ވޭތުވެދިޔަ އަހަރަކީ ޤައުމީ ދިފާއީ ބާރަށް ތަރައްޤީ އާއި ކުރިއެރުން ލިބުނު އަހަރެއް: ޝަމާލް
21 ޖޫން 2023 | ބުދަ 01:07ގިނަ އަދަދެއްގެ ސިފައިން ބޭރުގެ އެކި ޤައުމުތަކުގައި ޒަމާނީ އަސްކަރީ ތަމްރީނުތައް ހޯދަމުންދޭ
ސިފައިންގެ އަހަރީ ދުވަސް
ވޭތުވެދިޔަ އަހަރަކީ ޤައުމީ ދިފާއީ ބާރަށް ތަރައްޤީ އާއި ކުރިއެރުން ލިބުނު އަހަރެއް ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.
ސިފައިންގެ 131 ވަނަ އަހަރީ ދުވަހުގެ ޚާއްސަ ރަސްމިއްޔާތުގައި ވާހަކަފުޅު ދައްކަވަމުން ޝަމާލް ވިދާޅުވީ ޤައުމީ ދިފާޢީ ބާރުގެ މުހިންމު އެއް އިސްތިރާޖީއަކީ ބޭރުގެ އަސްކަރިއްޔާތަކާއެކު އޮތް އެކުވެރި އަދި ބަދަހި ގުޅުން ދެމެހެއްޓުމާއި، އިންޓައޮޕަރަބިލިޓީ ޤާއިމުކުރުން ކަމަށެވެ. އަދި މި ގުޅުންތަކުގެ ތެރެއިން އަސްކަރިއްޔާގެ ޤާބިލުކަމާއި އިންސާނީ ވަސީލަތް ތަރައްޤީކޮށް ޒަމާނީ އާލާތްތައް ހޯދުން ކަމަށް ވެސް ވިދާޅުވިއެވެ.
އެގޮތުން ގިނަ އަދަދެއްގެ ސިފައިން ބޭރުގެ އެކި ޤައުމުތަކުގައި ޒަމާނީ އަސްކަރީ ތަމްރީނުތައް ހޯދަމުންދާކަން ފާހަގަކުރައްވާ ޝަމާލް ވިދާޅުވީ ބޭރުގެ ޤައުމުތަކުގެ އަސްކަރިއްޔާތަކާ ގުޅިގެން ރާއްޖޭގައިވެސް ތަފާތު އިތުރު ތަމްރީނާއި ޖޮއިންޓް އެކްސައިޒްތައް މިދިޔަ އަހަރު ކާމިޔާބުކަމާއެކު ބޭއްވުނު ކަމަށެވެ.
ކޯސްޓްގާޑްގެ ފްލީޓްތައް އޮޕަރޭޝަނަލް ހާލަތަށް ގެނެވިފައިވާ ކަމަށާއި ކޯސްޓްގާޑް ޝިފް ހުރަވީ ހިދުމަތަށް ނެރެވިފައިވާ ކަމަށް ވިދާޅުވިއެވެ.
ޝަމާލް އިތުރަށް ވިދާޅުވީ ސިފަވަރުގައި ތަރައްގީކުރަމުން އަންނަ އެކަތަ ބަނދަރު ހެދުމަށް ބޭނުންވާ ބިން ހިއްކުމުގެ މަސައްކަތް ކުރަމުން އަންނައިރު އެ މަސައްކަތް ނިމުމުން އިންތިޤިލާބީ ބަދަލުތަކެއް އަންނާނެ ކަމަށެވެ.
މިއަދު ސިފައިންނަށް ލިބޭ އެންމެ ބޮޑު ހިތްހަމަ ޖެހުމަކީ ރާއްޖޭގެ އެކިކަންކޮޅުތަކުގައި ރެއާއި ދުވާލު ވަރުބަލިކަމެއްނެތި ދިވެހި ސިފައިން ކުރަމުން ގެންދާ އިޚްލާޞްތެރި ޚިދުމަތް އިތުބާރާއި އިޙްތިރާމާއި ލޯތްބާއެކު ރައްޔިތުން ބަލައިގަތުން ކަމަށް ވެސް ޝަމާލް ވިދާޅުވިއެވެ.
