މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ  ބޮންޑަށް ބޮޑު ތަރުޙީބެއް ލިބިފައިވާކަމަށް އެ ކުންފުނީގެ ސީއީއޯ ޝާހިދު އަލީ ވިދާޅުވެއްޖެއެވެ.

ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައި ޝާހިދު ވިދާޅުވީ، އެމްޕީއެލްއިން ހުޅުވާލި ބޮންޑަށް ލިބުނު ތަރުޙީބު ނުހަނު ބޮޑު ކަމަށެވެ. އެގޮތުން 50 މިލިއަނަށް ވުރެ ބޮޑު އަދަދެއް ބޮންޑަށް ސަބްސްކްރައިބް ކުރަން ހުށައަޅާފައިވާކަމަށް ޝާހިދު ވިދާޅުވިއެވެ.

ބޮންޑުގެ ގޮތުގައި ޖުމުލަ އަދަދަކަށް ކުންފުނިން ކަނޑައަޅާފައިވަނީ 200 މިލިއަންކަން ފާހަގަ ކުރައްވައި ޝާހިދު ވިދާޅުވީ، އެ މަސައްކަތް ބަހާލެވިފައިވަނީ 50 މިލިއަންގެ އެކި ބައިތަކަށް ބަހާލެވިގެން ކަމަށެވެ.

އެގޮތުގެ މަތިން ފުރަތަމަ ހުޅުވާލި 50 މިލިއަނަށް "އޯވަރ ސަބްސްކްރައިބް" ވެފައިވާކަމަށް ޝާހިދު ވިދާޅުވިއެވެ.

މިކަންކަމުން ދައްކުވައިދެނީ އެމްޕީއެލްގެ މާލީ ނިޒާމާއި، އޭގެ ނަތީޖާތަކަށް އިންވެސްޓަރުން ކުރާ އިތުބާރުކަން ޝާހިދު ފާހަގަ ކުރެއްވިއެވެ.

ކުރިއަށް އޮތް ތަނުގައި ބޮންޑުގެ ދެވަނަ މަރުޙަލާއަށް ހުޅުވާލުމަށްވެސް ވިސްނަވަމުން ގެންދަވާކަމަށް ޝާހިދު ވިދާޅުވިއެވެ. އެކަން ކުރުމުގައި ކުންފުނީގެ މާލީ ޙާލަތާއި، ޤައުމުގެ އިޤްތިސާދީ ޙަރަކާތްތަކަށްވެސް ބަލާނެކަމަށް ޝާހިދު ވިދާޅުވިއެވެ.

ސްޓޮކް އެކްސްޗޭންޖުގެ ޕްރައިވެޓް ސެކިއުރިޓީސް ސެގްމެންޓް، 'ވިޔަނަ' ޕްލެޓްފޯމުގައި އެމްޕީއެލްއިން ލިސްޓު ކުރި މި ބޮންޑު ގަންނަ ފަރާތްތަކަށް އަހަރަކު ފައިދާގެ ގޮތުގައި ހަތް އިންސައްތަ ދޭނެ ކަމަށާއި މި ވަގުތު ބޮންޑަށް ހުޅުވާލާފައި ވަނީ 50 މިލިއަން ރުފިޔާ ހޯދުމަށް ކަމަށް އެ ކުންފުނިން ބުނެފައިވެއެވެ.

މި ބޮންޑަކީ 200 މިލިއަން ރުފިޔާ އެއް އަހަރުގެ ތެރޭގައި ހޯދުމަށް ކަނޑައަޅާފައިވާ ބޮންޑެކެވެ.