ރައްޔިތުންގެ މަސްލަޙަތަށްކަމަށް ވިދާޅުވެ ނަޝީދު މަޖިލީހުގެ ރިޔާސަތާ ޙަވާލުވެވަޑައިގެންފި

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރުނެތްކަމަށް 54 މެންބަރަކު ސޮއިކުރައްވާ ހުށަހަޅުއްވާފައިވާ މައްސަލައާ ގުޅިގެން ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް ވިދާޅުވެ، މަޖިލީހަށް ހާޒިރުވެވަޑައިނުގެން އުޅުއްވުމަށްފަހު، ބުރާސްފަތި ދުވަހުގެ ޖަލްސާގައި ނަޝީދު ބައިވެރިވެވަޑައިގެންފިއެވެ.

ބުރާސްފަތި ދުވަހުގެ މަޖިލިސް ޖަލްސާގައި ނަޝީދު ވިދާޅުވީ، ރިޔާސަތު ބެލެހެއްޓެވުމަށް ވަޑައިގެންނެވީ އެމަނިކުފާނުގެ އުޒުރުތަކަށްވުރެ މަތީ މަސްލަޙަތުތަކަށް އިސްކަންދޭން ޖެހޭތީ ކަމަށެވެ. އެއީ ރައްޔިތުންގެ މަސްލަޙަތުކަމަށް ނަޝީދު ވިދާޅުވިއެވެ.

ނަޝީދު ވިދާޅުވީ، ބުރާސްފަތި ދުވަހުގެ އެޖެންޑާއަށްފަހު މަޖިލިސް ޗުއްޓީއަށް ވަޑައިގަންނަވާނެ ކަމަށެވެ.

ނަޝީދުގެ އިތުބާރު ނެތްކަމަށް ބުނެ ހުށަހެޅުއްވި ޤަރާރުގައި 54 މެންބަރުން ސޮއިކުރައްވާފައިވާއިރު، އޭގެ ތެރޭގައި ހިމެނެނީ އެމްޑީޕީގެ 50 މެންބަރުންނާއި އިތުރު 4 މެންބަރަކެވެ. އެމަނިކުފާނު ވަކިކުރުމަށް ހުށަހެޅި ޤަރާރުގައި ބަޔާންކޮށްފައިވަނީ ރައްޔިތުންގެ މަޖިލީހުގެ ރައީސަކީ ވަކި ފަރާތަކަށް ޖެހުމެއް ނެތި ޤާނޫނުއަސާސީއާއި ރައްޔިތުންގެ މަޖިލީހުގެ ޤަވާއިދާއި ރައްޔިތުންގެ މަޖިލީހުގެ ނިންމުންތަކާ އެެއްގޮތްވާ ގޮތުގެ މަތިން ޖަލްސާތަކާއި ކޮމިޓީތަކުގެ ކަންކަން ހިންގަވަން ޖެހޭ ފަރާތް ނަމަވެސް، ކަން ހިނގަމުންދަނީ އެގޮތަށް ނޫން ކަމަށެވެ.

އޭގެ އިތުރުން، މަޖިލީހުގެ ނާއިބު ރައީސް އީވާ އަބްދުﷲގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް އެޖެންޑާ ކުރި ޖަލްސާގެ ރިޔާސަތު ބަލަހައްޓަން މަޖިލީހުގެ ރައީސް މުހައްމަދު ނަޝީދު އުޒުރުވެރިވެވަޑައިގަތުމުން، މަޖިލީހުގެ ރިޔާސަތު ބެލެހެއްޓުމާ މެދު ގޮތެއް ނިމެންދެން މަޖިލީހުގެ ނާއިބު ރައީސް އީވާ އަބްދުﷲގެ މައްސަލަ ކުރިއަށް ގެންދެވެން ނެތް ކަމަށް އިޢުލާންކުރެއްވުމަށް ފަހު މަޖިލީހުގެ ޖަލްސާވެސް މީގެ ކުރިން ނިންމާލަން ޖެހިފައިވެއެވެ.

މަޖިލީހުގެ ގަވާއިދު ބުނާގޮތުން ނާއިބު ރައީސްގެ އިތުބާރު ނެތްކަމުގެ މައްސަލައެއް އެޖެންޑާކޮށްގެން ކުރިއަށްގެންދާއިރު ރިޔާސަތު ބަލަހައްޓަވަން ވާނީ މަޖިލީހުގެ ރައީސްއެވެ. އެގޮތުން މަޖިލީހުގެ ރައީސާއި ނައިބްރައީސްގެ އިތުބާރު ނެތްކަމުގެ މައްސަލަ ހުށައެޅިފައިވަނިކޮށްވެސް އެ މައްސަލަތައް ކުރިއަށް ގެންދެވޭނެގޮތްތައްމަޖިލީހުގެ އަމީންއާންމު ވަނީ ނަޝީދަށް ދަންނަވާފައެވެ. ނަމަވެސް އެ މަސައްކަތްތައް މިއަދާ ހަމައަށްވެސް އޮތީ ހުއްޓިފައެވެ.