ޓެރަރިޒަމާ ހަރުކަށި ފިކުރަކީ ކަނޑިއެއްހާ ތޫނު ދެ މިޔަ: ރައީސް
މުޅި ދުނިޔޭގައިވެސް މިއަދު އޮތް އެންމެ ބޮޑު ނުރައްކަލަކީ ޒަމާނީ ޓެރަރިޒަމް
131 ވަނަ ސިފައިންގެ އަހަރީ ދުވަހުގެ ޖަލްސާގައި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
ސަލާމަތީ ގޮތުން ބަލާއިރު ރާއްޖެއަށް މިވަގުތު އޮތް އެންމެ ބޮޑު ގޮންޖެހުމަކީ ޓެރަރިޒަމާއި ހަރުކަށި ފިކުރުގެ ނުރައްކާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ އަންގާރަ ދުވަހުގެ ރޭ ކުރިއަށްދިޔަ 131 ވަނަ ސިފައިންގެ އަހަރީ ދުވަހުގެ ޖަލްސާ ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.
ރައީސް ވިދާޅުވީ، މުޅި ދުނިޔޭގައިވެސް މިއަދު އޮތް އެންމެ ބޮޑު ނުރައްކަލަކީ ޒަމާނީ ޓެރަރިޒަމް ކަމަށެވެ. ދުރާލައި ރާވައިގެން، އަދި މާ ދުރުގައި ފިލައި ތިބެގެން ހިންގާ ޓެރަރިޒަމްގެ ނުރައްކާ މުޅި ދުނިޔެއަށް މިއަދު ފެތުރިފައިވާ ކަމަށާއި، މީގެ ނުރައްކާ ރާއްޖެއާ ހަމައަށްވެސް ފޯރާފައިވާކަމަށެވެ.
ޓެރަރިޒަމާއި ހަރުކަށި ފިކުރުގެ ނުރައްކާ އޮތްއިރު، މިއީ މުޅި އިންސާނިއްޔަތާ ދެކޮޅަށް އަތުކޮޅަށް ދަމާލާފައި އޮތް ކަނޑިއެއްހާ ތޫނު ދެ މިޔައިގެ ގޮތުގައި ރައީސް ވަނީ ސިފަކުރައްވާފައެވެ. އެކަމަށްވެސް ދިވެހި ސިފައިން ތިބީ ތައްޔާރުވެ ފާރަވެރިވެގެން ކަމުގައި ރައީސް ވިދާޅުވިއެވެ.
ރައީސް ވަނީ ސިފައިންގެ އޮޕަރޭޝަނަލް އަދި ލޮޖިސްޓިކްސް ގާބިލުކަން އިތުރުކުރުމަށްޓަކައި، ގިނަ މަސައްކަތްތަކެއް ކުރެވެމުންދާކަން ފާހަގަކުރައްވާފައެވެ. މިދިޔަ ހަތަރު އަހަރުގެ ތެރޭގައި ދިވެހި ޢަސްކަރިއްޔާގެ ތަރައްގީއަށްޓަކައި ކުރި ގިނަ މަސައްކަތްތަކުން، ދިވެހި ސިފައިންގެ ގާބިލުކަން މީގެ ކުރިން އިތުރުކުރެވިފައި ނުވާހާ މަތީ މިންވަރަކަށް މިހާރު އިތުރުކުރެވިފައިވާކަމަށް ރައީސް ވިދާޅުވިއެވެ.
