ރިޔާސަތުގައި އިންނަވާކަށް ބޭނުންފުޅެއްނުވޭ، ނުއިންނަވައި ވާކަށް ނެތް، ދޫކޮށްލެއްވޭކަށްވެސް ނެތް!
22 ޖޫން 2023 | ބުރާސްފަތި 14:56މަޖިލީހުގެ ބުރާސްފަތި ދުވަހުގެ ރިޔާސަތު ބެލެހެއްޓެވީ ނަޝީދު
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
ވިދާޅުވަނީ ރިޔާސަތުގައި އިންނަވަން ބޭނުންފުޅުނުވާކަމަށެވެ. އަދި ދާއިރާ ތަމްސީލްކުރައްވަން މާ ރަނގަޅުކަމަށެވެ. ވިދާޅުވަނީ ދާއިރާގެ އަޑު އިއްވަވަން ކެތްމަދުވެފައި ހުންނެވި ކަަމަށެވެ. އެކަަމަކު ބާރެއް ދޫކޮށްލައްވަން ޖެހުނީމަ ކަން ހިނގަނީ އެއާ ދިމާ އިދިކޮޅަށެވެ. ވިދާޅުވަނީ މެމްބަރުންގެ ފުރިހަމަ އިތުބާރު ތިމަން މަނިކުފާނަށް އޮތްކަމަށެވެ. އަދި ވޯޓަކާ ހަމައަށް ހިނގައްޖެނަމަ ނާކާމިޔާބުވެވަޑައިނުގަންނަވާނެ ކަމަށްވެސް ވިދާޅުވިއެވެ. އެހެނަސް 50ށްވުރެ ގިނަ މެމްބަރުންގެ ސޮޔާއެކު ހުށަހެޅި, އިތުބާރު ނެތްކަމުގެ މައްސަލަ ޕާކްކުރައްވައި، ބާއްވަވާފައި ކުޑަ ދަށުގައި އިންނަވަނީ އެ ޖަލްސާ މަޖިލީހަށް އެޖެންޑާކުރައްވާނެ ދުވަހެއްގެ ހިލަމެއްވެސް ނުކުރައްވައެވެ. މެމްބަރުންގެ ވޯޓަކުން މަޖިލީހުގެ ރައީސްކަމުގެ މާލިމީކަން ގެއްލިވަޑައިނުގަންނަވާނެ ކަމަށް ވިދާޅުވިނަމަވެސް، އެ މައްސަލައާ ހަމައަށް ވާސިލްވާން ހުރި މަގުތައް ބަންދުކުރެއްވެން އޮތިއްޔާ އޮތް ހުރިހާ ކަމެއް އޮތީ ކުރައްވާފައެވެ. އެއީ ފަހަރުގައި އިއްތިފާގަކަށް ވެދާނެއެވެ.
އިތުބާރު ނެތްކަމުގެ މައްސަލަ ހުށަހެޅި ހިސާބުން ރައްޔިތުންނަށްޓަކައި ނަޒާހަތްތެރި ނަމޫނާއެއް ދެއްކުމަށްކަމަށް ވިދާޅުވެ ރިޔާސަތުން ދުރުވެވަޑައިގަތީމުވެ. ގަވާއިދުގައި އެފަދަ ހުއްޖަތެއް ނެތްނަމަވެސް މަނިކުފާނަށް ފެނިވަޑައިގަތް ޑިމޮކްރަސީގެ ރީތި މިސާލަކީ އޭރު އެއީއެވެ. މަޖިލިސް ކުރިއަށް ނުގޮސް، މަޖިލީހުގެ ރިޔާސަތާ ހަވާލުވެވަޑައިގަންނަވަން އައްޔަންކުރެއްވި މެމްބަރު، މަޖިލީހުގެ ޖަލްސާތައް ހިތްޕުޅާހަމަވާ ގޮތަކަށް ގެންދެވިއިރު ރިޔާސަތާ ހަވާލުވެވަޑައިގަތުން މުހިންމު ކަމަކަށް ފެނިވަޑައެއް ނުގަތެވެ. މަޖިލީހުގެ ޖަލްސާތައް ހިތްޕުޅާހަމަވާ ގޮތަކަށް ގެންދަވަން ދޫކޮށްލެއްވީއެވެ. އިއްޔެ އެހެން ބޭފުޅަކު ރިޔާސަތުގައި އިންނެވިއިރު، އެ ބޭފުޅާގެ ޚުދުމުޚުތާރުކަން ސިފަކޮށްދިނުމަށް ދެއްކެވި ހުރިހާ ކަމެއް މިއަދު މި މަޖިލީހުގައި ތަކުރާރުވެއްޖެއެވެ.
