ޕާކިސްތާނަށް ބެންގަލޫރަށް ދެވޭނީ މެންދުރު ފަހު، މެޗު އޮތީ އިރާކޮޅު
20 ޖޫން 2023 | އަންގާރަ 08:25މޮރިޝަސްއިން ފުރައިގެން ބެންގަލޫރަށް ދާނީ މުމްބާއީގައި ޓްރާންސިޓްކޮށްފައި
ޮޕާކިސްތާން ކުޅުނު އެކުވެރިިކަމުގެ މެޗެއްގެ ތެރެއިން
ޕާކިސްތާނުގެ ގައުމީ ފުޓްބޯޅަ ޓީމަށް އިންޑިޔާ އަށް ދިއުމުގެ ވިސާ ހަމަޖެހި ފުރަން ތައްޔާރުވެއްޖެ އެވެ.
މާދަމާއިން ފެށިގެން އަންނަ މަހުގެ ހަތަރަކަށް ކުޅޭ މުބާރާތުގައި ވާދަކުރަން ކުޅުނު އެކުވެރިކަމުގެ މެޗުތަކަށްފަހު އިންޑިޔާ އަށް ނުދެވި ޕާކިސްތާންޓީމް މިވަގުތު ތިބީ މޮރިޝަސްގަ އެވެ. ދެ ފަހަރެއްގެ މަތީން ފުރަން ތައްޔާރުވި ނަމަވެސް މިހާތަނަށް ފުރޭގޮތްނުވީ މޮރިޝަސްގައި ހުންނަ އިންޑިޔާ އެމްބަސީން ވިސާގެ ކަންކަންކަން ހަމަޖައްސައިނުދީގެންނެވެ.
ނަމަވެސް މިހާރު ވިސާ ހަމަޖެހި މޮރިޝަސްއިން ޕާކިސްތާން ޓީމް ފުރަތަމަ ދާނީ އިންޑިޔާގެ މުމްބާއީ އަށެވެ. އެއީ މާދަމާ ހެދުނު އެވެ. މުމްބާއީން ފުރައިގެން ބެންގަލޫރަށް ދެވޭނީ މާދަމާގެ މެންދުރު ފަހުގެ ފަހުތެއްގަ އެވެ. މުބާރާތުގައި ޕާކިސްތާން ކުޅެންޖެހޭ ފުރަތަމަ މެޗުގައި އިންޑިޔާއާ ދެކޮޅަށް ނުކުންނަން ޖެހޭނީ މާދަމާ ރޭ 7:30ގަ އެވެ.
އިންޑިޔާގެ ކަރްނާޓަކާ ފުޓްބޯޅަ އެސޯސިއޭޝަނުން ބުނީ މުބާރާތުގެ ޝެޑިއުލް އިސްފަސްނުކޮށް ކުރިއަށް ދެވޭނެ ކަމަށް އުއްމީދު ކުރާ ކަމަށާއި ޕާކިސްތާނަށް ވަގުތަށް ނާދެވުނަސް މެޗު ފަސް ކުރުމުގެ ވިސްނުމެއް ނުގެންގުޅޭ ކަމަށެވެ.
ވިސާ ހަމަނުޖެހުމުގެ މައްސަލައިގައި ޕާކިސްތާނުން ކުށްވެރި ކުރަނީ އިންޑިޔާ އެވެ. ނަމަވެސް އިންޑިޔާއިން ބުނަނީ ވިސާ ލަސްވީ ޕާކިސްތާނުގެ ގައުމީ ޓީމު އިންޑިޔާއަށް ދިއުމަށް އިސްލާމް އާބާދުން ދޭން ޖެހޭ ހުއްދަތައް ނުދީ އޮތުމުން ކަމަށެވެ. އަދި ވިސާގެ މައްސަލަ މާބޮޑަށް ލަސްވީ ހަފުތާ ބަންދާ ދިމާވުމުން މޮރިޝަސްގައި ހުންނަ އިންޑިޔާގެ އެމްބަސީ ބަންދުކޮށްފައި ހުރުމުން ކަމަށެވެ.
ޕާކިސްތާނާއި އިންޑިޔާ އަކީ ސިޔާސީ ކޯޅުން ބޮޑު ދެ ގައުމެވެ. މި ދެގައުމުގެ މީހުންނަށް އެއްބަޔަކު އަނެއް ބަޔަކަށް ޒިޔާރަތްކުރުން އޮންނަނީ އާންމުގޮތެއްގައި މަނާކޮށްފަ އެވެ.
