2020 ވަނަ އަހަރު ފުލުހުން ހިންގި އޮޕަރޭޝަނެއްގައި ހޯދި 61 ކިލޯގެ މަސްތުވާތަކެތީގެ މައްސަލައިގައި ހިމެނޭ 6 މީހެއްގެ މައްޗަށް ކުށް ސާބިތުވެ އުމުރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފިއެވެ.
2020 ވަނަ އަހަރުގެ މާރޗު 26 ވަނަ ދުވަހު ފުލުހުންގެ ޑްރަގް އިންޓެލިޖެންސް ޑިޕާޓްމަންޓާއި، ޑްރަގް އެންފޯސް ޑިޕާޓްމަންޓާއި، މެރިން ޕޮލިސް އިން ހިންގި މި އޮޕަރޭޝަނުގައި މަސް ދޯންޏަކުން 61.06 ކިލޯގެ ހެރޮއިން އަތުލައިގަނެފައިވާއިރު، މިއީ މ. ބޮއިލިންގފިޝް، އަޙްމަދު ވިސާމް ނަމަކަށް ކިޔާ މީހަކު އިސްވެހުރެ، އިތުރު ބަޔަކާ ބައިވެރިވެގެން ހިންގި ކަމެއް ކަމަށާއި، އަދި މިތަކެތި އެތެރެކޮށްފައި ވަނީ "އިރުއަލިމަސް" ކިޔާ ދޯންޏެއްގައި ކަމަށް ޕީޖީ އޮފީހުން ބުނެފައިވެއެވެ. މި މައްސަލައިގައި 11 މީހަކު އަތުލައިގަނެފައިވެއެވެ.
މި މައްސަލައިގައި 6 މީހެއްގެ މައްޗަށް ޑްރަގް ޓްރެފިކިންގެ ކުށް ސާބިތުވެ އުމުރަށް ޖަލަށް ލުމަށާއި، 100،000 ރުފިޔާއިން ޖޫރިމަނާކުރުމަށް ކްރިމިނަލް ކޯޓުން ވަނީ ހުކުމްކޮށްފައެވެ. އަދި މިމަހުގެ 12 ވަނަ ދުވަހުން ފެށިގެން 12 މަސް ދުވަހުގެ ތެރޭގައި އެ ފައިސާ ދެއްކުމަށް ހުކުމްކޮށްފައިވެއެވެ.
މި މައްސަލައިގައި ހުކުމްކޮށްފައިވަނީ:
- އަހްމަދު ޝިފާޒް، ހުޅުމާލެ ފްލެޓް 06 ޖީ 04
- އަބްދުﷲ ޝާމް، މއ. ބޯޅަކިންކިރިމާގެ
- ހުސައިން ސުނާޒް، މ. މުލި/ސޯސަންވިލާ
- މުހައްމަދު މާއިދު، މ. ކޮޅުފުށި/އޯޝަންވިއު
- މުހައްމަދު ރިޝްވާން އިބްރާހިމް، މ. މުލި/މުޝްތަރީގެ
- ސައުދުﷲ ރަޝީދު، މ. ކެޕްރިކޯން
މި މައްސަލައިގައި 6 މީހެއްގެ މައްޗަށް ދައުވާކޮށްފައިވާއިރު މައްސަލައިގައި އެންމެ އިސްކޮށް ހުރި މީހާ ކަމަށް ތުހުމަތުކުރެވޭ ވިސާމްގެ މައްޗަށް ހުކުމްކޮށްފައެއް ނުވެއެވެ. އޭނާގެ އިތުރުން މުހައްމަދު ހަމީދު، މުހައްމަދު ޝާމިން އަދި މުހައްމަދު މާއިޝްގެ މައްޗަށްވެސް ކުށް ސާބިތުވެފައެއް ނުވެއެވެ.
މި މައްސަލައިގައި އިސްކޮށްހުރި ވިސާމް ބަންދުން ދޫކޮށްލުމަށް 24 ޖަނަވަރީ 2021 ދުވަހު ކްރިމިނަލް ކޯޓުން ނިންމިއެވެ. އެ ނިންމުން ދިވެހިރާއްޖޭގެ ހައިކޯޓުގައި އިސްތިއުނާފު ކުރުމުން ހައިކޯޓުން ވަނީ ކްރިމިނަލް ކޯޓުގެ ނިންމުން ބާތިލުކޮށްފައެވެ. އެއާއެކު ވިސާމުގެ މައްސަލަވެސް އެ އެންމެންގެ މައްސަލައާއެކު ކުރިއަށްދިޔައެވެ.
