ބިންވެރިޔާ ސްްކީމުގެ ދަށުން ގޯތި ދޫކުރުގައި ބަލާ އުސޫލުގައި ރައްޔިތުންގެ މަޖިލީހުގެ މެމްބަރުން އިސްތިސްނާވާ ހާލަތެއް ނެތްކަމަށް, މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ސީނިއަރ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވެއްޖެއެވެ.

ބިންވެރިޔާ ސްކީމުގެ ދަށުން ގޯތި ލިބުނު މީހުންގެ ވަގުތީ ލިސްޓު އާންމުކޮށްފައިވާއިރު، މި ލިސްޓުގައި ބައެއް މަޖިލިސް މެމްބަރުންގެ ނަން ހިމެނިފައިވާތީ ސަރުކާރަށް ވަނީ ފާޑުކިޔުންތަކެއް އަމާޒުވެފައެވެ.

މިކަމާ ގުޅިގެން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަފުޅުދައްކަވަމުން އާރިފް ވިދާޅުވީ، ގޯތި ދޫކުރަނީ މިކަމަށް ކަނޑައަޅާފައިވާ އުސޫލުތަކަށް ބެލުމަށްފަހު ކަމަށާއި، މި އުސޫލުގައި މެމްބަރުން އިސްތިސްނާވާ ހާލަތެއް ނޯންނަ ކަމަށެވެ. އެހެންކަމުން އުސޫލަށް ފެތޭ މީހުންނަށް ބިން ލިބޭނެ ކަމަށް އާރިފް ވިދާޅުވިއެވެ.

އެހެންނަމަވެސް ފްލެޓް ދިނުމުގައި ލިބޭ އާމްދަނީއަށް ބަލާކަމަށާއި، 60،000ށްވުރެ މަތިން އާމްދަނީ ލިބޭ މީހުންނަށް ފްލެޓް ނުލިބޭނެ ކަމަށް އާރިފް ވިދާޅުވިއެވެ.

ގޯތި ލިބޭ މީހުންގެ ވަގުތީ ލިސްޓު އާންމުކޮށްފައިވާއިރު މާލޭގެ 8 ދާއިރާ ތަމްސީލުކުރައްވާ މަޖިލިސް މެމްބަރުންނަށް ގޯތި ލިބިފައިވާކަމަށް ލިސްޓުގައި ވެއެވެ. މިއާއެކު ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފައެވެ.