އައްޑޫ ސިޓީގައި ޑެންގީ ހުން އިތުރުވަނީ، ސަމާލުވޭ
7 ޖުލައި 2023 | ހުކުރު 03:57ޑެންގީ ހުން މިހާރަށްވުރެ އިތުރަށް ފެތުރިގެން ދިއުމަކީ އެކަށީގެންވާ ކަމެއް
އައްޑޫ އެކުއެޓޯރިއަލް ހޮސްޕިޓަލް
އައްޑޫ ސިޓީގައި ޑެންގީ ހުން އިތުރުވަމުންދާ ކަމަށާއި، ސަމާލުވާންޖެހޭ ކަމަށް އައްޑޫ އެކުއެޓޯރިއަލް ހޮސްޕިޓަލުން (އޭއީއެޗް) ބުނެފިއެވެ.
އޭއީއެޗުން ބުނީ ތަފާސްހިސާބުތަކުން ދައްކާގޮތުން މިދުވަސްވަރު ޑެންގީ ހުން ޖެހޭ މިންވަރު އިތުރުވަމުންދާތީ ރައްޔިތުން މިކަމަށް ޚާއްސަ ސަމާލުކަމެއް ދޭން ޖެހޭ ކަމަށެވެ.
އޭއީއެޗުން ބުނީ މިދުވަސްވަރަކީ ވިއްސާރަ މޫސުމަށް ވުމާއި ގުޅިގެން ޑެންގީ ހުން މިހާރަށްވުރެ އިތުރަށް ފެތުރިގެން ދިއުމަކީ އެކަށީގެންވާ ކަމެއް ކަމަށާއި، ޑެންގީ ހުމުން ރައްކާތެރިވުމުގެ ފިޔަވަޅުތައް ދުރާލާ އެޅުމާއި މަދިރި މަދުކުރުމަށް ފަރުދީ ފެންވަރުގައި މަސައްކަތް ކުރަންޖެހޭ ކަމަށެވެ.
މީގެ އިތުރުން އޭއީއެޗުން ވަނީ ފެން ހަރުލާތަކެތި ގޯތިތެރޭގައި މަގުމައްޗަށް އުލާނުލުމަށާއި ޑެންގީ ފަތުރާ މަދިރި އާލާވުމަށް މަގުފަހިވާ މިފަދަ ތަކެތި ނައްތާލުމަށް އިލްތިމާސްކޮށްފައެވެ. މަދިރިން ރައްކާތެރިވުމުގެ ގޮތުން ހަށިގަނޑު ރަނގަޅަށް ނިވާވާ ގޮތަށް ހެދުން އެޅައި، މަދިރި ލޯޝަން ނުވަތަ ސްޕްރޭ ފަދަ ތަކެތި ބޭނުންކުރުމަށް އިރުޝާދު ދީފައެވެ. އަދި ހެނދުނު އިރުއަރާ ގަޑީގައި އަދި ހަވީރުއިރު އޮއްސޭ ވަގުތު ގޭގެ ދޮރުތައް ލައްޕާފައި ބެހެއްޓުމަށް އެދިފައިވެއެވެ.
ޑެންގީ ހުމުގެ އަލާމަތްތަކުގެ ތެރޭގައި ހުން އައުން، ބޮލުގައި ރިއްސުން، ލޮލުގައި ރިއްސުން، ހަމުގައި ކުދި ރަތް ބިހިތަކެއް ނެގުން އަދި ގައިގައި ރިއްސުން ހިމެނެއެވެ.
ހުންއަންނަނަމަ ޕެރެސެޓެމޯލް ނުވަތަ ޕެނަޑޯލް ފިޔަވައި އެހެން ބޭހެއް ބޭނުން ނުކުރުމަށް އިލްތިމާސްކޮށް އޭއީއެޗުން ބުނީ 3 ދުވަހަށްވުރެ ގިނަ ދުވަސް ހުން ތިރިނުވެ ދިގުލައިގެން ގޮސްފިނަމަ ސިއްހީ އެހީތެރިއެއްގެ ލަފައާއި އިރުޝާދު ހޯދަންޖެހޭ ކަމަށެވެ. އަދި މިފަދަ އަލާމާތްތައް ފެންނަ ނަމަ ގިނައިން ދިޔާ ތަކެތި ބޭނުންކުރުމާއެކު އަރާމުކުރުމަށް އިލްތިމާސްކޮށްފައިވެއެވެ.
