މެކްއަލިސްޓާ ލިވަޕޫލްގެ ނަންބަރު އަށެއް ދޫކޮށްލީ ކީއްވެ؟
26 ޖޫން 2023 | ހޯމަ 04:42އަށެއްގެ ބަދަލުގައި އޭނާ ބޭނުންކުރާނީ 10 ނަންބަރު ޖާޒީ
މެކް އަލިސްޓާ ލިވަޕޫލްގެ 10 ނަންބަރު ޖާޒީ ދައްކާލަނީ
އަންނަ ސީޒަނަށް ލިވަޕޫލަށް ބަދަލުވި އާޖެންޓީނާގެ މިޑްފީލްޑަރު އެލެކްސިސް މެކްއަލިސްޓާ ލިވަޕޫލްގެ އަށް ނަންބަރު ޖާޒީ ދޫކޮށްލި ސަބަބު ބުނެދީފި އެވެ.
އޭނާ ބުނީ އަބަދުވެސް އެންމެ ގަޔާވާ ނަންބަރަކީ އަށެއް ކަމަށާއި ނަމަވެސް ލިވަޕޫލްގެ އަށް ނަންބަރު ނުލާން ނިންމީ އެކުލަބުގެ ކުރީގެ ކެޕްޓަން ސްޓީވަން ޖެރާޑްގެ ޝަރަފުގައި ކަމަށެވެ.
އަށެއް ދޫކޮށްލުމަށްފަހު އޭނާ އިހުތިޔާރުކުރީ 10 ނަންބަރު ޖާޒީ އެވެ. އެއީ ލިވޕޫލްގެ ކުރީގެ ދެ ލެޖެންޑުން ކަމަށްވާ މައިކަލް އޮވެން އާއި ސާދިއޯ މާނޭ ބޭނުންކުރި ޖާޒީ އެވެ. މެކްއަލިސްޓާ ބުނީ އަށަކާއި 10އެއް ކުލަބުގައި ވެސް ތަފާތު ކަމަށެވެ. އަދި 10ނަންބަރުގައި އޮންނާނީ ކުޅުންތެރިޔާގެ އަމިއްލަ ޕްރެޝަރު އެކަނި ކަމަށެވެ.
ބްރައިޓަންދޫކޮށް ލިވަޕޫލަށް އޭނާ ބަދަލުވީ ވާދަވެރި މެންޗެސްޓާ ޔުނައިޓެޑުން ވެސް ވާހަކަ ދައްކަނިކޮށެވެ.
އޭނާ އަކީ އަންނަ ސީޒަނަށް ލިވަޕޫލް ވަރުގަދަ ކުރުމަށް ގެނައި އެއް ކުޅުންތެރިޔާ އެވެ. އަދި އިތުރު ކުޅުންތެރިން ހޯދުމަށް ވެސް ދަނީ މަސައްކަތް ކުރަމުންނެވެ.
