ ލަނޑު ކާމިޔާބުކޮށް ހަތް ލަނޑު ޖެހުމަށް އެހީތެރިވެ ދީފައެވެ.

ރިޕޯޓުތައް ދައްކާގޮތުން ރެއާލް މެޑްރިޑުން ވަނީ 2021 ވަނަ އަހަރުން ފެށިގެން މި ކުޅުންތެރިޔާއަށް ފާރަލާން ފަށާފައެވެ. މިކަމުގައި އެންމެ އިސްކޮށް ހަރަކާތްތެރިވީ މެޑްރިޑްގެ ޗީފް ސްކައުޓް ޖޫނީ ކަލަފާތެވެ.

ގުލާ އޭނާގެ އާ ޓީމާއެކު ޕްރީސީޒަން ހޭދަކުރަން ގަސްދުކުރި ނަމަވެސް، ތަޖުރިބާ ހޯދުމަށް ލޯނު އުސޫލުން އެހެން ޓީމަކަށް ފޮނުވާނެކަމަށް ބެލެވެއެވެ.

ރެއާލް މެޑްރިޑުގެ ވަރުގަދަ މިޑްފީލްޑް ލައިނުގައި ބެލިންހަމްއާއި ކަމަވިންގާއާއި ޗުއާމެނީގެ އިތުރުން ތަޖުރިބާކާރު މޮޑްރިޗާއި ކްރޫސް ހިމެނެއެވެ.