ޗައިނާއާއެކު އަސްކަރީ މުއާމަލާތް ތައް ކުރަން ބޭނުންވާކަމަށް އެމެރިކާއިން ބުނެފި

ޗައިނާއާއެކު އަސްކަރީ މަޝްވަރާތައް ކުރިއަށްގެންދަން ބޭނުންވާކަމަށް އެމެރިކާއިން ބުނެފިއެވެ.

އަންގާރަ ދުވަހު، އެމެރިކާއިން ވަނީ ޗައިނާއާއެކު "މިލިޓަރީ ކޮމިއުނިކޭޝަން ޗެނަލްސް" ގާއިމުކުރަން ބޭނުންވާކަމަށް ބުނެފައެވެ. އެގައުމުން މިހެން ބުނެފައި މިވަނީ ޗައިނާއިން ކިއުބާގައި އެގައުމުގެ އަސްކަރިއްޔާގެ އައު އަސްކަރީ ތަމްރީން ފެސިލިޓީއެއް ގާއިމުކުރުމަށް ނިންމާފައިވާކަމުގެ ރިޕޯޓުތަކަކާއެކުއެވެ.

ވައިޓް ހައުސްގެ ނެޝަނަލް ސެކިއުރިޓީ ސީނިއަރ ޑައިރެކްޓަރ ފޮރ ޗައިނާ އެންޑް ޓައިވާން އެފެއަރޒް، ސަރާ ބެރަން ވަނީ ދެގައުމުގެ ދެމެދު އުފެދިފައިވާ ނުތަނަވަސްކަން ކުޑަކުރުމަށްޓަކައި، ދެގައުމުގެ މެދުގައި އަސްކަރީ މުއާމަލާތްތައް ގާއިމުކުރުން މުހިންމުކަމަށް ވިދާޅުވެފައެވެ.

އެގޮތުން މިއީ، އެއްގައުމުން އަނެއް ގައުމާމެދު ކުރެވޭ ޝައްކުތައް ކުޑަކުރުމަށްޓަކައި މުހިންމު ކަމެއްކަމަށް ސަރާ ވަނީ ވިދާޅުވެފައެވެ. އަދި މިކަމާ ގުޅިގެން ޗައިނާއިން މަޝްވަރާކުރަން ބޭނުންވާނަމަ އެކަމަށް އެމެރިކާއިން ތައްޔާރަށް އޮންނާނެ ކަމަށްވެސް ވަނީ ވިދާޅުވެފައެވެ.

ހަފުތާ ބަންދުގައި، އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން ޗައިނާއަށް ކުރެއްވި ދަތުރުފުޅަށްފަހު، އަންގާރަ ދުވަހު އެމަނިކުފާނު ވަނީ ޗައިނާގެ އަސްކަރީ ހަރަކާތްތަކާމެދު އެމެރިކާއިން ވަރަށް ބޮޑަށް ކަންބޮޑުވާކަމަށް ވިދާޅުވެފައެވެ. އަދި މިއީ އެމެރިކާއިން ވަރަށް ގާތުން ބަލަމުންދާނެ ކަމެއް ކަމަށްވެސް ބްލިންކެން ވިދާޅުވިއެވެ.

ބްލިންކެން ޗައިނާއަށް ކުރެއްވި ދަތުރުފުޅުގައި ދެގައުމުންވެސް ވަނީ، ދެގައުމުގެ ދެމެދުގައި އުފެދިފައިވާ ނުތަނަވަސްކަން ކުޑަކުރުމަށް މަސައްކަތްކުރައްވާނެކަމަށް ބުނެފައެވެ.