ގެމަނަފުށި މަގުތަކުގައި ތާރުއަޅަން އާރުޑީސީއާ ހަވާލުކޮށްފި
ގެމަނަފުށީ މަގުތައް ހެދުމުގެ މި މަޝްރޫޢުގެ މަސައްކަތް ނިންމުމަށް އާރުޑީސީއަށް ދީފައިވަނީ 540 ދުވަސް
ގެމަނަފުށި މަގުތައް ތާރުއެޅުމުގެ އެއްބަސްވުމުގައި ސޮއިކުރަނީ
ގއ. ގެމަނަފުށީ މަގުތަކުގައި ތާރުއެޅައިގެން ތަރައްގީކުރަން ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ހަވާލުކޮށްފިއެވެ.
މިނިސްޓްރީ އޮފް ނެޝަނަލް ޕްލޭނިންގ، ހައުސިން އެންޑް އިންފްރާސްޓަކްޗާގައި މިކަމަށްޓަކައި ބޭއްވި ރަސްމިއްޔާތެއްގައި ގެމަނަފުށީގެ މަގުތައް ތަރައްގީ ކުރުމަށް އާރްޑީސީއާ ހަވާލުކުރުމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޕާމަނަންޓް ސެކްރެޓަރީ ޒީނިއާ އަހުމަދު ހަމީދެވެ. އާރުޑީސީގެ ފަރާތުން އެއްބަސްވުމުގައި ސޮއިކުރެއްވީ ޖެނެރަލް މެނޭޖަރު ހުސައިން ނަދީމެވެ.
ޕްލޭނިން މިނިސްޓްރީން ބުނީ، މި އެއްބަސްވުމުގެ ދަށުން 2.8 ކިލޯމީޓަރުގެ މަގުގައި ތާރުއެޅުމަށް ހަމަޖެހިފައިވާކަމަށެވެ. މިއާއެކު މަގުތަކުގައި ފެންހިންދާ ނިޒާމުވެސް ގާއިމްކުރުމަށް ވަނީ ހަމަޖެހިފައެވެ. މީގެ އިތުރުން މަގުބައްތިތައް ވެސް ޖަހާނެއެވެ.
ގެމަނަފުށީ މަގުތައް ހެދުމުގެ މި މަޝްރޫޢުގެ މަސައްކަތް ނިންމުމަށް އާރުޑީސީއަށް ދީފައިވަނީ 540 ދުވަހެވެ. މިމަޝްރޫޢުގެ އަގަކީ 76،166،435.47 (ހަތްދިހަ ހަ މިލިއަން އެއްލައްކަ ފަސްދޮޅަސް ހަ ހާސް ހަތަރު ސަތޭކަ ތިރީސް ފަސް) ރުފިޔާއެވެ.
