ސިފްކޯ ހިޔާއަށް، ޖުލައި މަހުގެ ނިޔަލަށް އާއިލާތަކަށް ވަދެވޭނެ: މިނިސްޓަރު މާރިޔާ
ސިފްކޯ ހިޔާގެ ނަމުގައި ބިންގާ އެޅިގެންދިޔަ 330 ފްލެޓުގެ އަމަލީ މަސައްކަތް ފަށާފައިވަނީ 2013 ސެޕްޓެމްބަރު މަހުގެ 02 ވަނަ ދުވަހު
ޑިފެންސް މިނިސްޓަރު، މާރިޔާ އަހުމަދު ދީދީ
ސިފައިންގެ ބޯހިޔާވަހިކަމުގެ ޕްރޮޖެކްޓް "ސިފްކޯ ހިޔާ" ފްލެޓްތަކަށް، މިއަންނަ ޖުލައި މަހުގެ ނިޔަލަށް ޢާއިލާތަކަށް ވަދެވޭނެ ކަމަށް ސިފްކޯއިން ޔަގީންކަން ދޭކަމަށް، ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
ސިފައިންގެ 131 ވަނަ އަހަރީ ދުވަހުގެ ޚާއްސަ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު މާރިޔާ ވިދާޅުވީ، މިކަމަށް ސަރުކާރުން ވަނީ ބޮޑު ހޭދައެއްކޮށްފައި ކަމަށެވެ. އަދި ސިފްކޯ ހިޔާގެ މަސައްކަތް ނިމިގެންދަނީ ސީދާ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އެކަމަށް ދެއްވާ އަހަންމިއްޔަތުކަމުގެ ސަބަބުންކަމަށް މިނިސްޓަރު ވިދާޅުވިއެވެ.
ސިފައިންނާއި ސިފައިންގެ އާއިލާތަކަށް ބޯހިޔާވަހިކަން ފޯރުކޮށްދިނުމަށްޓަކައި ސިފްކޯހިޔާގެ ނަމުގައި ބިންގާ އެޅިގެންދިޔަ 330 ފްލެޓުގެ އަމަލީ މަސައްކަތް ފަށާފައިވަނީ 2013 ސެޕްޓެމްބަރު މަހުގެ 02 ވަނަ ދުވަހުއެވެ. އެއީ 18 މަސް ދުވަހުގެތެރޭގައި ނިންމާގޮތަށެވެ. ނަމަވެސް ފްލެޓްތަކުގެ މަސައްކަތް ނުނިމި ދިގުލައިގެން ދިޔައީ މަޝްރޫއުގެ އޭރުގެ ކޮންޓްރެކްޓަރު، ނޫމަޑި ކުންފުންޏާއެކު ހަދާފައިވާ އެއްބަސްވުން ކުރީ ސަރުކާރުން ބާތިލުކުރުމާ ގުޅިގެންނެވެ. އެ ފްލެޓްތަކުގެ މަސައްކަތް އަވަހަށް ނިންމުމަށްޓަކައި މި ސަރުކާރުން ވަނީ އަމީން ކޮންސްޓްރަކްޝަނާ އެމަސައްކަތް ހަވާލުކޮށްފައެވެ.
ސިފްކޯހިޔާގައި ހިމެނެނީ ސޯޝަލް ހައުސިންގ ޔުނިޓްތަކަށްވުރެ ލަގްޜަރީ ފެންވަރުގެ، 3 ކޮޓަރީގެ އެޕާޓްމަންޓްތަކެވެ. 3 ޓަވަރު ހިމެނޭގޮތަށް އިމާރާތްކުރާ މި ފްލެޓްތަކުގެ ކޮންމެ އެޕާޓްމެންޓެއްގައިވެސް 900 އަކަފޫޓު ހުރެއެވެ. ސިފައިންގެ ތިން ޓަވަރުގައި ތިން ކޮޓަރީގެ 330 ފްލެޓު، އަދި 20 ޕެންޓް ހައުސް ހުންނާނެކަމަށް ކުރިން ބުނެފައިވެއެވެ.
