މި މަހުގެ ފަހުކޮޅު ފަތުރުވެރިންނަށް ޚާއްސަ ކޮށްގެން ސަގާފީ ޢީދެއް ފަށަނީ
4 ޖުލައި 2023 | އަންގާރަ 01:03މި ފެސްޓިވަލަށް ހާއްސަކޮށްގެން ރާއްޖެއަށް އަންނަން ބޭނުންވާ ވަރު ކުރުމަކީ މަގުސަދެއް
ޓޫރިޒަމް މިނިސްޓަރު ޑރ. އަބްދުﷲ މައުސޫމް
ރާއްޖެ އަންނަ ފަތުރުވެރިންނަށް ދިވެހިންގެ ސަގާފަތް ދައްކުވައިދިނުމަށް މި މަހުގެ ފަހުކޮޅު ސަގާފީ ޢީދެއް ފަށަން ތައްޔާރުވަމުން އަންނަ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
މައުސޫމް މިކަން ހާމަކުރެއްވީ "ރާއްޖެޓީވީ" ގެ ފަލަސުރުހީ ޕްރޮގްރާމުގައި ވާހަކަދައްކަވަމުންނެވެ. އެގޮތުން، މި "ކަލްޗުރަލް ފެސްޓިވަލް" ނުވަތަ ސަގާފީ ޢީދަކީ ރާއްޖޭގެ ފަތުރުވެރިކަމުގެ ދުވަސް ފާހަގަކުރުމަށް ކުރިއަށްގެންދާ ހަރަކާތްތަކުގެ ތެރެއިން ހަރަކާތެއްކަން އޭނާ ފާހަގަކުރެއްވިއެވެ.
ރާއްޖޭގައި މިހާރު ފާހަގަކުރަނީ ފަތުރުވެރިކަމުގެ ހަފުތާ އެެއްކަން ފާހަގަކުރައްވައި މައުސޫމް ވިދާޅުވީ 27 ސެޕްޓެމްބަރުން ފެށިގެން 3 އޮކްޓޯބަރާ ހަމައަށް ގިނަ ހަރަކާތްތަކެއް ރޭވިފައި ހުރި ނަމަވެސް އަހަރުގެތެރޭގައި ވެސް އިތުރު ހަރަކާތްތައް ކުރިއަށްގެންދާނެ ކަމަށެވެ. އެގޮތުން، ރާއްޖޭގެ ރަށްތަކުގެ ސަގާފަތަކީ ފަތުރުވެރިން ތަޖުރިބާކޮށްލަން ބޭނުންވާ ޝައުގުވެރި ކަމެއްކަމަށާއި އެހެންވެ، މި މަހުގެ ފަހުކޮޅު ކުރިއަށްގެންދާ ސަގާފީ ޢީދަކީ އެކި ރަށްތަކުގެ ސަގާފަތް ތަޖުރިބާ ކޮށްލުމުގެ ފުރުސަތު ފަތުރުވެރިންނަށް ދިނުމަށް ކުރިއަށްގެންދާ ހަރަކާތެއް ކަމަށެވެ.
މި ހަރަކާތް ކުރިއަށްގެންދިއުމަށް ނިންމާފައިވަނީ ހުޅުމާލެ ސެންޓްރަލް ޕާކުގައެވެ. ސަގާފީ ޢީދު މިއަހަރު ފަށާއިރު ކުރިއަށް އޮތް އަހަރުތަކުގައި މި ހަރަކާތް އިތުރަށް ފުޅާވެ، ދެމެހެއްޓެނިވި ގޮތެއްގައި ހަރަކާތް ކުރިއަށްދާނެ ކަމަށް އުއްމީދު ކުރައްވާ ކަމަށާއި ފަތުރުވެރިން މި ފެސްޓިވަލަށް ހާއްސަކޮށްގެން ރާއްޖެއަށް އަންނަން ބޭނުންވާ ވަރު ކުރުމަކީ މަގުސަދެއް ކަމަށްވެސް މިނިސްޓަރު ވިދާޅުވިއެވެ.
މައުސޫމް ވިދާޅުވި ގޮތުގައި ރާއްޖޭގެ 118 ރަށުގައި މިހާރު ފަތުރުވެރިކަން ވަނީ ފުޅާވެފައެވެ. ނަމަވެސް ބައެއް ރަށްތަކުގައި އަދިވެސް ފަތުރުވެރިކަން ރަނގަޅަށް ނުހިނގާ ކަމަށާއި އެ ރަށްތަކުގައި ވެސް ފަތުރުވެރިކަން ކުރިއަރައިގެންދާނީ މަސައްކަތް ހުއްޓާނުލައި ކުރިއަށްގެންދިއުމުން ކަން އޭނާ ފަހަގަކުރެއްވިއެވެ. އަދި އެފަދަ ރަށްތަކުގައި ފަތުރުވެރިކަމުގެ ވިޔަފާރިތައް ފުޅާ ކުރުމަށް މަސައްކަތް ކުރަމުން އަންނަ ފަރާތްތަކަށް މިނިސްޓަރު ޝުކުރު އަދާ ކުރެއްވިއެވެ.
މީގެ އިތުރުން މިހާރު ސަރުކާރުން ރަށްތަކުގައި ކުރިއަށްގެންދާ ތަރައްގީގެ މަޝްރޫއުތަަކާއެކު ރަށްތަކަށް ފަތުރުވެރިކަން އިތުރަށް ފުޅާވެގެންދާނެ ކަމަށް ވެސް މިނިސްޓަރ މައުސޫމް ވިދާޅުވިއެވެ.
