ދޭދޭ ގައުމުތަކާއި ބައިނަލްއަގުވާމީ ޖަމާއަތްތަކާ ބަދަހިކުރާ ގާތް އެކުވެރި ގުޅުމުގައި އާރުލާވަރަކަށް، އެ ގައުމެއްގެ ވަށައިގެން ލެވޭ ދިފާއީ ފާރުގެ ވަރި ބޯވެގެންދާނެކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ރައީސް މިފަދައިން ވިދާޅުވީ އަންގާރަ ދުވަހުގެރޭ ކުރިއަށްދިޔަ 131 ވަނަ ސިފައިންގެ އަހަރީ ދުވަހުގެ ޖަލްސާ ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.

ރައީސްގެ ވާހަކަަފުޅުގައި ވަނީ، އަޅުވެތިކަމާ ދެކޮޅަށް 21 ވަނަ ގަރުނުގައި ބޭނުންކުރާ އެންމެ ކަށަވަރު ފަރުވާއަކީ، ސަރަހައްދީ އަދި ބައިނަލްއަގުވާމީ ސުލްހަކަން ފާހަގަކުރައްވާފައެވެ. ގައުމަށް ކުރިމަތިވާ ނުރައްކާތައް ކުޑަކުރުމުގައާއި، އެ ނުރައްކާތައް ދުރާލައި ދެނެގަތުމުގައިވެސް، ގައުމުތަކަށް ކާމިޔާބު ލިބެނީ އެ ގުޅުން ދަމަހައްޓައިގެންކަމަށް ރައީސް ވިދާޅުވިއެވެ. މިއަދުގެ ބައިނަލްއަގުވާމީ މުޖްތަމައުގައި އެއްވެސް ގައުމަކީ އެކަހެރިވެގެން އޮވެވޭނެ ގައުމެއް ނޫންކަން ރައީސް ފާހަގަކުރެއްވިއެވެ.

ރައީސް ވިދާޅުވީ ރާއްޖޭގެ މިނިވަންކަމާއި ސިޔާދަތު ރައްކާތެރިކުރަމުންދަނީވެސް އެ ގުޅުން ދަމަހައްޓައިގެން ކަމަށާއި، އެ ގުޅުން ބަދަހިކުރުމަށްޓަކައި ގާބިލު އަދި ހުޝިޔާރު އަސްކަރިއްޔާއެއް އޮތުމަކީވެސް އެހާމެ ބޭނުންތެރިކަމެއް ކަމަށެވެ.

ގައުމެއްގެ މިނިވަންކަން ނިގުޅައިގަތުމަކީ ބޭރުން މެދުވެރިވާ ކަމަކަށް ވިޔަސް، ގިނަ ފަހަރަށް އެކަމުގެ ފެށުން ގުޅިފައި އޮންނަނީ ގައުމުގެ ދާޚިލީ ހަމަނުޖެހުމާކަން ރައީސް ފާހަގަކުރެއްވިއެވެ. ރާއްޖޭގެ މިނިވަންކަމުގެ ތާރީޚުން ފެންނަން އޮތީވެސް އެ ހަގީގަތްކަމަށާއި، މިއަދު ދުނިޔޭގައި ހިނގާ ހަނގުރާމަތަކުން ފެންނަނީވެސް އެކަމުގެ ހެކިތައްކަމަށް ރައީސް ވިދާޅުވިއެވެ.

އެހެންކަމުން އަހަރެމެންގެތެރޭގައި ބައިބައިވުން އުފެދިދާނެ އެންމެހާ ކަންކަމުން ދުރުހެލިވެ ތިބުމަކީ، ދިވެހި ސިފައިންވެސް ވަރަށް ބޮޑަށް ސަމާލުކަން ދޭންޖެހޭ ކަމެއް ކަމަށާއި، ސިފައިންގެ ކޮންމެ މީހެއްގެވެސް އެންމެ އިސް ވާޖިބަކަށް ހަދަންވީ، ސުލްހަމަސަލަސްކަމާއި ހަމަޖެހުން ދެމެހެއްޓުމަށް މަސައްކަތް ކުރުން ކަމަށް ރައީސް ވިދާޅުވިއެވެ.