އާރްޓީއެލް ފެރީގެ ޚިދުމަތް ރައްޔިތުން އެންމެ ގިނައިން ބޭނުންކުރަނީ ސިއްހީ ފަރުވާ ހޯދަން ރަށްރަށަށް ދިޔުމަށް
7 ޖުލައި 2023 | ހުކުރު 11:28ދަތުރުފަތުރުގެ ފަސޭހަ ނިޒާމެއް ނެތް ރަށްތަކުގެ ރައްޔިތުން އާރްޓީއެލް ފެރީގެ ހިދުމަތް ބޭނުންކުރާ މިންވަރު އިތުރު
ޅ އަތޮޅުގައި އާރުޓީއެލް ފެރީ ދަތުރުތައް ފެށުން
އާރްޓީއެލް ފެރީގެ ހިދުމަތް ރައްޔިތުން އެންމެ ގިނައިން ބޭނުންކުރަނީ ސިއްހީ ފަރުވާ ހޯދަން އެކި ރަށްރަށަށް ދިޔުމަށް ކަމަށާއި އަދި އެކި ރަށްރަށަށް އަސާސީ ބޭނުމަށް ދިޔުމަށް ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް ވިދާޅުވީ ވަރަށް ދުރުގައި ހުރި، ދަތުރުފަތުރުގެ ފަސޭހަ ނިޒާމެއް ނެތް ރަށްތަކުގެ ރައްޔިތުން އާރްޓީއެލް ފެރީގެ ހިދުމަތް ބޭނުންކުރާ މިންވަރު އިތުރުކަން ފާހަގަކުރެވުނު ކަމަށާއި އެގޮތުން ހއ. މަކުނުދޫއިން 50 ސީޓު ފުލްކޮށް ދަތުރުކުރާތަން ފެނިގެންދާ ކަމަށެވެ.
ރައްޔިތުންގެ ލަފާ ހޯއްދަވައިގެން ފެރީގެ ޝެޑިއުލަށް ގެނެވޭ ބަދަލު ވެސް ރައްޔިތުންނަށް ފަސޭހަ ގޮތަކަށް ކުރިއަށް ގެންދިޔުމަށް މަސައްކަތް ކުރާ ކަމަށް ވިދާޅުވިއެވެ. އަދި މި ސަރުކާރުގެ އަމާޒަކީ ރައްޔިތުން ބޭނުންވާ ގޮތަށް ކޮންމެ ހިދުމަތެއްވެސް ދިނުން ކަމަށް އާޒިމް ވިދާޅުވިއެވެ.
އާޒިމް މިހެން ވިދާޅުވެފައިވާއިރު އެމްޓީސީސީން މިހާތަނަށް ހއ. ހދ. ށ އަދި ޅ އަތޮޅުގައި އާރްޓީއެލް ފެރީގެ ހިދުމަތް ފަށާފައިވެއެވެ. އަދި ހުވަދޫ އަތޮޅުގައި އާރްޓީއެލް ފެރީގެ ޓެސްޓް ދަތުރުތައް މި މަހުގެ 13 ވަނަ ދުވަހު ފެށުމަށް ވަނީ ހަމަޖެހިފައެވެ.
މި ހިދުމަތް ހުވަދޫ އަތޮޅުގައި ފަށާނީ ގދ. އަދި ގއ. އަތޮޅުގެ ހުރިހާ ރަށެއްގައެވެ. ރައްޔިތުން އަހުލުވެރިކުރުވުމުގެ މި ދަތުރުތައް އެއް ހަފްތާއަށް ކުރިއަށްދާއިރު ދަތުރުތައް ހިލޭ ކުރެވޭނެއެވެ.
ހުވަދޫ އަތޮޅުގައި އާރްޓީއެލް ފެރީގެ ހިދުމަތް ފެށުމަށް ފެރީތައް ފުރުމަށް އޮތް ހަރަކާތުގައި ވާހަކަ ދައްކަވަމުން އާޒިމް ވިދާޅުވީ އެ އަތޮޅުގައި 80 މުވައްޒަފުން ލޯންޗު އޮޕަރޭޓް ކުރުމަށް ނަގާ ކަމަށެވެ. އަދި އެ މުވައްޒަފުންނަށް ބޭނުންވާ ޓްރެއިނިންގ ދިނުމުގެ މަސައްކަތް ގދ. ތިނަދޫގައި މިހާރު ކުރިއަށްދާ ކަމަށެވެ. މި ސަރުކާރުގެ އަމާޒަކީ ރައްޔިތުންނަށް ދަތުރުފަތުރުގެ ލުއިފަސޭހަ ނިޒާމެއް ޤާއިމުކޮށްދިނުމަށް ކަމަށް ވެސް ވިދާޅުވިއެވެ.
މި މަހުގެ 20 ވަނަ ދުވަހުން ފެށިގެން ރަސްމީކޮށް ހިދުމަތް ފެށިގެންދާނެ ކަމަށް ވެސް ވިދާޅުވިއެވެ. މަޝްރޫއުގެ ފުރަތަމަ ފިޔަވަހީގެ ދަށުން ހއ، ހދ، އަދި ށ އަތޮޅު ހިދުމަތް ފަށާފައިވާއިރު ދެވަނަ ފިޔަވަހީގެ މަސައްކަތް މިހާރު ދަނީ ކުރިއަށެވެ. އެގޮތުން ދެވަނަ ފިޔަވަހީގެ ދަށުން ނ، ރ، ބ، ޅ، ގއ، ގދ، ޏ އަދި ސ އަތޮޅު ހިދުމަތް ފެށިގެންދާނެއެވެ. ތިންވަނަ ފިޔަވަހީގެ ދަށުން ކ، އއ، އދ، ވ، މ، ފ، ދ، ތ އަދި ލ ގުޅާލުމަށް ވަނީ ނިންމާފައެވެ.
