ޢުމުރުން ވަކި ހިސާބަކަށް ދިއުމުން، ވަކި ކަހަލަ މަސައްކަތެއް ނުކުރެވޭނެ ކަމަށް ބެލެވޭ ފަހަރު އާދެއެވެ. ހައްޓަށް ބުރަ، ޖިސްމާނީ ގޮތުން ހެލިފެލިވުމަށް މަޖުބޫރުކުރުވާ މަސައްކަތްތަކަކީ، ނޫކަށިފުރައިގެ ޒުވާނުންގެ ކަމެއްގެ ގޮތުގައިވެސް ދެކެވެއެވެ. ނަމަވެސް ހާލަތު ނިޔާކުރާގޮތުން، އުމުރަކަށް، ހާލަތަކަށް ބެލުމެއްނެތި، ނުރައްކަލުގެ މައިދާންތަކުގައި މަސައްކަތް ކުރަންޖެހޭ ދުވަސްވީ މީހުންގެ އަދަދުވެސް މަދެއް ނޫނެވެ.

ފަލަސްތީނަށް އުފަން، އުމުރުން 56 އަހަރުގެ މުނީރު އަލްއަގްތާޝް ނުވަތަ އަބޫ ސާލިހަކީ މި ދަންނަވާ ކަހަލަ މީހެކެވެ. މުނީރަކީ ރާމަﷲއާއި ނާބްލުސް ގުޅުވައިދޭ ލިންކު ރޯޑުގައި ކޮންމެ ދުވަހަކުވެސް ދިގު ދަތުރެއް ކުރާ މީހެކެވެ. މިދިޔަ 4 ދުވަސް ފާއިތުވެ ދިޔައީ އެގޮތުގައެވެ. ދަތުރެކޭ ދެންނެވިއަސް، ސަވާރީއެއްގެ ފަހަތުގައި، ދެ އަތް އުރާލައިގެން އިނދެ ދަތުރުކުރަނީއެއް ނޫނެވެ. ލިންކު ރޯޑުގައި މުނީރު ދަތުރުކުރަނީ މާސިންގާ ކޮފީ ކުރައެއް ހިފައިގެންނެވެ. އެ ސަރަހައްދުން ދަތުރުކުރާ އުޅަނދުފަހަރު ދުއްވާ މީހުންނަށް ކޮފީ ވިއްކުމަކީ، މުނީރު އާމްދަނީ ހޯދުމަށް ކުރާ މަސައްކަތެވެ.

ދުވާލުގެ ވަގުތުތަކުގައި ލިންކު ރޯޑުން ދަތުރުކުރާ މީހުންނަށް ވިއްކުމަށްޓަކައި ކޮފީ ގިރުމުގެ މަސައްކަތް މުނީރު ފަށަނީ އޭގެ ކުރީ ރެއެވެ. ކޮފީ ތައްޔާރުކުރަނީ މުގުރާފައި ހުންނަ ކޮފީއާއި ކާފޫރުތޮޅި ބޭނުން ކޮށްގެންނެވެ. ކޮފީ ގިރުމަށްފަހު އެ އަޅަނީ ފިސާރި ބަރު ކުރައަކަށެވެ. އެ ކުރައަކީ ހޫނު ބޯޓުދެލި އަޅާފައި ހުންނަ ސިލިންޑަރެއްވެސް ހަރުކޮށްފައި ހުންނަ ކުރައެކެވެ. އެއީ ކޮފީ ހޫނުކޮށް ބަހައްޓަން ކޮންމެހެން ކުރަންޖެހޭ ކަމަކަށް ވާއިރު، މުޅި ދުވަހު ފައިމަގުގައި ކޮފީ ކުރާ ހިފައިގެން ކޮޅުކޮޅު މައްޗަށް ހިނގާހިނގާ، ރޭގަނޑު ވާއިރު މުނީރު ހުންނަނީ ދެވަރުން އެއްވަރުވެފައެވެ.

