އެމެރިކް ލަޕޯޓް ގަތުމަށް އާސެނަލް ބިޑްކުރަނީ

މެންޗެސްޓާ ސިޓީ އަށް ކުޅެމުން އަންނަ ސްޕޭން ޑިފެންޑަރު އެމެރިކް ލަޕޯޓް ގަތުމަށް އާސެނަލްއިން ބިޑްކުރަން ތައްޔާރުވެއްޖެ އެވެ.

އާސެނަލްއިން 29 އަހަރުގެ ފްރާންސްގެ ކުރީގެ ޑިފެންޑަރު ގަތުމަށް މަސައްކަތް ފެށީ އޭނާ ދޫކޮށްލަން ސިޓީން ވެސް ބޭނުންވުމުންނެވެ. ސަބަބަކީ ފުރަތަމަ 11ގެ ވާދަވެރިކަން ބޮޑުވެފައި ލަޕޯޓް އަށް ގަވާއިދުން ކުޅެން ފުރުސަތު ނުދެވޭތީވެ ކުޅުންތެރިޔާގެ ވެސް އެދުމުގެ މަތީންނެވެ. ނަމަވެސް އޭނާ ވިއްކާނެ އަގެއް ސިޓީން އަދި ނުނިންމަ އެވެ.

ލަޕޯޓް ސިޓީ ދޫކޮށްލަން ބޭނުންވި ދެވަނަ ސަބަބަކީ އެކުލަބުން ކްރޮއޭޝިޔާގެ ޑިފެންޑަރު ގަވަޑިއޯލް ގަތުމަށް މަސައްކަތް ފެށުމެވެ. ޖަރުމަނުގެ ލައިޕްޒިގަށް ކުޅޭ ޑިފެންޑަރު ގެނެސްފިނަމަ ލަޕޯޓް އަށް މިދިޔަ ސީޒަނުގައި ލިބުނު ވަރަށް ވެސް ކުޅެން ފުރުސަތު ނުލިބޭނެއެވެ. ސަބަބަކީ ޖޯން ސްޓޯންސް އާއި ރުބެން ޑިއާޒް އަދި ނަތަން އަކޭ ރަނގަޅު ކުޅުމެއް މިދިޔަ ސީޒަނުގައި ދައްކާފައިވާތީ އެވެ.

ލަޕޯޓް ގަތުމަށް އާސެނަލްއާ ވާދަކުރާނެ ކަމަށް ބެލެވެނީ އެސްޓަންވިލާ އާއި ސްޕޭނުގެ ބާސެލޯނާ އެވެ.