ހަފްތާއަކު 4 ދުވަހު މަސައްކަތްކުރުމުގެ ނަތީޖާ ކާމިޔާބު: ޕީޖީ އޮފީސް
މި ތަޖުރިބާއަކީ ނާކާމިޔާބު ތަޖުރިބާއެއްނަމަ، މި ތަޖުރިބާ ހުއްޓާލައި ޢާންމު އުޞޫލުން 5 ދުވަަހަށް ބަދަލުވާނެ
ޕީޖީ އޮފީހުގެ ވީޑިއޯ ކޮންފަރެންސް އަޑުއެހުމެއް
ހަފްތާއަކު 4 ދުވަހު މަސައްކަތްކުރުމުން ނެރެވޭ ނަތީޖާ ތަޖުރިބާ ކޮށްލަން ޕްރޮސެކިއުޓަރ ޖެނެރަލް (ޕީޖީ) އޮފީހުގެ މަސައްކަތު ވަގުތަށް ބަދަލު ގެނެސްފައިވާއިރު، މި ބަދަލުގެ ފުރަތަމަ ފިޔަވަހީގެ ނަތީޖާ ރަނގަޅުކަމަށް އެ އިދާރާއިން ބުނެފިއެވެ.
މި ބަދަލުގެ ފުރަތަމަ ފިޔަވަހި 23 މާރިޗު އިން 27 އޭޕްރީލް 2023 އަށް ކުރިއަށް ގެންދެވިފައިވާއިރު، މިތަޖުރިބާ ވެގެން ގޮސްފައިވަނީ ކުރިން ހީކުރި ވަރަށްވުރެވެސް ކާމިޔާބު ތަޖުރިބާއަކަށް ކަމަށް ޕީޖީ އޮފީހުން ބުނެފައިވެއެވެ.
ޕީޖީ އޮފީހުން ވަނީ 23 މާރިޗު އިން 27 އޭޕްރިލްއާ ދެމެދު އޮތް 6 ހަފްތާއާއި، އޭގެ ކުރިން ދިޔަ 19 ފެބްރުވަރީ އިން 22 މާރިޗު 2023 އަށް އޮތް 6 ހަފްތާ އަޅައި ކިޔާފައެވެ.
އެގޮތުން ބަލާއިރު، މި ބަދަލާއެކު ގަޑި ޖެހުނު މުވައްޒަފުންގެ އަދަދު 33 އިންސައްތައަށް ކުޑަކުރެވިފައިވާއިރު، ސަލާމް ބުނި މުވައްޒަފުންގެ އަދަދުވެސް ވަނީ 40 އިންސައްތައަށް ކުޑަ ކުރެވިފައެވެ.
އޭގެ އިތުރުން، މި ބަދަލާއެކު މަސައްކަތަށްވެސް ކުރިއެރުންތަކެއް ލިބިފައިވާކަމަށް އެ އިދާރާއިން ފާހަގަކޮށްފައިވެއެވެ. އެގޮތުން ޑިއުޓީ ޕްރޮސިކިއުޝަނަށް ހުށަހެޅި ފިޔަވަޅު އެޅުނު އަދަދު 27 އިންސައްތަ އިތުރު ކުރެވިފައިވާއިރު، ކޯޓަށް ހުށައެޅުނު ދައުވާ ފޯމުގެ އަދަދުވެސް ވަނީ 12 އިންސައްތައަށް އިތުރު ކުރެވިފައެވެ.
ޕީޖީ އޮފީހުގެ ނިއުސްލެޓަރ ގައި ބަޔާންކޮށްފައިވާ ގޮތުގައި ކުރެވުނު މަސައްކަތް ގިނަވެ، ނަތީޖާ އާއި ފެންވަރު ރަނގަޅު ވުމުގެ އިތުރުން، އެމުއްދަތުގައި، ކޯޓުގެ އެއްވެސް އަޑުއެހުމެއް، އެ އޮފީހުން އެދިގެން ކެންސަލް ކޮށްފައެއް ނުވެއެވެ.
މިއީ މަސައްކަތް މޮނިޓަރ ކުރެވޭނެ ރަނގަޅު ނިޒާމުތަކެއް އެކުލަވާލެވިފައި އޮތް ނަމަ، ކޮންމެ އޮފީހެއްގައިވެސް، އެއޮފީހެއްގެ ނިސްބަތުން ކުރެވިދާނެ ކަމެއްކަން ޕީޖީ އޮފީހުން ފާހަގަ ކުރެއެވެ.
ހަފްތާއަކު 4 ދުވަހު މަސައްކަތްކުރުމުގެ ކަންކަން ރޭވިފައިވާ ގޮތް އެ އޮފީހުން ވަނީ ހިއްސާ ކޮށްފައެވެ.
އޭގެ ތެރޭގައި އެ އޮފީހުންދޭ ޚިދުމަތްތައް ޢާންމު އުޞޫލުން ހަފްތާގެ 5 ދުވަހު (ރަސްމީ ބަންދު ނޫން ކޮންމެ ދުވަހަކު) ދެމުން ގެންދިއުމާއި، ހަފްތާގެ 5 ދުވަހުގެ ތެރެއިން 1 ދުވަސް މުވައްޒަފު އޮފީހަށް ނުކުމެ މަސައްކަތްކުރަން ނުޖެހޭގޮތަށް ހަމަޖެއްސުން ހިމެނެއެވެ.
އަދި އެފަދައިން އޮފީހަށް ނުކުމެ މަސައްކަތް ނުކުރާ ދުވަސް އޮފީހުގެ މަސައްކަތްތަކަށް ހުރަސް ނޭޅޭގޮތަށް މުވައްޒަފުންގެ މެދުގައި ބަހާލުމާއި، ގޭގައި މަސައްކަތްކުރާ ދުވަސްތަކުގައިވެސް ޕްރޮސިކިއުޓަރުން ކޯޓަށް ދާންޖެހުންފަދަ، އޮފީހަށް ނުކުމެ މަސައްކަތް ކުރަންޖެހޭފަދަ އެނޫންވެސް މަސައްކަތެއް އޮތްނަމަ އޮފީހަށް ނުކުމެ މަސައްކަތްކުރުން ހިމެނެއެެވެ.
އޭގެ އިތުރުން، އެ މުއްދަތުގައި މުވައްޒަފު ސަލާމް ނުވަތަ ޢާއިލީ ޒިންމާ ޗުއްޓީއެއް ނަންގަވައިފިނަމަ ޖެހިގެން އަންނަ ހަފްތާގައި ޢާންމު އުޞޫލުން 5 ދުވަހު އޮފީހަށް ނުކުމެ މަސައްކަތްކުރަންވެސް ޖެހެއެވެ.