ޖިސްމާނީގޮތުން ހައްޓަށް ބުރަ މަސައްކަތުގައި އުޅޭ 5 ދަރިންގެ ބައްޕަ ފާހަގަކުރިގޮތުގައި، މަސައްކަތުގައި ވާ ވަރުބަލިކަން އިތުރުވެގެންދަނީ އިޒްރޭލުގެ ޔަހޫދީ ވަޒަންވެރިންގެ ފަރާތުން ކުރިމަތިކުރާ ފުރައްސާރައިގެ ސަބަބުންނެވެ. ފަލަސްތީނުގެ ރަށްވެހިންނާއި އިޒްރޭލު މީހުންވެސް ބޭނުންކުރަނީ އެއް މަގެކެވެ. އެ ލިންކު ރޯޑަކީ ޔަހޫދީން ވެރިވެގަނެގެން އުޅޭ ސަރަހައްދާއި، ފަލަސްތީނުގެ ރަށްވެހިންނަށް އޮތް ސަރަހައްދު ގުޅުވައިދޭ މަގުކަމުން، އިޒްރޭލު މީހުންނާ ބައްދަލުނުވާނެ ގޮތެއްވެސް ނެތެވެ.

މި އަހަރުގެ ފެބުރުއަރީ މަހުގެ ތެރޭގައި، ހުޅަނގު އައްސޭރީގެ ހަވާރާގައި ދިރިއުޅެމުން ދިޔަ ފަލަސްތީނު ރައްޔިތުންނަށް އަމާޒުކޮށްގެން ޔަހޫދީ ވަޒަންވެރިން ހިންގި ލާއިންސާނީ ޖަރީމާގައި އެތައް ކާރަކާއި ގެތަކެއްގައި ހުޅުޖަހައި ރޯކުރިއެވެ. ދުނިޔޭގެ އެކި ކަންކޮޅުތަކުން ކުށްވެރިކުރި އެ ހާދިސާއަށްފަހު، މުނީރަށް ކުރިމަތިލާންޖެހޭ ފުރައްސާރަ ވަކިން ބޮޑެވެ. އެކަމަކު އެކަން ކުރަންޖެހޭ ސަބަބެއް ނެތެވެ.

އިގްތިސާދީ ނަޒަރަކުން ބަލާއިރު، މި ދުވަސްވަރަކީ ފަލަސްތީނުގެ ސަރަހައްދުތަކަށް ދަތި ދުވަސްވަރެކެވެ. މައިގަނޑު ސަބަބަކީ ޕަލަސްޓީނިއަން އޮތޯރިޓީ (ޕީއޭ)އަށް ލިބޭ ފަންޑު ހީނަރުވުމެވެ. އެކަން ގޯހުން ގޯހަށް ގޮސްފައިވަނީ، ޓެކުހުގެގޮތުގައި ފަލަސްތީނަށް ލިބެންޖެހޭ ގިނަ އަދަދެއްގެ ފައިސާ، އިޒްރޭލުން ހިފަހައްޓައިގެން އުޅޭތީއެވެ.

ފަލަސްތީނުގެ ސަރުކާރު ވަޒީފާތައް އަދާކުރަމުންދާ މަދަނީ މުވައްޒަފުންނާއި އަސްކަރީ ސިފައިންނަށް މެއި މަހުގެ މުސާރައިގެ ގޮތުގައި ލިބުނީވެސް މުސާރައިގެ އެންމެ 85 ޕަސެންޓެވެ. 2022 ވަނަ އަހަރުގެ 3 ވަނަ 3 މަސްދުވަހާ ހިސާބަށް އައިއިރު، ފަލަސްތީނުގައި މަސައްކަތްކުރަން ފަށާ އުމުރު ކަމަށް ބަލާ، 15 އަހަރުން މަތީގެ އާބާދީގެ 25 ޕަސެންޓް މީހުންނަކީ ވަޒީފާއެއް ނުލިބި ތިބި މީހުން ކަމަށް، އެގައުމުގެ ތަފާސް ހިސާބުތަކާބެހޭ މަރުކަޒީ އިދާރާއިން ވަނީ ހާމަކޮށްފައެވެ. އެހެންކަމުން، މުނީރު ފަދައިން، އެމީހަކަށް ވީ ކޮންމެ ހާލެއްގައި، ކުރެވެން އޮތް ކޮންމެ ފަދަ މަސައްކަތެއް ކުރަން މިއަދު ވަނީ މަޖުބޫރު ވެފައެވެ.