ޙައްޖުގެ އަޅުކަން އަދާކުރާ ދިވެހިންނަށް މަބްރޫރު ޙައްޖަކަށް އެދި ދުއާ ކުރަން: ރައީސް

މިއަހަރުގެ ޙައްޖުގެ އަޅުކަން އަދާކުރާ ދިވެހިންނަށް މަބްރޫރު ޙައްޖަކަށް އެދި ދުއާ ކުރައްވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.

ރައީސް ކުރެއްވި ޓްވީޓެއްގައި ވަނީ މި އަހަރުގެ ޙައްޖުގެ އަޅުކަމުގައި ބައިވެރިވާ ދިވެހިންނަށާ މުސްލިމް އަޚުންނާ އުޚުތުންނަށް މަބްރޫރު ޙައްޖެއް މިންވަރު ކުރެއްވުން އެދި މާތް ﷲ އަށް ދުޢާކުރައްވާ ކަމަށް ވިދާޅުވެފައެވެ.

އަދި މި ބަރަކާތްތެރި ޙައްޖު ދުވަހުގެ ދަރުމަޔާ ސަވާބު މިންވަރު ކުރައްވައި، ދެ ދުނިޔޭގެ ބާއްޖަވެރިން ކަމުގަ ލެއްވުން އެދި ރައީސް ވަނީ ދުއާ ކުރައްވާފައެވެ.

ހައްޖުގެ މަތިވެރި އަޅުކަން އަދާކުރުމަށްޓަކައި ދުނިޔޭގެ އެކި ކަންކޮޅުތަކުން މިއަހަރު 2.5 މިލިއަނެއްހާ މީހުން ސައޫދީ އަރަބިއްޔާއަށް ޖަމާވެފައިވާއިރު، މިއީ މިހާތަނަށް އެންމެ ގިނަ މީހުން ޙައްޖުވާން ސައުދީއަށް ދާ އަހަރުކަމަށް އެ ޤައުމުން ބުނެފައިވެއެވެ.

ސައޫދީ ސަރުކާރުން، ހައްޖުވެރިންގެ ފަސޭހަޔަށް މިނާ އަދި އަރަފާތުގައި ކަންތައް ފުރިހަމަކޮށްފައި ވާއިރު، ސިއްހީގޮތުންވެސް ރައްކާތެރިވާންވީ ކަންތައް ކެނޑިނޭޅި ދަނީ އަންގަމުންނެވެ. މިއަހަރަކީ އެހެން އަހަރުތަކަށްވުރެ ހޫނު ގަދަ އަހަރަކަށް ވުމާއެކު، ހޫނުގެ ސަބަބުން ލިބިދާނެ ގެއްލުމަކަށްވެސް ސަމާލުވުމަށް އޮފިޝަލުން ދަނީ ނަސޭހަތްތެރިވަމުންނެވެ.