ޖަލްސާ އެޖެންޑާއަށް އިހުތިރާމްކުރެއްވުމަށް ޚުދު މަނިކުފާނު ނަސޭހަތްތެރިވެވަޑައިގެންނެވި އިރު، ކޮންމެ ދުވަހަކު ޖަލްސާ ކުރިއަށް ގެންދިޔަނުދިނުމަށް އެކި ނަންނަމުގައި އެއް މައްސަލައެއްގައި ފުނި ފުންޏަށް ހުށަހަޅާ ގަރާރުތަކާއި ކުއްލި މައްސަލަތަކަށް އެ ޖާގަވެސް ދެއްވައެވެ. އަދި މަޖިލީހުގައި އެއްބައި މެމްބަރުން ބޭނުންފުޅުވާ ވާހަކައަކާއި ބޭނުންފުޅުވާ ހާސަރެއް ދެންމެވުމަށް ޖާގަ ދެއްވާއިރު، ރުހިވަޑައިނުގަންނަވާ މެމްބަރުންގެ ވާހަކަފުޅަށް ދެއްވަނީ މަދު ވަގުތުކޮޅެކެވެ. އެޖެންޑާއިން ބޭރުން ވާހަކަދައްކަވާކަމަށް ވިދާޅުވެ ވާހަކަ މެދުވެސް ކަނޑުއްވައިލައްވަނީއެވެ. އިއްޔެއާ ހަމައަށް، މަޖިލީހުގެ ޖަލްސާތައް ކުރިއަށް ގެންދެވުމަށް މެމްބަރުން އާދޭސް ދަންނަވަމުން ގެންދެވިއިރުވެސް ވިދާޅުވީ ރިޔާސަތުގައި އިންނަވަން ހަމަ ހިލާ ކެރިވަޑައިނުގަންނަވާނެކަމަށެވެ. އެކަމަށް ގާނޫނު ޖާގަ ނުދޭކަމަށްވެސް، މަނިކުފާނަށް ތާއީދުކުރައްވާ ބޭފުޅުންނާއި ޚުދު މަނިކުފާނު ހަރު އަޑުފުޅުން ވިދާޅުވީމެވެ.
އެއީ ރައްޔިތުންނަށްޓަކައި ނިންމެވި ނިންމެވުމެއް ކަމަށް, އިހަކަށް ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވިއެވެ. އެ ނޫސްވެރިންގެ ބައްދަލުވުމުގައިވެސް ތަކުރާރުކޮށް ވިދާޅުވީ މަޖިލީހުގެ ޖަލްސާތައް ކުރިއަށް ގެންދިއުމަށް ފަހި މަގެއް ފެނިވަޑައިނުގަންނަވާ ކަމަށެވެ. އެކަމަކު މިއަދު ރާގުފުޅު ބަދަލުވެ، ރިޔާސަތާ ހަވާލުވެވަޑައިގަތީ، ބައެއް ބޭފުޅުން ވިދާޅުވާގޮތުންނަމަ މަޖިލިސް ޗުއްޓީއަށް ދާން ހެދި އުކުޅެކެވެ. އަނެއްބައި މެމްބަރުން އެކަން ސިފަކުރެއްވީ މަޖިލީހުގެ ވިލުފުށީ ދާއިރާގެ މެމްބަރު އަފީފަށް ޖެހިޖެހިގެން ތިން ޖަލްސާއަށްވުރެ ގިނަ ޖަލްސާގައި ނުއިންނެވޭނެތީ ފަށް ކެނޑުމަށް ކުރެއްވި ކަމެއްގެ ގޮތުގައެވެ.
އެކަން ކުރެއްވީ ރައްޔިތުންނަށްޓަކައި ކަމަށް ވިދާޅުވިއިރު، މަޖިލީހުގެ ރިޔާސަތުގައި އިންނަވަން ދެކޮޅު ހެއްދެވުމުން މަޖިލީހުގެ ނައިބު ރައީސްގެ އިތުބާރު ނެތްކަމުގެ މައްސަލަ ކުރިއަށް ނުގެންދަވައި ބާއްވަވަން އެއީ ރައްޔިތުން އެދުނު ގޮތް ކަމަށް އޭރު ގަބޫލުކުރެއްވީހެވެ. އެ މައްސަލަ ފާސްވާން ނުވަތަ ނުވާން ދޫކޮށްލައްވައި، ރައްޔިތުންގެ މަންދޫބުންނަށް ގޮތް ނިންމަން ފުރުސަތު ދެއްވުން އެއީ ރައްޔިތުން އެދޭ ގޮތް ކަމަކަށް އޭރު ގަބޫލުފުޅެއް ނުކުރެއްވުނެވެ. މަގާމު ބޭނުންފުޅު ނުވާކަމަށް ތަކުރާރުކޮށް ވިދާޅުވިނަމަވެސް، މަޖިލީހުގައި މަރުތަޅު އެޅުވިފައިވާކަަމަށް ވިދާޅުވެ، މަޖިލީހުގެ ރިޔާސަތަށް އޭރު ވަޑައެއްނުގަންނަވަމުއެވެ. ރައްޔިތުންނަށްޓަކައި ދައުލަތުގެ އެޓަރނީ ޖެނެރަލްގެ މައްސަލަ އެޖެންޑާއިން ގެއްލުނު ގޮތެއް ވިދާޅުވެއެއްނުދެއްވައެވެ. އަދި އެ މައްސަލައިގެ އެޖެންޑާއަށް ބަދަލު އައި ގޮތެއްވެސް ވިދާޅުވެއެއްނުދެއްވައެވެ. އެޖެންޑާއަށް އިހުތިރާމެއް ނުކުރައްވައެވެ.
އަދި މަޖިލީހުގެ އަމީންއާއްމު މަޖިލީހުގެ ޖަލްސާ ކުރިއަށް ގެންދެވުމަށް މަޖިލީހާމެދު މަނިކުފާނުގެ ޒިންމާފުޅު އޮތް ކަމަށް ވިދާޅުވި ވިދާޅުވުމަކަށްވެސް ގޮތް ދުލެއްނުކުރައްވަމުއެވެ. ރިޔާސަތުގައި ނެތްނަމަ، މަޖިލީހުގައި އޮތް ޖާހާއި، އެ ޕްލެޓްފޯމް ގެއްލިވަޑައިގަންނަވަން ބޭނުންފުޅުނުވާކަހަލައެވެ. އެހެންކަމުން ކުއްލިއަކަށް ރައްޔިތުންގެ ހައްގުގައި ރިޔާސަތާ ހަވާލުވެވަޑައިގަތް ކަމަށް ވިދާޅުވިނަމަވެސް އެކަމާ ސުވާލު އުފެދެއެވެ.
