ސާފް ޗެމްޕިއަންޝިޕް ފުޓްބޯޅަ މުބާރާތުގައި ޕާކިސްތާނާއި އިންޑިޔާ މާދަމާ ރޭ ކުޅެން އޮތް މެޗު ފަސްކޮށްދޭން ޕާކިސްތާނުން އެދެފި އެވެ.

މުބާރާތް އިންތިޒާމްކުރާ ސައުތު އޭޝިއަން ފުޓްބޯޅަ ފެޑަރޭޝަން (ސާފް)އަށް ޕާކިސްތާނުގެ ފުޓްބޯޅަ ފެޑަރޭޝަނުން ވަނީ ތަފްސީލާއެކު މެޗު ފަސްކޮށްދޭން އެދިފަ އެވެ.

އެ ސަބަބަކީ އިންޑިޔާ އަށް ދޭން ބޭނުންވާ ވިސާ މިއަދު ލިބުމުން އިންޑިޔާގެ ބެންގަލޫރަށް ދެވޭއިރު މާދަމާގެ މެޗަށް އެކަށީގެންވާ ވަގުތު ނުލިބޭތީ އެވެ.

މޮރިޝަސްގައި މިހާރު ތިބި ޕާކިސްތާން ޓީމު މިއަދު އެ ގައުމުން ފުރައިގެން ފުރަތަމަ ދާން ޖެހެނީ އިންޑިޔާގެ މުމްބާއީއަށެވެ. އެތަނުން ފުރައިގެން ބެންގަލޫރަށް ދެވޭނީ މާދަމާ މެންދުރު ފަހުގެ ވަގުތެއްގަ އެވެ. އިންޑިޔާއާ ދެކޮޅަށް ކުޅެން ޖެހޭ މެޗު އޮތީ މާދަމާރޭ 7:30ގަ އެވެ.

ޕާކިސްތާން ފުޓްބޯޅަ ފެޑަރޭޝަނުން ބުނީ ޓީމުގައި ތިބި ކުޅުންތެރިންނާއި އޮފިޝަލުންގެ އަދަދު 32 އަރާ ކަމަށާއި ނަމަވެސް އެންމެނަށް އެއް ފްލައިޓެއްގައި ދަތުރުކުރަން ޖާގަ ނުލިބުނު ކަމަށެވެ. މިހެންވެ ފުރަން ޖެހިފައިވަނީ ދެ ފްލައިޓެއްގައި ކަމުން މެޗު ފަށަންވާއިރަށް މުޅި ޓީމަށް އިންޑިޔާ އަށް ނުދެވޭނެ ކަމަށެވެ.

ޕާކިސްތާނުގެ ހުށަހެޅުމާމެދު ސާފުން ބުނެފައިވަނީ މުބާރާތުގައި ވާދަކުރާ އަނެއް ހަތް ޓީމާއި ސްޕޮންސަރުންނާއެކު މަޝްވަރާ ކުރުމަށްފަހު ގޮތެއް ނިންމާނެ ކަމަށެވެ.

އެ ޖަމާއަތުގެ ސެކްރެޓަރީ ޖެނެރަލް އަންވަރުލް ހައްގު ހިލާލް ކުރިން ބުނަމުން އައީ އެއްވެސް މެޗެއް ފަސް ނުކުރެވޭނެ ކަމަށާއި ވަގުތަށް ނައިސްފިނަމަ ޕާކިސްތާނުގެ ވިސާ ކެންސަލް ކުރާނެ ކަމަށެވެ.

ވިސާ ހަމަނުޖެހުމުގެ މައްސަލާގައި ޕާކިސްތާނުން ކުށްވެރި ކުރަނީ އިންޑިޔާ އެވެ. ނަމަވެސް އިންޑިޔާއިން ބުނަނީ ވިސާ ލަސްވީ ޕާކިސްތާނުގެ ގައުމީ ޓީމު އިންޑިޔާއަށް ދިއުމަށް އިސްލާމް އާބާދުން ދޭން ޖެހޭ ހުއްދަތައް ނުދީ އޮތުމުން ކަމަށެވެ. އަދި ވިސާގެ މައްސަލަ މާބޮޑަށް ލަސްވީ ހަފުތާ ބަންދާ ދިމާވުމުން މޮރިޝަސްގައި ހުންނަ އިންޑިޔާގެ އެމްބަސީ ބަންދުކޮށްފައި ހުރުމުން ކަމަށެވެ.

ޕާކިސްތާނާއި އިންޑިޔާ އަކީ ސިޔާސީ ކޯޅުން ބޮޑު ދެ ގައުމެވެ. މި ދެގައުމުގެ މީހުންނަށް އެއްބަޔަކު އަނެއް ބަޔަކަށް ޒިޔާރަތްކުރުން އެއީއެހާފަސޭހައިން ކުރެވޭ ކަމެއް ނޫނެވެ.

ސާފް ޗެމްޕިއަންޝިޕުގައި މި ފަހަރު ޕާކިސްތާނާއި އިންޑިޔާއާއެކު އަށް ގައުމެއް ވާދަކުރާނެ އެވެ. އެއީ ގްރޫޕް އޭގައި ދެން ހިމެނޭ ކުވޭތާއި ނޭޕާލެވެ. ގްރޫޕް ބީގައި ހިމެނެނީ ލެބަނަން އާއި ދިވެހިރާއްޖެ އަދި ބަނގްލަދޭޝް އާއި ބޫޓާނެވެ. މި ފަހަރުގެ މުބާރާތަކީ ސާކު ގައުމުތަކުން ބޭރުން މުބާރާތުގައި ގައުމުތައް ބައިވެރިކުރާ ފުރަތަމަ މުބާރާތެވެ.