ޕީއެސްޖީގެ ކޯޗަކަށް ލުއިސް އެންރީކޭ ހަމަޖައްސައިފި

ޕެރިސް ސެއިންޓް ޖާމަން (ޕީއެސްޖީ) ގެ ކޯޗަކަށް ލުއިސް އެންރީކޭ ހަމަޖައްސައިފިއެވެ.

ކްރިސްޓޮފް ގަލްޓިއާގެ ބަދަލުގައި ފްރާންސްގެ ޗެމްޕިއަނުން ބާސެލޯނާ އާއި ސްޕެއިންގެ ކުރީގެ ކޯޗު ލުއިސް އެންރީކޭ ހަމަޖެއްސިއިރު، ބަޔާންގެ ކުރީގެ ކޯޗު، ހޫލިއަން ނާގެލްސްމަން ހޯދުމަށްވެސް މަޝްވަރާކުރިއެވެ.

ކުލަބުގެ ރައީސް، ނާސިރު އަލް ޚަލައިފީ ވިދާޅުވީ ލުއިސް އެންރީކޭ އައުމަކީ އައު ސްޓައިލަކާ އެކު އައު ފެށުމެއް ކަމަށެވެ. އެންރީކޭ ވަނީ ރޯމާ، ސެލްޓަ ވީގޯ އަދި ބާސެލޯނާއަށް ކޯޗުކޮށްދީފައެވެ. އޭނާގެ އެންމެ ފާހަގަކޮށްލެވޭ ކާމިޔާބީ އަކީ 2015 ވަނަ އަހަރު ބާސާ އާއެކު ކާމިޔާބުކުރި ޓްރެބަލް އެވެ.

2017 ވަނަ އަހަރު އޭނާ ވަނީ ބާސާ ދޫކޮށް، އަމިއްލަ ސަބަބުތަކަކަށް ޓަކައި ބްރޭކެއް ނަގާފައެވެ. އޭގެ ފަހުން، ސްޕެއިންގެ ޓީމާ ހަވާލުވެ 2020-21 ވަނަ އަހަރުގެ ޔުއެފާ ނޭޝަންސް ލީގުގެ ރަނަރަޕްކަން އެ ގައުމަށް ހޯދައިދިނެވެ. އޭނާ އަކީ މިދިޔަ އަހަރުގެ ވޯލްޑް ކަޕުގައިވެސް ސްޕެއިންގެ ކޯޗެވެ. ނަމަވެސް ސްޕެއިން ވަނީ ގަދަ 16 އިން ކަޓާފައެވެ.

އެންރީކޭ ޕީއެސްޖީ އާ ހަވާލުވަނީ އެ ޓީމަށް އުނދަގޫ ދަނޑިވަޅެއްގައެވެ. މެސީ އާއި ސާޖިއޯ ރާމޯސް ޓީމު ދޫކޮށްލާފައިވާއިރު، އެމްބާޕޭ ވެސް ވަނީ ޓީމު ދޫކޮށްލާނެ ކަމުގެ އިޝާރާތެއް ކޮށްފައެވެ.

ޕީއެސްޖީން މި ސީޒަނުގައި ރެކޯޑް މުގުރާލައި 11 ވަނަ ފަހަރަށް ލީގު ތަށި އުފުލާލި ނަމަވެސް ޗެމްޕިއަންސް ލީގުގެ ގަދަ 16 އިން މާޔޫސްކަމާއެކު ކަޓައިގެން ދިއުމުން ކޯޗު ކްރިސްޓޮފް ގަލްޓިއާ ވަނީ މަގާމުން ވަކިކޮށްފައެވެ.