ސްވީޑަންގައި މުސްހަފު އެންދި މައްސަލައިގައި އޯއައިސީގެ ކުއްލި ބައްދަލުވުމެއް

މުސްލިމުން އަޟްހާ އީދު ފާހަގަކުރަމުންދަނިކޮށް ސްވީޑަންގައި މުސްހަފު އެންދި މައްސަލައިގައި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ކުއްލި ބައްދަލުވުމެއް ބާއްވަން ނިންމައިފިއެވެ.

މި ބައްދަލުވުން ކުރިއަށްދާނީ އާދިއްތަ ސައޫދީ އަރަބިއްޔާގެ ޖިއްދާގައި ހުންނަ އޯއައިސީގެ މައި މަރުކަޒުގައެވެ. މި ބައްދަލުވުމުގައި އޯއައިސީގެ މެންބަރު ގައުމުތަކުން ބައިވެރިވާނެއެވެ.

ބޭރުގެ މީޑިއާތަކުން ރިޕޯޓުކޮށްފައިވާގޮތުގައި މި ބައްދަލުވުމުގައި ސްވީޑަންގައި މުސްހަފެއް އެންދި މައްސަލައިގައި އަޅާނެ ފިޔަވަޅުތަކާ ގުޅޭގޮތުން މަޝްވަރާކުރާނެެއެވެ. އަދި ކުރިއަށްއޮތްތަނުގައި ވެސް މިފަދަ ކަންކަމާ ގުޅޭގޮތުން އެޅޭނެ ފިޔަވަޅުތަކާ ގުޅޭގޮތުން މަޝްވަރާކުރާނެއެވެ.

މުސްލިމުންގެ މުޤައްދަސް މުނާސަބަތެއް ކަމަށްވާ އަޟްޙާ ޢީދު ދުވަހާ ދިމާކޮށް ސްވީޑަންގައި މުސްހަފު އެންދި މައްސަލަ ގިނަ ގައުމުތަކަކުން ވަނީ ކުށްވެރިކޮށްފައެވެ. މި މައްސަލަ ދިވެހި ސަރުކާރުން ވެސް ކުށްވެރިކޮށްފައިވެއެވެ.

މިއީ ވަރަށް ދަށު ދަރަޖައިގެ އަމަލެއް ކަމަށާއި، އަދި މިއީ މުސްލިމުންގެ ދީނީ އިޙުސާސްތަކަށް ކުޑައިމީސްކުރުން ކަމަށް ދިވެހި ސަރުކާރުން ވަނީ ސިފަކޮށްފައެވެ. އަދި މި އަމަލަކީ ޚިޔާލު ފާޅުކުރުމުގެ މިނިވަންކަމުގެ ތެރެއިން ހިންގި ކަމެއް ކަމަށް ބުނެ ފަރުޖައްސައިނުލެވޭނެ ކަމަށް ސަރުކާރުން ވަނީ ބުނެފައެވެ. އިސްލާމް ދީނަށް ފުރައްސާރަކޮށް ހިންގާ މިފަދަ ޢަމަލުތަކަކީ ސަރުކާރުން އެއްވެސް ސިފައެއްގައި ތަޙައްމަލްކުރާނެ ކަމެއް ނޫން ކަމަށާއި، އެފަދަ ޢަމަލުތައް ސަރުކާރުން ހަރުކަށި އިބާރާތުން ކުށްވެރިކުރާ ކަމަށް ވެސް ވަނީ ބުނެފައެވެ.